গুৱাহাটীত চাঞ্চল্য! নিশা চলা ৰঙীন পাৰ্টীৰ পাছতে মহিলাৰ মৃত্যু, আটক ইমৰান…
পুনৰ গুৱাহাটী মহানগৰীত সংঘটিত হৈছে এক ডাঙৰ ঘটনা। নিষিদ্ধ দ্ৰব্যৰ অভাৰ ডজ লৈ মৃত্যুক সাৱতি লয় এগৰাকী মহিলাই। এই ঘটনাত নাম সাঙোৰ খাইছে ইমৰান নামৰ এজন যুৱকৰ।
পুনৰ গুৱাহাটী মহানগৰীত এক চাঞ্চল্যকৰ ঘটনা। এগৰাকী মহিলাৰ মৃত্যুই উদঙাইছে অভিজাত মহানগৰীৰ ব্যস্ত গলিত চলি থকা কিছুমান কু-কাণ্ডৰ কথা। অভিযোগ অনুসৰি ড্ৰাগছৰ অভাৰ ড’জত এগৰাকী মহিলাই মৃত্যুক সাৱতি লয়। এজন যুৱকে শনিবাৰে নিশা মহিলাগৰাকীক হাস্পাতাললৈ লৈ আহিছিল। য’ত চিকিৎসকে তেওঁক মৃত ঘোষণা কৰে। এই মহিলাগৰাকীক লৈ অহা যুৱকজনৰ বিৰুদ্ধেও উত্থাপন হৈছে গুৰুতৰ অভিযোগ। এই যুৱকজনেই মহানগৰীৰ বহু বিলাসী পাৰ্টীত যোগান ধৰে যুৱতী-মহিলা।
ঘটনাৰ বিৱৰণী অনুসৰি শনিবাৰ (৩০ আগষ্ট)য়ে নিশা ইমৰান ওৰফে মুক্তাৰ আলী নামৰ যুৱকজনে এগৰাকী মহিলাক অচেতন অৱস্থাত জি এম চি এইচত ভৰ্তি কৰায়। কিন্তু চিকিৎসকে পৰীক্ষা কৰি মহিলাগৰাকীক মৃত ঘোষণা কৰে। এই কথা গম পাইয়েই ইমৰানে পলায়ন কৰাৰ চেষ্টা কৰে যদিও GMCHৰ চিকিৎসক আৰু নিৰাপত্তাৰক্ষীয়ে যুৱকজনক আটক কৰি ভঙাগড় আৰক্ষী থানাত গতাই দিয়ে।
অভিযোগ অনুসৰি ড্ৰাগছৰ অভাৰ ড’জৰ বাবে মহিলাগৰাকীৰ মৃত্যু হয়। শনিবাৰে নিশা ইছলামপুৰৰ এখন হোটেলত চলিছিল বিলাসী পাৰ্টী। সন্দেহ অনুসৰি তাতেই ড্ৰাগছৰ অভাৰ ড’জ লৈ মহিলাগৰাকীয়ে মৃত্যুক সাৱতে।
ইফালে ইমৰানক আৰক্ষীয়ো সোধা-পোছা কৰাৰ সময়ত পোহৰলৈ আহিছে বহু বিস্ফোৰক তথ্য। ইমৰানৰ মোবাইলত বহু যুৱতীৰ ফটো, গ্ৰাহকৰ নম্বৰ, ড্ৰাগছ-হেৰইনৰ ফটো লাভ কৰিছে আৰক্ষীয়ে। অভিযোগ অনুসৰি, লাচিত নগৰৰ ভগৱান হোটেলত যুৱতী যোগান ধৰে ধৃত ইমৰানে। ইমানেই নহয়, ইমৰানে মহানগৰীৰ বহু বিলাসী পাৰ্টিত যুৱতী যোগান ধৰে।
মৃত্যু হোৱা মহিলাগৰাকীয়ে এখন পাৰ্লাৰত কাম কৰিছিল যদিও টকাৰ বিনিময়ত নিশা বহু পুৰুষক সংগ দিছিল। মহিলাগৰাকীয়ে বিভিন্ন নামেৰে গ্ৰাহকক চিনাকী দি এই কাম চলাই গৈছিল। এই মহিলাগৰাকী হেঙাৰাবাৰীৰ ভাড়াঘৰত থকা আশুতোষৰ পত্নী বুলি চিনাক্ত হৈছে।
ঘটনাৰ পাছতে মহিলাগৰাকীৰ স্বামীয়ে কয় যে, শনিবাৰে পুৱাৰ ভাগত নগাঁওৰ ঘৰলৈ যাও বুলি ওলাই আহিছিল মহিলাগৰাকী। তাৰ পাছতে নাছিল কোনো খবৰ। কিন্তু নিশা মহিলাগৰাকীৰ মৃত্যুৰ খবৰ লাভ কৰে পৰিয়ালৰ লোকে। এই সমগ্ৰ ঘটনাই মহানগৰীত তীব্ৰ চাঞ্চল্যৰ সৃষ্টি কৰিছে।
উল্লেখ্য যে, বিগত সময়চোৱাত আৰক্ষী তথা প্ৰশাসনে ড্ৰাগছৰ ৰমৰমীয়া বেয়া ৰোধ কৰিবলৈ বিভিন্ন পদক্ষেপ হাতত লৈ আহিছে। কিন্তু তাৰ মাজতে এইবোৰ ঘটনাই স্পষ্ট কৰি দিয়ে যে গুৱাহাটীত নিষিদ্ধ দ্ৰব্য লাভ কৰা অতি সহজ। একাংশ যুৱক-যুৱতীৰ পৰা বৃদ্ধলৈ, বহু লোক ড্ৰাগছৰ কবলত পৰিছে। কিন্তু তাৰ পাছতো একাংশ ড্ৰাগছ সৰবৰাহকাৰীক নাকী লগাব পৰা নাই আৰক্ষী তথা প্ৰশাসনে। সম্প্ৰতি উক্ত ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে। গতিকে তদন্তৰ অন্তত অধিক তথ্য পোহৰলৈ অহাৰ সম্ভাৱনা আছে।
অন্য খবৰ পঢ়কঃ টোপনি হৰিছে ট্ৰাম্পৰ! একেখন মঞ্চত ভাৰত, ৰাছিয়া আৰু চীন….
