অমিত শ্বাহক লৈ বিস্ফোৰক মন্তব্য গৌৰৱ গগৈৰ, অশোক সিংহলক ক্ষমা খোজাৰ দাবী কংগ্ৰেছ নেতৃত্বৰ

“বিজেপি দলত গৰুচোৰ লগতে ভোট চোৰো আছে। অসমৰ ৰাইজে এতিয়া এই কথা মৰ্মে মৰ্মে উপলব্ধি কৰিছে।” চৰাইদেউত আজি এইদৰে বিজেপি দলক কটাক্ষ কৰে অসম প্ৰদেশ কংগ্ৰেছৰ সভাপতি তথা যোৰহাট লোকসভা সমষ্টিৰ সাংসদ গৌৰৱ গগৈয়ে। “ভোট চোৰ-চকী এৰক” শীৰ্ষক কাৰ্যসূচীত অংশগ্ৰহণ কৰি সাংসদ গগৈয়ে অপশাসন, ভুৱা-প্ৰতিশ্ৰুতি অভিযোগ উত্থাপন কৰি বিজেপি চৰকাৰৰ বিৰুদ্ধে সৰৱ হয়।

তেওঁ কয় অভিযোগ যে, এখন গণতান্ত্ৰিক দেশত ভোট চুৰি কৰি শাসনৰ গাদীত বহাতো কেনে বিপদজনক সেইয়া দেশবাসীয়ে আজি দুৰ্ভাগ্যজনকভাবে প্ৰত্যক্ষ কৰিবলগীয়া হৈছে। কেন্দ্ৰত বিজেপি নেতৃত্ব যেনেদৰে অহংকাৰী-স্বেচ্চাচাৰী হৈ পৰিছে, তেনেদৰে ৰাজ্যতো মুখ্যমন্ত্ৰীগৰাকী চূড়ান্তভাৱে দাম্ভিক-অহংকাৰী-স্বেচ্চাচাৰী হৈ কামকাজ পৰিচালনা কৰিছে বুলি কয় গৌৰৱ গগৈয়ে । তেওঁ কয়,”ভোটাৰ ৰাইজৰ ভোটৰ মূল্য এতিয়া বিজেপি চৰকাৰখনে দিব নিবিচাৰে।”

সাংবাদিকৰে হোৱা বাৰ্তালাপত সাংসদ গৌৰৱ গগৈয়ে বিগত ২০১৮ বৰ্ষত এনআৰচিৰ খচৰা প্ৰস্তুত কৰাৰ সময়ত ৪০ লাখ লোকৰ নাম বাদ পৰা বুলি চৰ্চিত বিষয়টো আলোকপাত কৰে। তেওঁ অভিযোগ কৰে যে, বিজেপি চৰকাৰখনে প্ৰকৃত ভাৰতীয় নাগৰিকক সন্দেহ আৰু শংকাৰ মাজত জীয়াই থাকিবলৈ বাধ্য কৰিছে। বহু গোৰ্খা সম্প্ৰদায়ৰ লোক এনআৰচিৰ পৰা বঞ্চিত হৈছে, তেওঁলোকক ন্যায় দিব লাগিব। বিজেপিয়ে ঐতিহাসিক অসম চুক্তিক অপমান কৰি নাগৰিকত্ব সংশোধনী আইন বলৱৎ কৰিছে বুলি কয় সাংসদ গগৈয়ে।

“স্বয়ং দেশৰ গৃহমন্ত্ৰী অমিত শ্বাহ অসম চুক্তিক নস্যাৎ কৰাৰ প্ৰধান পৃষ্ঠপোষক। বিজেপি চৰকাৰখনে অসমৰ ভাষিক সংখ্যালঘু লোকক ভয় আৰু আতংকময় পৰিবেশলৈ ঠেলি দিছে। এইখন চৰকাৰে জাতি-মাটি-ভেটিৰ কথা কয়, কিন্তু এই বিজেপি চৰকাৰখনেই যেনেকৈ ভাষিক সংখ্যালঘু লোকক উচ্ছেদ কৰিছে, তেনেদৰে আদিবাসী চাহ শ্ৰমিক, খিলঞ্জীয়া লোককো উচ্ছেদ কৰিছে।” এইদৰে কয় গৌৰৱ গগৈয়ে।

তেওঁ পুনৰ দাবী কৰে যে, এই উচ্ছেদ কাৰ্যৰ প্ৰধান কাৰণ দুটা। প্ৰথমটো কাৰণ, আদানি আৰু আম্বানিক মাটি বিক্ৰী কৰা আৰু দ্বিতীয় কাৰণটো হ’ল নিজৰ পৰিয়ালৰ নামত চাহ বাগান খোলা, ৰিজৰ্ট স্থাপন কৰা। চাহ বাগান, ৰিজৰ্ট আদি স্থাপনৰ জৰিয়তে ক’লা ধন বগা কৰাৰ প্ৰক্ৰিয়াটো যুক্ত হৈ থকা বুলি দাবী কৰে সাংসদ গৌৰৱ গগৈয়ে। তেওঁ কয়, “পূৰ্বতে প্ৰধানমন্ত্ৰী মোডীয়ে ক’লা ধন বিদেশৰ পৰা ঘূৰাই অনা হ’ব বুলি দম্ভালি মাৰিছিল। কিন্তু এতিয়া ক’লা ধনৰ সন্দৰ্ভত মোদীৰ মন্তব্য লঘু আৰু বিপৰীত।” প্ৰধানমন্ত্ৰীৰ মন্তব্য সদায়ে পৰিস্থিতি অনুসৰি সলনি হৈ থাকে বুলিও কটাক্ষ কৰে সাংসদ গগৈয়ে।

অতি সম্প্ৰতি গুৱাহাটী মহানগৰৰ কৃত্ৰিম বানপানীৰ সমস্যাক লৈ সাংসদ গৌৰৱ গগৈয়ে কয় যে, কেন্দ্ৰীয় গৃহমন্ত্ৰী অমিত শ্বাহে অসমৰ বান সমস্যা ডাঙৰ ডাঙৰ পুখুৰী খান্দিলেই সমাধান হ’ব বুলি যি সমাধান সূত্ৰ দিছিল সেই সূত্ৰ ক’ৰবাত প্ৰযোজ্য হোৱাৰ উদাহৰণ দিয়ক। গৃহমন্ত্ৰীৰ নিয়ন্ত্ৰণত থকা ৰাষ্ট্ৰীয় দুৰ্য়োগ প্ৰশমন বিভাগটোৱে দেশৰ আন ৰাজ্যত বানপানীৰ সময়ত যি ধৰণেৰে কেন্দ্ৰীয় সাহায্যৰ পুঁজি মোকলাই দিয়ে, তেনেদৰে অসমৰ ক্ষেত্ৰতো পৰ্যাপ্ত সাহায্য আদি মোকলাই দিয়াৰ ব্যৱস্থা কৰক। প্ৰয়োজন হ’লে অধিক পুঁজি মোকলাই দিয়াৰ পদক্ষেপ গ্ৰহণ কৰিবলৈ আহ্বান জনাই গৌৰৱ গগৈয়ে। বানপানী, কৃত্ৰিম বানপানীৰ বাবে হোৱা ক্ষয়-ক্ষতি সন্দৰ্ভত কেন্দ্ৰীয় গৃহমন্ত্ৰীগৰাকীক নিজৰ স্থিতি স্পষ্ট কৰিবলৈকো দাবী জনায় গৌৰৱ গগৈয়ে।

অসমৰ গৰাখহনীয়া অসমবাসীৰ বাবে এক ডাঙৰ, প্ৰত্যাহ্বানমূলক সমস্যা হৈ থিয় দিছে বুলি কৈ অসমৰ বানপানী, গৰাখহনীয়াক ৰাষ্ট্ৰীয় সমস্যাৰূপে স্বীকৃতি প্ৰদান কৰাৰ পদক্ষেপ ল’ব লাগে বুলি সাংসদ গৌৰৱ গগৈয়ে দাবী উত্থাপন কৰে। সংবাদমাধ্যমৰ আগত সাংসদ গৌৰৱ গগৈয়ে তীব্ৰ ক্ষোভ প্ৰকাশ কৰি কয় যে, অসমৰ আন্তঃগাথনি নিৰ্মাণৰ নামত বৃহৎ বনাঞ্চল, পাহাৰ আদি কাটি পেলোৱা হৈছে। প্ৰকৃততে অসমত আন্তঃগাথনিৰ উন্নয়ন হোৱা নাই, পাৰিপাৰ্শ্বিক ভাৰসাম্যযুক্ত উন্নয়ন হোৱা নাই, ঠিকাদাৰকেন্দ্ৰিক উন্নয়নহে অসমত হৈছে বুলি অভিযোগ কৰে গৌৰৱ গগৈয়ে।

আগন্তক বিধানসভাৰ নিৰ্বাচনত বিৰোধী ৰাজনৈতিক দলৰ মিত্ৰতাৰ প্ৰসংগত সাংসদ গৌৰৱ গগৈয়ে কয় যে, মিত্ৰতা মানেই কেৱল নিৰ্বাচনত প্ৰতিদ্বন্দিতাৰ বাবে আসনৰ দৰদাম নহয়। প্ৰকৃতপক্ষে প্ৰতিটো ৰাজনৈতিক দলৰ তৃণমূল পৰ্যায়ত সাংগঠনিক ভেঁটি কিমান সবল, নিৰ্বাচনীত বিজয়ী হোৱাৰ বাবে প্ৰয়োজনীয় দফা, চৰ্ত আদিৰ বাস্তৱ ভিত্তি আছে নে নাই সকলো পুংখানুপুংখভাৱে পৰ্যালোচনা কৰাৰ অন্ততহে আসনৰ বুজাবুজি হ’ব পাৰে। কিন্তু তাৰ পূৰ্বেই আসন দাবী কৰাতো অযুক্তিকৰ। নিৰ্বাচনী মিত্ৰতাৰ নামত আসন দাবী কৰি কোনো পূৰ্বচৰ্ত আৰোপ কৰাটো গ্ৰহণযোগ্য নহয় বুলিও কয় গগৈয়ে। অৱশ্যে এই সন্দৰ্ভত কোনো ৰাজনৈতিক দলৰ নাম লোৱাৰ পৰা বিৰত থাকে সাংসদগৰাকী।

আজি আয়োজিত সংবাদমেলত অসম বিধানসভাৰ বিৰোধী দলৰ দলপতি দেৱব্ৰত শইকীয়াই অংশগ্ৰহণ কৰি কয় যে, অসম চুক্তি ৰূপায়নৰ দিশত কেন্দ্ৰীয় চৰকাৰে পিঠি দিছে। আনকি শেহতীয়াকৈ সংসদৰ মজিয়াত অসম চুক্তি ৰূপায়নৰ দায়িত্ব তেওঁলোকৰ নহয় বুলি মন্তব্য কৰি সমগ্ৰ বিষয়টোৰ পৰা পলায়ন কৰিব বিচাৰিছে। ইয়াৰ বাবে বিজেপি মিত্ৰজোঁটৰ চৰকাৰৰ অংশীদাৰ হিচাপে অগপ দলে কৈফিয়ৎ তলৱ কৰিব লাগে বুলিও কয় শইকীয়াই।

তেওঁ কয় যে, ছবছৰীয়া অসম আন্দোলনৰ পৰিশেষত সম্পাদন হোৱা অসম চুক্তিখন ৰূপায়নৰ ক্ষেত্ৰত কেন্দ্ৰীয় চৰকাৰৰ গৃহমন্ত্ৰণালয়ৰ দায়িত্ব থাকিব বুলি স্পষ্টৰূপত লিপিবদ্ধ হৈ থকাৰ পাছতো স্বয়ং লোকসভাৰ মজিয়াত ওলোটাখৰ মাৰিলে বিজেপিয়ে। অসম চুক্তি ৰূপায়ণৰ বেলিকা বিজেপি চৰকাৰখনে বাৰম্বাৰ বিপৰীত স্থিতি গ্ৰহণ কৰাৰ বাবে বিজেপিক অগপ দলে মুকলিকৈ প্ৰশ্ন কৰিব লাগে বুলি কয় বিৰোধী দলপতি গৰাকীয়ে।

“গুৱাহাটীৰ লগতে অসমৰ বানপানীৰ সমস্যা সমাধান কৰাৰ নিৰ্বাচনী প্ৰতিশ্ৰুতি আছিল বিজেপিৰ, কিন্তু সেই প্ৰতিশ্ৰুতি আজিও অসাৰ হৈয়ে ৰ’ল। অসমৰ গুৱাহাটীখনক স্মাৰ্ট চিটি হিচাপে নিৰ্মাণ কৰিবলৈ হাজাৰ হাজাৰ কোটি টকা আনি আজিও স্মাৰ্টচিটি কৰিব পৰা নাই গুৱাহাটীক।” এইদৰে কয় দেৱব্ৰত শইকীয়াই।

ইফালে, অসমৰ খিলঞ্জীয়া ভূমিপুত্ৰ জাতি-জনগোষ্ঠীৰ লোকক বলপূৰ্বকভাবে যি দৰে পৰ্বতঝোৰাত, বৰদোৱা, কাৰ্বি আংলং, ডিমাহাচাও, মিকিৰ বামুণী গ্ৰাণ্ট আদিত উচ্ছেদ কৰি বিজেপিয়ে থলুৱা লোকক গৃহহীন কৰিলে সেই বিষয়টো কেন্দ্ৰীয় গৃহমন্ত্ৰী অমিত শ্বাহে স্থিতি স্পষ্ট কৰক বুলি দাবী কৰে বিৰোধী দলপতিগৰাকীয়ে।

উল্লেখ্য যে, বিজেপি মন্ত্ৰী অশোক সিংহলে কংগ্ৰেছ দলটোক জন্তু বুলি ৰাজহুৱাভাৱে কৰা মন্তব্যৰ বিৰুদ্ধে জাঙুৰ খাই উঠিছে বিৰোধী দলপতি দেৱব্ৰত শইকীয়া। বিৰোধী দলপতি গৰাকীয়ে কয় যে, এটা ঐতিহাসিক ৰাজনৈতিক দল হিচাপে কংগ্ৰেছৰ সুকীয়া আৰু মৰ্যদাপূৰ্ণ ইতিহাস আছে। ইয়াৰ পাছতো অসমৰ এগৰাকী দায়িত্বশীল মন্ত্ৰী হিচাপে অশোক সিংহলে কংগ্ৰেছ দলটোক জন্তুৰূপে অভিহিত কৰাতো অৰুচিকৰ, অভদ্ৰতাৰ পৰিচায়ক। মানসিক ভাৰসাম্যহীন হ’লেহে এনেধৰণৰ মন্তব্য কৰিব পাৰে বুলি কয় বিৰোধী দলপতি শইকীয়াই।

তেওঁ কয় যে, ভাৰতীয় সংবিধানৰ নামত শপত লোৱাৰ পাছত এজন নিৰ্বাচিত জনপ্ৰতিনিধিয়ে কংগ্ৰেছক জন্তুৰ লগত তুলনা কৰাতো গুৰুতৰ অপৰাধ আৰু অপমানজনক কথা। ইয়াৰ বাবে মুখ্যমন্ত্ৰীয়েও অসমৰ জনগণৰ ওচৰত ক্ষমা বিচাৰক বুলি দাবী কৰে দেৱব্ৰত শইকীয়াই। তদুপৰি মন্ত্ৰী অশোক সিংহলৰ ওপৰত আইনী ব্যৱস্থাত অনুশাসনমূলক পদক্ষেপ গ্ৰহণৰ বাবে আইনজ্ঞৰ সৈতে আলোচনা কৰা বুলিও বিৰোধী দলপতিগৰাকীয়ে কয়। অশোক সিংহলক ক্ষমা খুজিবলৈকো দাবী জনাই বিৰোধী দলপতি দেৱব্ৰত শইকীয়াই।