হাতত নাই ধন, নিৰ্বাচন খেলিবলৈ গুৱাহাটীত থকা মাটি বিক্ৰী কৰিছে হাগ্ৰামা মহিলাৰীয়ে!

বড়োভূমিত এতিয়া নিৰ্বাচনৰ বতাহ। প্ৰতিটো দলেই নামি পৰিছে ব্যাপক নিৰ্বাচনী প্ৰচাৰত। পুনৰ এবাৰ বিটিআৰৰ ক্ষমতা দখলৰ লক্ষ্যৰে জোৰদাৰ প্ৰচাৰ চলাইছে বড়োলেণ্ড পিপ’লছ ফ্ৰণ্ট, চমুকৈ বিপিএফৰ মুৰব্বী হাগ্ৰামা মহিলাৰীয়ে। আজি দিহিৰা পৰিষদীয় সমষ্টিৰ ডুমুনীত বিপিএফ প্ৰধান হাগ্ৰামা মহিলাৰীয়ে দলীয় প্ৰাৰ্থী আগষ্টুচ তিগ্গাৰ হৈ বিশাল নিৰ্বাচনী সভাত অংশ লয়। এই নিৰ্বাচনী সভাত হাগ্ৰামা মহিলাৰীয়ে কৰা কেতবোৰ বিশেষ মন্তব্যই ব্যাপক চৰ্চা লাভ কৰিছে।

আজি নিৰ্বাচনী সভাত বিপিএফৰ মুৰব্বী হাগ্ৰামা মহিলাৰীয়ে উল্লেখ কৰা মতে নিৰ্বাচন খেলিবলৈ তেওঁ নিজৰ মাটি বিক্ৰী কৰিবলগা হৈছে। নিজ ভাষণত হাগ্ৰামা মহিলাৰীয়ে সদৰী কৰা মতে তেওঁ নিৰ্বাচনত ব্যৱহাৰ কৰা হেলিকপ্টাৰৰ ভাৰা দিব পৰা নাই। এনে পৰিস্থিতিত তেওঁ গুৱাহাটী মহানগৰীত চাৰে চাৰি বিঘা মাটি বিক্ৰী কৰিব বুলি উল্লেখ কৰে।

হাগ্ৰামা মহিলাৰীয়ে জানিবলৈ দিয়া মতে গুৱাহাটীত থকা তেওঁৰ এই চাৰে চাৰি বিঘা মাটি তেওঁ ২২ কোটি টকাত বিক্ৰী কৰিব। ভূমি বিক্ৰী কৰি উপাৰ্জন কৰা ২২ কৌটি টকাৰে নিৰ্বাচন আৰু হেলিকেপ্টাৰৰ খৰচ বহন কৰিব বুলিও হাগ্ৰামা মহিলাৰীয়ে ভাষণত কয়। দলে এই আৰ্থিক সমস্যাত ভুগি থাকিলেও পিছে আগন্তুক নিৰ্বাচনত বিপিএফক কোনো দলেই ক্ষতি কৰিব নোৱাৰে বুলিও হাগ্ৰামা মহিলাৰীয়ে স্পষ্ট দাবী কৰে।

ভাষণত বিপিএফ প্ৰধানগৰাকীয়ে লগতে ইউপিপিএলৰ মুৰব্বী প্ৰমোদ বড়োকো তীক্ষ্ণ কটাক্ষ কৰে। প্ৰমোদ বড়োৱে আজিলৈকে নিজৰ সমষ্টিয়ে বাচনি কৰিব পৰা নাই বুলি কটাক্ষ কৰি হাগ্ৰামা মহিলাৰীয়ে লগতে প্ৰমোদ বড়োৱে মহিলা সকলক বেয়াকৈ ঠগাইছে বুলিও দাবী কৰে। তেওঁৰ মতে, প্ৰমোদ বড়োৰ মিটিঙত ৫০০ টকা দিলে ৰাইজ যায় যদিও দলটোক পিছে ভোট নিদিয়ে।

তেওঁ লগতে বিটিআৰত বিপিএফৰে চৰকাৰ হ’ব বুলিও দৃঢ় দাবী কৰে। “বিপিএফে চৰকাৰ গঠন কৰিবই, গতিকে নাচ গান কৰি ফূৰ্তি কৰিছো।”- এই মন্তব্য হাগ্ৰামা মহিলাৰীৰ। তেওঁৰ মতে, ৰাইজৰ বিপিএফৰ ওপৰত  নিশ্চয় কিবা এটা আশা আছে। ৰাইজৰ সেই আশা পূৰণ কৰিব নোৱাৰিলে তেওঁ পুনৰ ৰাইজৰ ওচৰলৈ নাহে বুলিও মন্তব্য কৰে বিপিএফ প্ৰধান হাগ্ৰামা মহিলাৰীয়ে।