পলকতে পঢ়ক দিনটোৰ ৯ টা শীৰ্ষ খবৰ…

কেন্দ্ৰীয় গৃহমন্ত্ৰীয়ে ৰাজভৱনৰ নৱনিৰ্মিত ব্ৰহ্মপুত্ৰ উইং উদ্বোধন কৰাৰ পৰা আৰম্ভ কৰি প্ৰধানমন্ত্ৰী মোদীৰ জাপান ভ্ৰমণলৈকে আজি বহু গুৰুত্বপূৰ্ণ খবৰে শিৰোনাম দখল কৰিছে। চাওঁ আহক দিনটোৰ কেইটামান গুৰুত্বপূৰ্ণ খবৰ।

দিনটোৰ শীৰ্ষ খবৰ

1. গুৱাহাটীত ৰাজভৱনৰ নৱনিৰ্মিত ব্ৰহ্মপুত্ৰ উইং উদ্বোধন কেন্দ্ৰীয় গৃহমন্ত্ৰী অমিত শ্বাহৰ। ইয়াৰ লগতে ৪৫ কোটি টকা ব্যয় সাপেক্ষে দেৰগাঁৱৰ লাচিত বৰফুকন পুলিচ একাডেমীত স্থাপন কৰা ৰাষ্ট্ৰীয় চাইবাৰ ফৰেনছিক লেবৰেটৰীও ভাৰ্চুৱেলী উদ্বোধন কৰে অমিত শ্বাহে। ইয়াৰ লগতে আন কেবাটাও প্ৰকল্পৰ শুভাৰম্ভ আৰু শিলান্যাস কৰে কেন্দ্ৰীয় গৃহমন্ত্ৰীগৰাকীয়ে।
2. গুৱাহাটীৰ পৰাই ৰাহুল গান্ধীক তীব্ৰ কটাক্ষ অমিত শ্বাহৰ। প্ৰধানমন্ত্ৰী নৰেন্দ্ৰ মোদী আৰু তেওঁৰ প্ৰয়াত মাতৃ সন্দৰ্ভত কৰা কটু মন্তব্যৰ বাবে ৰাহুলক ক্ষমা খুজিবলৈ কয় গৃহমন্ত্ৰীগৰাকীয়ে। তাৰোপৰি ৰাহুল গান্ধীয়ে দেশত ঘৃণাৰ ৰাজনীতি আৰম্ভ কৰিছে বুলিও অভিযোগ কৰে শ্বাহে। ৰাহুলৰ ভোটাৰ অধিকাৰ যাত্ৰাক ঘুচপেঠী বাচাও অভিযান বুলি কটাক্ষ।
3. গুৱাহাটীত পঞ্চায়ত প্ৰতিনিধিৰ সন্মিলনত অংশ লৈ গৌৰৱ গগৈক তীব্ৰ আক্ৰমণ অমিত শ্বাহৰ। সঘনাই পাকিস্তান ভ্ৰমণ কৰা লোকে অসমক নেতৃত্ব দিব নোৱাৰে বুলি মন্তব্য কৰে গৃহমন্ত্ৰীগৰাকীয়ে। একে সময়তে তেওঁ কয় যে, অনুপ্ৰৱেশকাৰী আৰু বেদখলকাৰীৰ প্ৰতি সহানুভূতি থকা নেতাই ৰাজ্যখনক প্ৰতিনিধিত্ব কৰিব নোৱাৰে।
4. অমিত শ্বাহৰ অসম ভ্ৰমণৰ বিৰোধিতাৰে ৰাজ্যৰ ভিন্ন স্থানত প্ৰতিবাদ টাই আহোম যুৱ পৰিষদৰ। টাই আহোমক জনজাতিকৰণৰ ক্ষেত্ৰত কেন্দ্ৰীয় চৰকাৰে চূড়ান্ত প্ৰতাৰণা কৰাৰ অভিযোগ সংগঠনটোৰ। উজনিৰ কেবাখনো জিলাত ক’লা পতাকা প্ৰদৰ্শন কৰে সংগঠনটোৰ একাংশ প্ৰতিবাদকাৰীয়ে।
5. হিমন্ত বিশ্ব শৰ্মা আৰু অমিত শ্বাহক ৰাইজৰ আগত আঁঠু লৈ ক্ষমা খোজা দাবী অখিল গগৈৰ। কেন্দ্ৰীয় গৃহমন্ত্ৰী অমিত শ্বাহে অসমবাসীক দিয়া প্ৰতিশ্ৰুতি পালন কৰাত ব্যৰ্থ হোৱাৰ অভিযোগ বিধায়কগৰাকীৰ। বানমুক্ত আৰু বিদেশীমুক্ত অসমৰ প্ৰতিশ্ৰুতি দিয়া অমিত শ্বাহে সমস্যা সমাধানৰ বিপৰীতে ভোজ-ভাত খাবলৈহে অসমলৈ অহা বুলি কটাক্ষ অখিল গগৈৰ।
6. নগাঁৱৰ কেন্দ্ৰীয় কাৰাগাৰত চলে ড্ৰাগছৰ বেহা। জিলা আয়ুক্ত দেৱাশিস শৰ্মাৰ আকম্মিক পৰিদৰ্শনত উন্মোচন ভয়ংকৰ তথ্য। দুই নিৰাপত্তাৰক্ষীয়ে কয়দীক ড্ৰাগছ যোগান ধৰাৰ অভিযোগ। চেলিম নামৰ এটা কয়দীয়ে কাৰাগাৰৰ ভিতৰত চলাই আছে ড্ৰাগছৰ বেহা। কাৰাগাৰৰ অধীক্ষকৰ ছত্ৰছাঁয়াত নিষিদ্ধ বেহা চলাৰ অভিযোগ। বিভাগীয় কৰ্তৃপক্ষক সবিশেষ অৱগত কৰিছে জিলা আয়ুক্তই।
7. উমৰাছুৰ কয়লা খনিত সংঘটিত শোকাৱহ শ্ৰমিকৰ মৃত্যুৰ ঘটনাৰ বাবে এজনীয়া তদন্ত কমিটী গঠন। গুৱাহাটী উচ্চ ন্য়ায়ালয়ৰ অৱসৰপ্ৰাপ্ত ন্যায়াধীশ অনিমা হাজৰিকাৰ নেতৃত্বত গঠন কৰা হৈছে এই এজনীয়া তদন্ত সমিতি। বিগত বৰ্ষত ডিমা হাছাও জিলাৰ উমৰাংছুৰ কয়লাখনিত সংঘটিত এক শোকাৱহ ঘটনাত আৱদ্ধ হৈ পৰিছিল বহু কেইজন শ্ৰমিক। বহু প্ৰচেষ্টাৰ অন্তত চাৰিজন শ্ৰমিকৰ মৃতদেহ উদ্ধাৰ কৰা হয় যদিও আন কেবাজনো শ্ৰমিকৰ কোনো সন্ধান পোৱা নগ’ল।
8. কেন্দ্ৰীয় গৃহমন্ত্ৰী অমিত শ্বাহ সন্দৰ্ভত এক আপত্তিজনক বক্তব্য কৰিছে তৃণমূল কংগ্ৰেছৰ সাংসদ মহুৱা মৈত্ৰই। সকলো সীমা অতিক্ৰম কৰি মহুৱাই কয় যে গৃহমন্ত্ৰীৰ মূৰটো কাটি টেবুলত থৈ দিব লাগে। পশ্চিম বংগত অবৈধ অনুপ্ৰৱেশকাৰীৰ সৈতে জড়িত কাৰ্য সন্দৰ্ভত এই বক্তব্য কৰিছে মহুৱাই। ভাষণত তেওঁ যুক্তি আগবঢ়ায় যে অবৈধ অনুপ্ৰৱেশৰ দায়িত্ব সম্পূৰ্ণৰূপে কেন্দ্ৰীয় চৰকাৰ আৰু ইয়াৰ সংস্থাসমূহৰ। বিএছএফকো কটাক্ষ মহুৱাৰ।
9. ভাৰত-জাপান সন্মিলনত অংশ লোৱাৰ উদ্দেশ্যে জাপানত উপস্থিত প্ৰধানমন্ত্ৰী মোদী। উপস্থিত হোৱাৰ পাছতেই এক ব্যৱসায়িক সন্মিলনত অংশ লৈ জাপানৰ ব্যৱসায়ীক ভাৰতলৈ আমন্ত্ৰণ জনায় মোদীয়ে। ভাৰতৰ উত্তৰণত জাপানৰ অৱদান থকা বুলি কয় প্ৰধানমন্ত্ৰীয়ে। ইফালে চন্দ্ৰযান-৫ অভিযানৰ বাবেও জাপানৰ মহাকাশ গৱেষণা সংস্থাৰ সৈতে সহযোগিতাৰ কথা উল্লেখ কৰে নৰেন্দ্ৰ মোদীয়ে।