গোলাপ বৰবৰাৰ সমাজবাদ ভাৰতীয় প্ৰমূল্যবোধৰ আধাৰ, প্ৰয়াত প্রাক্তন মুখ্যমন্ত্রীগৰাকীৰ জন্ম-শতবার্ষিকী উদযাপন অনুষ্ঠানত মুখ্যমন্ত্ৰীৰ ভাষণ

অসমৰ প্ৰাক্তন মুখ্যমন্ত্রী প্রয়াত গোলাপ বৰবৰাৰ জন্ম-শতবার্ষিকী উদযাপন উপলক্ষে শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তর্জাতিক প্রেক্ষাগৃহত কেন্দ্ৰীয় গৃহমন্ত্রী অমিত শ্বাহৰ উপস্থিতিত অনুষ্ঠিত অনুষ্ঠানত মুখ্যমন্ত্রী ড° হিমন্ত বিশ্ব শৰ্মাই অংশগ্ৰহণ কৰে। এই সভাৰ ভাষণত মুখ্যমন্ত্রী ড° শৰ্মাই স্বাধীনতা সেনানী, প্রাক্তন মুখ্যমন্ত্রী প্রয়াত গোলাপ বৰবৰালৈ অসমবাসীৰ হৈ গভীৰ শ্ৰদ্ধা নিবেদন কৰে।

মুখ্যমন্ত্ৰী শর্মাই কয়, “কেন্দ্রীয় গৃহমন্ত্রী অমিত শ্বাহৰ উপস্থিতি আমাৰ বাবে এক বিশেষ অনুপ্ৰেৰণাৰ উৎস কাৰণ ই আমাক সোঁৱৰাই দিয়ে যে গোলাপ বৰবৰা নামটো কেৱল অসমৰ সীমাৰ ভিতৰতে সীমাবদ্ধ নহয়- ভাৰতবৰ্ষৰ মূল্যবোধৰ ৰাজনীতি আৰু ৰাষ্ট্ৰৰ গণতান্ত্রিক প্ৰমূল্যবোধ ৰক্ষাৰ সংগ্ৰামৰ ইতিহাসতো বৰবৰাদেৱৰ নাম স্বর্ণিল আখৰেৰে জিলিকি আছে।” মুখ্যমন্ত্ৰীয়ে কয় যে, ১৯৭৮ চনত অসমৰ প্ৰথম অকংগ্ৰেছী মুখ্যমন্ত্রী হিচাপে গোলাপ বৰবৰাৰ উত্থানে অসমৰ ৰাজনীতিত এক যুগান্তকাৰী পৰিৱৰ্তনৰ সূচনা কৰিছিল।

তেওঁ কয়, “সততা, নৈতিকতা আৰু আপোচবিহীন সাহসৰ জৰিয়তে বৰবৰাই প্ৰতিষ্ঠা কৰিছিল এক নতুন ৰাজনৈতিক চিন্তাধাৰা য’ত ক্ষমতা মানে সুবিধা নহয়, পদ মানে স্বার্থ নহয়, শাসন মানে শোষণ নহয়- নিঃস্বার্থ জনসেৱাই হ’ল য’ত ৰাজনীতিৰ সৰলতম পৰিভাষা।” তেওঁ লগতে কয় যে, পৰিয়ালৰ পৰা উত্তৰাধিকাৰ সূত্রে প্রাক্তন মুখ্যমন্ত্ৰী বৰবৰাই লাভ কৰিছিল জাতীয়তাবাদী চেতনা আৰু শ্ৰমিকৰ অধিকাৰৰ প্ৰতি দায়বদ্ধ মনোভাৱ। এই চেতনা আৰু আদর্শই তেওঁক অন্যায়ৰ বিৰুদ্ধে আপোচবিহীন এক অদম্য সত্তা হিচাপে গঢ় দিছিল।

“১৯৫০ চনৰ গোলাঘাটৰ বিখ্যাত ঘিলাধাৰী ছ’চিয়েলিষ্ট কৃষক সত্যাগ্রহ আন্দোলনত অসমৰ অন্যান্য ছ’চিয়েলিষ্ট নেতাসকলৰ লগতে গোলাপ বৰবৰায়ো সহযোগিতা আগবঢ়োৱাৰ কথা উল্লেখ কৰি মুখ্যমন্ত্রীয়ে কয় যে অসমত অসমীয়া ভাষাৰ দাবীত হোৱা আন্দোলনতো তেওঁ কাৰাবাস খাটিছিল। তেওঁ লগতে উল্লেখ কৰে যে ১৯৫৭ চনৰ ১৮ আগষ্টত প্রথম তেল শোধনাগাৰ সত্যাগ্রহতো প্রয়াত বৰবৰাই সত্যাগ্রহীৰ প্ৰথমটো দলক নেতৃত্ব দি গ্ৰেপ্তাৰবৰণ কৰিছিল আৰু ৬ মাহৰ বাবে কাৰাবাস খাটিছিল।” এইদৰে কয় মুখ্যমন্ত্ৰী শৰ্মাই।

তেওঁ কয় যে,দেশত ঘোষিত জৰুৰীকালীন অৱস্থাৰ সময়ত দেশৰ সৰ্বস্তৰৰ প্রধান নেতাসকলৰ লগতে গোলাপ বৰবৰাকো বন্দী কৰি কাৰাগাৰত ৰখাৰ কথা উল্লেখ কৰি মুখ্যমন্ত্ৰীয়ে কয় যে গোলাপ বৰবৰাক ডিব্ৰুগড় জিলা আৰক্ষী থানাৰ লক-আপত কদর্যময় পৰিবেশত ৰখা হৈছিল। এইদৰে অপৰিসীম শাস্তিৰ মাজত কাৰাগাৰত কটোৱা তেওঁৰ সেই ১৯ টা মাহ অসমৰ যিকোনো বিৰোধী নেতাৰ ভিতৰত সৰ্বাধিক দীঘলীয়া আৰু ই গণতান্ত্রিক স্বাধীনতাৰ প্ৰতি তেওঁৰ অবিচল সংকল্পৰ প্ৰতীক হিচাপে ইতিহাসত অমৰ হৈ আছে।

অনুষ্ঠানত মুখ্যমন্ত্রীয়ে প্রয়াত বৰবৰাৰ কৰ্মময় জীৱন আৰু ৰাজ্যৰ সমাজ জীৱনৰ প্ৰতি তেওঁ আগবঢ়াই যোৱা বিভিন্ন অৱদানৰাজিক আলোকপাত কৰে। ড° শর্মাই কয় যে, গোলাঘাট জিলাৰ দৈয়াং অঞ্চলৰ ৰাইজৰ সমস্যা আৰু অসম-নাগালেণ্ড সীমান্ত সমস্যা সমাধানৰ দাবী উত্থাপনেৰে দেশৰ উচ্চ সদনত আলোচনা কৰি অসমৰ ৰাইজৰ স্বাৰ্থত বক্তৃতা প্ৰদান কৰা বৰবৰাই আছিল অসমৰ প্ৰথমজন সাংসদ।

লগতে ভাষণত মুখ্যমন্ত্রীয়ে কয় যে, ১৯৭৮ চনৰ মাৰ্চ মাহত গোলাপ বৰবৰা মুখ্যমন্ত্রী পদত অধিষ্ঠিত হোৱাৰ লগে লগে অসমত কংগ্ৰেছ শাসনৰ ধাৰাবাহিকতা ভংগ হৈছিল। ক্ষমতা কেৱল এটা দলৰেই একচেতিয়া অধিকাৰ বুলি জনসাধাৰণে লাহে লাহে বিশ্বাস কৰিবলৈ ধৰা ধাৰণাৰ অসাৰতা প্ৰমাণ কৰি বৰবৰাই কংগ্ৰেছৰ একাধিপত্যৰ শৃংখল ভাঙিছিল বুলিও তেওঁ মন্তব্য কৰে।

অনুষ্ঠানত মুখ্যমন্ত্রীয়ে লগতে কয় যে,প্রয়াত গোলাপ বৰবৰাৰ চৰকাৰে প্ৰৱৰ্তন কৰা বিনামূলীয়া শিক্ষা, স্বাস্থ্যসেৱাকে ধৰি ১০ বিঘা পর্যন্ত ভূমিৰ ৰাজহ বিলুপ্ত কৰাৰ বাবে গ্রহণ কৰা সিদ্ধান্ত এক বৃহৎ সংস্কাৰমূলক পদক্ষেপ আছিল বুলিও মুখ্যমন্ত্রীয়ে মন্তব্য কৰে। তেওঁ লগতে কয় যে অসমীয়া যুৱক-যুৱতীসকলৰ দীৰ্ঘদিনীয়া দাবী পূৰণ কৰি বৰবৰাৰ চৰকাৰে বেংকিং সেৱা নিযুক্তি ব’ৰ্ড আৰু উত্তৰ-পূব সীমান্ত ৰে’লৱে নিযুক্তি ব’র্ডো অসমলৈ আনিবলৈ সক্ষম হৈছিল। অসমৰ প্ৰথমটো আঞ্চলিক পাছপর্ট কাৰ্যালয়ৰ ব্যৱস্থা কৰাটো প্ৰাক্তন মুখ্যমন্ত্ৰী বৰবৰাৰ অন্যতম উল্লেখযোগ্য সফলতা আছিল বুলি কয় মুখ্যমন্ত্ৰীয়ে।

মুখ্যমন্ত্ৰীয়ে উল্লেখ কৰে যে, প্ৰয়াত বৰবৰাৰ সমাজবাদ শ্ৰেণী সংগ্ৰামৰ পৰা ধাৰ কৰা ধাৰণাৰ ওপৰত প্রতিষ্ঠিত নাছিল, ই আছিল ত্যাগ আৰু সততাৰ জীৱন্ত প্রতীক। নিজৰ সমাজবাদী দর্শনক প্রাক্তন মুখ্যমন্ত্ৰীগৰাকীয়ে প্রায়ে “ত্যাগৰ সমাজবাদ” বুলি অভিহিত কৰিছিল। গোলাপ বৰবৰাৰ সমাজবাদ আত্মনিৰ্ভৰশীলতা, গণতন্ত্র আৰু ত্যাগৰ পৰম্পৰাত শিপাই থকা ভাৰতীয় প্ৰমূল্যবোধৰ আধাৰত গঢ় লোৱা বিশুদ্ধ ৰাষ্ট্ৰবাদ আছিল বুলি মন্তব্য কৰে মুখ্যমন্ত্রী ড° শৰ্মাই।

ভাষণত মুখ্যমন্ত্ৰীয়ে উল্লেখ কৰে যে গোলাপ বৰবৰাৰ শাসনকালতে মঙলদৈৰ সাংসদ হীৰালাল পাটোৱাৰীৰ মৃত্যু হৈছিল। সাংসদগৰাকীৰ মৃত্যুৰ পিছত অসমৰ ভোটাৰ তালিকা বিদেশীমুক্ত কৰাৰ বাবে প্ৰাক্তন মুখ্যমন্ত্ৰীগৰাকীয়ে প্রয়াস চলাই ৪৭ হাজাৰ ভোটাৰৰ নাম পৰীক্ষাৰ বাবে বাচনি কৰিছিল আৰু সেইসকল ভোটাৰৰ ৩৬ হাজাৰেই বিদেশী বুলি তদানীন্তন চৰকাৰখনে চিনাক্ত কৰিছিল। ইয়াৰ পিছতে অসম আন্দোলনৰ অগ্নি জ্বলিবলৈ আৰম্ভ কৰিছিল বুলি কয় মুখ্যমন্ত্ৰীয়ে।

তেওঁ কয় যে, অসমৰ বনজ সম্পদ ৰক্ষাৰ বাবে প্লাইউড কাৰখানা বন্ধ কৰাকে ধৰি গোলাপ বৰবৰাই গ্রহণ কৰা বহু সিদ্ধান্তই বিভিন্ন পক্ষক অসন্তুষ্ট কৰিছিল যদিও সৰ্বসাধাৰণৰ বাবে এই সিদ্ধান্তসমূহ আছিল সুদূৰপ্ৰসাৰী। মুখ্যমন্ত্ৰীয়ে কয় যে প্রয়াত বৰবৰাই অসমৰ ৰাজনীতি আৰু সমাজ জীৱনলৈ পর্বতসম অৱদান আগবঢ়াই গৈছে। কিন্তু অসমৰ ইতিহাসে তেওঁক যিকোনো কাৰণতে যি পৰ্যায়ত ৰাখিব লাগিছিল, সেই পৰ্যায়ত ধৰি ৰখা নাছিল। গোলাপ বৰবৰাৰ কৰ্মৰাজিৰ আলোচনা, তেওঁৰ ১৮ মহীয়া চৰকাৰখনৰ প্ৰভাৱৰ বিষয়ে যথেষ্ট আলোচনা হোৱা নাই বুলিও মন্তব্য কৰে মুখ্যমন্ত্রী ড° শর্মাই। গোলাপ বৰবৰাই অসম আন্দোলনক সম্পূর্ণ সমর্থন কৰিছিল বুলিও তেওঁ কয়।

গোলাপ বৰবৰাৰ শাসনকাল আৰু সমাজ জীৱনৰ প্রতি তেওঁৰ বৰঙণি আদিৰ বিষয়ে অধিক আলাপ-আলোচনা হোৱাৰো মুখ্যমন্ত্রী ড° শৰ্মাই পোষকতা কৰে। এই জন্ম-শতবার্ষিকী উদযাপন অনুষ্ঠানে শৈক্ষিক আৰু বৌদ্ধিক জগতখনক প্ৰাক্তন মুখ্যমন্ত্ৰীগৰাকীৰ বিষয়ে অধ্যয়ন কৰিবলৈ উদ্বুদ্ধ কৰিব বুলিও মন্তব্য কৰি তেওঁ কয় যে, গোলাপ বৰবৰাৰ সোঁৱৰণত অসম চৰকাৰে ৰাজ্যিক গ্রামোন্নয়ন প্রতিষ্ঠানক নামকৰণ কৰিছে। প্রাক্তন মুখ্যমন্ত্ৰীগৰাকীৰ আদৰ্শৰাজিক জীয়াই ৰখাৰ বাবে চৰকাৰে অনাগত সময়তো প্রচেষ্টা গ্রহণ কৰিব বুলিও তেওঁ কয়।