নগাঁও কেন্দ্ৰীয় কাৰাগাৰত কি চলে? জিলা আয়ুক্তৰ পৰিদৰ্শনত ফাদিল চাঞ্চল্যকৰ তথ্য

কাৰাগাৰত ড্ৰাগছৰ অবাধ বেহা। নগাঁও জিলাৰ আয়ুক্তৰ পৰিদৰ্শন কালত ফাদিল এই ভয়ংকৰ তথ্য। খবৰ অনুসৰি, আজি শুকুৰবাৰে জিলা আয়ুক্ত দেৱাশীষ শৰ্মাই আকস্মিকভাৱে পৰিদৰ্শন কৰে নগাঁও কেন্দ্ৰীয় কাৰাগাৰ। এই পৰিদৰ্শন কালতে স্পষ্ট হয় কাৰাগাৰখনত কিদৰে সৰবাহৰ হয় ড্ৰাগছৰ দৰে নিচাযুক্ত সামগ্ৰী।

খবৰ অনুসৰি, জিলা আৰক্ষী অধীক্ষকে এই সমগ্ৰ বিষয়টোত গোচৰ ৰুজু কৰি তদন্ত আৰম্ভ কৰাৰ কথা সদৰী কৰিছে। অভিযোগ উত্থাপন হৈছে যে,পতংগীয়া আৰু হাজৰিকা উপাধিৰ দুই নিৰাপত্তাৰক্ষীয়ে কাৰাগাৰৰ ভিতৰত নিষিদ্ধ ড্ৰাগছ যোগান ধৰিছিল। কোৱা হৈছে যে,চেলিম নামৰ এজন কয়দীয়ে কাৰাগাৰৰ ভিতৰত চলাই আহিছে ড্ৰাগছৰ বেহা। একে সময়তে নগাঁও কেন্দ্ৰীয় কাৰাগাৰত কয়দীয়ে বিলাসী জীৱন উপভোগ কৰাৰো অভিযোগ উত্থাপন হৈছে।

ইয়াৰ লগতে কাৰাগাৰখনত ভাং, শীতল পানীয়ৰ পৰা আৰম্ভ কৰি সকলো সমগ্ৰী উপলব্ধ হোৱাৰো অভিযোগ উত্থাপন হৈছে। কাৰাগাৰ অধীক্ষক মুকুল ভূঞাৰ সন্মুখতে কেন্দ্ৰীয় কাৰাগাৰত এই ধৰণৰ সকলো সমাগ্ৰীৰ ব্যৱসায় চলাৰ অভিযোগ। কাৰাগাৰখন প্ৰত্যক্ষ কৰি এই সমগ্ৰ বিষয়টো বিভাগীয় কৰ্তৃপক্ষক অৱগত কৰে জিলা আয়ুক্ত দেৱাশীষ শৰ্মাই।

জিলা আয়ুক্ত দেৱাশীষ শৰ্মাই কয়, “আকস্মিকভাৱে আহি আমি গম পালো যে,জেলৰ মানুহে বাহিৰৰ পৰা ড্ৰাগছ লৈ আহে। সেই ড্ৰাগছ চেলিম নাম এগৰাকীৰ হাতত দিয়ে। এই কাৰবাৰ চলাই আহিছে পতংগীয়া আৰু হাজৰিকা উপাধিৰ দুজন নিৰাপত্তাৰক্ষীয়ে।”

তেওঁ লগতে কয়, “ভিতৰত টকা দিলে ড্ৰাগছ পায়, গাঞ্জা পায়। ইফালে, কোনোবা আহিলে আগতীয়াকৈ তেওঁলোকে খবৰ লাভ কৰে।” কিছু লোকে নিজৰ কয়দীৰ নামত দি যোৱা টকাৰ আধা টকা দি আধাৰ ৰাখি দিয়াৰো অভিযোগ উত্থাপন কৰে উপায়ুক্ত গৰাকীয়ে। “যদি ১০০০ টকা দিয়ে তেতিয়া ৫০০ টকা ৰাখি ৫০০ টকা স্লিপ দিয়া কয়দীজনক।” এইদৰে কয় জিলা আয়ুক্ত দেৱাশীষ শৰ্মাই।

তেওঁ কয়, “সন্দুৰকৈ তিনিখন কেণ্টিন চলি আছে। কেণ্টিনত মাছ-মাংসৰ পৰা আৰম্ভ কৰি ফ্ৰীজত ৰখা শীতল পানীয় উপলব্ধ।” এনাৰ্জি ড্ৰিংক জব্দ কৰাৰ কথা সদৰী কৰিছে জিলা আয়ুক্ত গৰাকীয়ে। কাৰাগাৰৰ ভিতৰত কয়দীসকলে নীতিবহিৰ্ভূত বিলাসিতা উপভোগ কৰাৰ কথা সদৰী কৰিছে জিলা আয়ুক্তগৰাকীয়ে। ইতিমধ্যে প্ৰশাসনে জব্দ কৰিছে কাৰাগাৰত নিষিদ্ধ বৃহৎ পৰিমাণৰ এনাৰ্জি ড্ৰিংক, ড্ৰাগছ সহ বিভিন্ন খাদ্য সামগ্ৰী। এই সন্দৰ্ভত শীঘ্ৰেই বিহিত ব্যৱস্থা গ্ৰহণৰ আশ্বাস দিছে নগাঁও জিলা আয়ুক্তগৰাকীয়ে।