নৰেন্দ্ৰ মোদী আৰু মাতৃক কৰা অপমানৰ বাবে ৰাহুল গান্ধীক ক্ষমা খোজাৰ দাবী অমিত শ্বাহৰ

দুদিনীয়া ভ্ৰমণসূচীৰে অসমলৈ অহা কেন্দ্ৰীয় গৃহমন্ত্ৰী অমিত শ্বাহে আজি কেইবাটাও কাৰ্যসূচীত অংশগ্ৰহণ কৰে। আজি গুৱাহাটীত এক অনুষ্ঠানত অংশ লৈ কেন্দ্ৰীয় গৃহমন্ত্ৰী অমিত শ্বাহে নিজ ভাষণত কংগ্ৰেছ নেতা ৰাহুল গান্ধীক তীব্ৰ আক্ৰমণ কৰে। বিহাৰত কংগ্ৰেছে চলোৱা ‘ভোটাৰ অধিকাৰ যাত্ৰা’ৰ সময়ত প্ৰধানমন্ত্ৰী নৰেন্দ্ৰ মোদী আৰু তেওঁৰ প্ৰয়াত মাতৃৰ বিৰুদ্ধে কৰা ‘অপমান সূচক মন্তব্য’ৰ বাবে ৰাহুল গান্ধীয়ে ক্ষমা খুজিব লাগে বুলি দাবী কৰিছে কেন্দ্ৰীয় গৃহমন্ত্ৰী অমিত শ্বাহে।

গৃহমন্ত্ৰী শ্বাহে কংগ্ৰেছৰ ভোটাৰ অধিকাৰ যাত্ৰাক ঘুচপেঠীয়া বচাও যাত্ৰা আখ্যা দিয়ে। অমিত শ্বাহৰ দাবী, বিহাৰত ‘ঘুচপেঠীয়া বচাও যাত্ৰা’ৰ (অনুপ্ৰৱেশকাৰী বচাও যাত্ৰা) জৰিয়তে ৰাহুল গান্ধীৰ ৰাজনীতিয়ে ‘নিম্ন স্তৰ’ স্পৰ্শ কৰিছে। ‘ৰাহুল গান্ধীৰ যদি অলপ হ’লেও লাজ বাকী আছে, তেন্তে ক্ষমা খুজিব লাগে। তেওঁৰ আৰু তেওঁৰ দলটোৰ প্ৰতি দেশবাসীৰ বিতৃষ্ণা উপজিছে।’- এইদৰে কয় কেন্দ্ৰীয় গৃহমন্ত্ৰীগৰাকীয়ে।