এইবাৰ বাংলাদেশত ৰাষ্ট্ৰপতিক পদচ্যুত কৰাৰ কুচকাৱাজ! দূতাবাসৰ পৰা আঁতৰালে ছবি
বাংলাদেশৰ বৈদেশিক মন্ত্ৰণালয়ে ৰাষ্ট্ৰপতি মহম্মদ ছাহাবুদ্দিনৰ ছবি তৎকালীনভাৱে আঁতৰাবলৈ বিদেশী দূতাবাসসমূহক নিৰ্দেশ দিছে। নিৰ্দেশ পোৱাৰ লগে লগে বহু দূতাবাসে ছবিবোৰ আঁতৰাই পেলালে। এই খবৰ ওলোৱাৰ পিছৰে পৰা জল্পনা-কল্পনা আৰম্ভ হৈছে যে এই সিদ্ধান্ত ৰাষ্ট্ৰপতিক অপসাৰণৰ প্ৰস্তুতি নেকি?
যোৱা বছৰৰ জুলাই মাহত ছাত্ৰ বিক্ষোভৰ পাছতেই ৫ আগষ্টত বাংলাদেশত ক্ষমতাৰ পৰা আঁতৰিব লগা হৈছিল প্ৰধানমন্ত্ৰী শ্বেখ হাছিনা। তাৰ পাছতেই আগষ্ট মাহত নোবেল বিজয়ী মহম্মদ ইউনুচক মুখ্য উপদেষ্টা হিচাপে লৈ গঠন কৰা হয় অন্তৱৰ্তীকালীন চৰকাৰ। এইবাৰ যেন ৰাষ্ট্ৰপতিক পদৰ পৰা আঁতৰোৱাৰ কুচকাৱাজ চলিছে পদ্মাৰ পাৰৰ দেশখনত।
বাংলাদেশৰ বৈদেশিক মন্ত্ৰালয়ে জাৰি কৰিছে এক অদ্ভুত নিৰ্দেশ। এই নিৰ্দেশৰ অধীনত বাংলাদেশত থকা বিদেশী দূতাবাস আৰু বহিঃৰাষ্ট্ৰৰ উচ্চায়ুক্তালয়সমূহক ৰাষ্ট্ৰপতি মহম্মদ ছাহাবুদ্দিনৰ ছবিসমূহ তৎকালীনভাৱে আঁতৰাবলৈ কোৱা হৈছে। নিৰ্দেশনা পোৱাৰ লগে লগে বহু দেশৰ দূতাবাসৰ পৰা ছবিবোৰ আঁতৰাই দিয়া হয়। কিন্তু এতিয়ালৈকে চৰকাৰে কিয় এনে পদক্ষেপ লৈছিল সেয়া স্পষ্ট হোৱা নাই।
এই খবৰ ওলোৱাৰ লগে লগে ছ’চিয়েল মিডিয়াত আলোড়নৰ সৃষ্টি হয়। মানুহে প্ৰশ্ন উত্থাপন কৰিবলৈ ধৰিলে যে ইয়াৰ অৰ্থ ৰাষ্ট্ৰপতিজনকো পদৰ পৰা অপসাৰণ কৰা হ’ব নেকি? স্মৰ্তব্য যে যোৱা বছৰৰ ৫ আগষ্টত শ্বেখ হাছিনা চৰকাৰৰ পতনৰ পিছত বহু ঠাইৰ পৰাও শ্বেখ হাছিনা আৰু বাংলাদেশৰ প্ৰতিষ্ঠাপক শ্বেখ মুজিবুৰ ৰহমানৰ ছবি আঁতৰাই পেলোৱা হৈছিল। মানুহে নিজেই দূতাবাসত প্ৰৱেশ কৰি ছবিবোৰ আঁতৰাইছিল।
ফোনত পোনপটীয়াকৈ লাভ কৰিছিল নিৰ্দেশনা
বিবিচিৰ এক প্ৰতিবেদন অনুসৰি কিছুমানক চৰকাৰে পোনপটীয়াকৈ ফোনযোগে জনোৱাৰ বিপৰীতে কিছুমানে কোনো নিৰ্দেশনা পোৱা নাছিল। শুকুৰবাৰে নিশা বৈদেশিক পৰিক্ৰমা মন্ত্ৰালয়ৰ পৰা নিৰ্দেশ পোৱাৰ পিছত ৰাষ্ট্ৰপতিগৰাকীৰ ছবিখন তাৰ পৰা আঁতৰাই পেলোৱা বুলি নিশ্চিত কৰে লণ্ডন উচ্চায়ুক্তই। ইউৰোপ, মধ্যপ্ৰাচ্য আৰু দক্ষিণ এছিয়াৰ কমেও পাঁচটা দূতাবাসে মৌখিক নিৰ্দেশনাৰ পিছত ছবিসমূহ আঁতৰাব লাগিব বুলি কয়।
প্ৰাক্তন সচিব এ কে এম আব্দুল আৱাল মজুমদাৰে কয় যে পূৰ্বে আইনত কেৱল শ্বেখ মুজিবুৰ ৰহমানৰ ছবি ৰখাৰ নিয়ম আছিল, ৰাষ্ট্ৰপতিৰ ছবি আঁতৰোৱাৰ নহয়। যদি চৰকাৰে এইটো বিচাৰিছিল, তেন্তে লিখিত আদেশ দিব লাগিছিল।
এই দূতাবাসসমূহৰ পৰা আঁতৰোৱা ফটো
কলম্বোৰ দূতাবাসৰ এগৰাকী বিষয়াই বিবিচিক জনোৱা মতে, ইতিমধ্যে ছাহাবুদ্দিন, হাছিনা আৰু মুজিবুৰৰ ফটো আঁতৰাই পেলোৱা হৈছে। পিছত মন্ত্ৰালয়ৰ পৰা ফোন আহিল যে ৰাষ্ট্ৰপতিৰ ফটোখনো আঁতৰাব লাগিব, কিন্তু সেই ফটো ইতিমধ্যে নাছিল।
তেহৰানৰ দূতাবাসত ৰাষ্ট্ৰপতি আৰু উপদেষ্টা অধ্যাপক ইউনুছ দুয়োৰে ফটো আছিল। কিন্তু দেওবাৰে বিষয়াসকলে দেখিলে যে দুয়োখন ফটো আঁতৰোৱা হৈছে। প্ৰাক্তন কূটনীতিবিদসকলে কয় যে কেবিনেটে কাৰ ফটো লগাব লাগে তাৰ নিৰ্দেশ দিয়ে। চৰকাৰে যেতিয়াই মন যায় তেতিয়াই সিদ্ধান্ত সলনি কৰিব পাৰে।
