যুদ্ধ বিৰতি কি ? ইয়াৰ ফলত কি প্ৰভাৱ পৰে ?
পাকিস্তানৰ DGMOয়ে শনিবাৰে বিয়লি ৩:৩৫ বজাত ভাৰতীয় DGMO ক ফোন কৰে। শনিবাৰে সন্ধিয়া ৫ বজাৰ পৰা দুয়োপক্ষই সকলো ধৰণৰ সামৰিক কাৰ্যকলাপ বন্ধ কৰাৰ ক্ষেত্ৰত সহমতত উপনীত হয়।
ভাৰত আৰু পাকিস্তানৰ মাজত যুদ্ধ বিৰতি ঘোষণা কৰা হৈছে । প্ৰথমে এই কথা ঘোষণা কৰিছিল আমেৰিকাৰ ৰাষ্ট্ৰপতি ড’নাল্ড ট্ৰাম্পে। ট্ৰাম্পৰ এই মন্তব্যৰ পিছতে সন্ধিয়া ৬ বজাত প্ৰেছ ব্রিফিঙৰ বাবে আহিছিল ভাৰতৰ বৈদেশিক সচিব বিক্রম মিশ্ৰী। তেওঁ কয়- পাকিস্তানৰ DGMOয়ে শনিবাৰে বিয়লি ৩:৩৫ বজাত ভাৰতীয় DGMO ক ফোন কৰে। শনিবাৰে সন্ধিয়া ৫ বজাৰ পৰা দুয়োপক্ষই সকলো ধৰণৰ সামৰিক কাৰ্যকলাপ বন্ধ কৰাৰ ক্ষেত্ৰত সহমতত উপনীত হয়।
এই চুক্তি কাৰ্যকৰী কৰিবলৈ দুয়োপক্ষক নিৰ্দেশনা দিয়া হৈছে। ১২ মে’ত দুপৰীয়া ১২ বজাত পুনৰ কথা পাতিব দুয়োখন দেশৰ DGMO য়ে। এই সিদ্ধান্তক লৈ মানুহৰ মনত বহু প্ৰশ্ন উত্থাপন হৈছে। প্ৰকৃততে যুদ্ধ বিৰতি কি? ইয়াৰ ফলত কি প্ৰভাৱ পৰে? আৰু ইয়াক কাৰ্যকৰী কৰাৰ উপায় কি?
যুদ্ধ বিৰতিৰ অৰ্থ কি?
যুদ্ধবিৰতিৰ অৰ্থ হ’ল সংঘাত বা যুদ্ধৰ সাময়িক বা স্থায়ী বন্ধ। যেতিয়া দুখন দেশ বা দলে পাৰস্পৰিক সন্মতিৰে সামৰিক কাৰ্যকলাপ বন্ধ কৰাৰ সিদ্ধান্ত লয়, তেতিয়া ইয়াক যুদ্ধ বিৰতি বোলা হয়। এইটো এক প্ৰকাৰৰ শান্তিৰ পদক্ষেপ যাতে আলোচনাৰ পৰিৱেশ সৃষ্টি কৰিব পৰা যায় । যুদ্ধ বিৰতি একপক্ষীয়ও হ’ব পাৰে, অৰ্থাৎ এটা পক্ষই যুদ্ধ বন্ধ কৰাৰ কথা ঘোষণা কৰিব পাৰে । পাৰস্পৰিক সন্মতিৰ জৰিয়তেও ইয়াক কাৰ্যকৰী কৰিব পাৰি, য’ত দুয়োপক্ষই সামৰিক কাৰ্যকলাপ বন্ধ কৰাৰ প্ৰতিশ্ৰুতি দিয়ে।
ভাৰত-পাকিস্তানৰ যুদ্ধ বিৰতি
ভাৰত আৰু পাকিস্তানৰ মাজত যুদ্ধ বিৰতিৰ ইতিহাস ১৯৪৯ চনৰ পৰাই আৰম্ভ হৈছে, যেতিয়া কাশ্মীৰ যুদ্ধৰ পিছত ৰাষ্ট্ৰসংঘৰ হস্তক্ষেপত দুয়োখন দেশে চুক্তিৰ অধীনত সামৰিক কাৰ্যকলাপ বন্ধ কৰিবলৈ সন্মত হৈছিল। এই চুক্তিত যুদ্ধ বিৰতি ৰেখাৰ সৃষ্টি কৰা হৈছিল, যাক আজি LoC বুলি কোৱা হয়।
শেহতীয়াকৈ যুদ্ধ বিৰতিত ক্ষেপণাস্ত্ৰ আৰু ড্ৰ’ন আক্ৰমণ বন্ধ কৰাৰ চুক্তি হৈছে। যুদ্ধ বিৰতিৰ কোনো নিৰ্দিষ্ট সূত্ৰ নাই যদিও কিছুমান সাধাৰণ প্ৰট’কল আছে। যেনেকৈ দুয়োখন দেশৰ সেনাই আক্ৰমণাত্মক কাৰ্যকলাপ বন্ধ কৰে। অসামৰিক স্থান (যেনে চিকিৎসালয়, বিদ্যালয় আদি) লক্ষ্য কৰি লোৱা নহয়। ভুল তথ্য আৰু অপপ্ৰচাৰ বন্ধ কৰা। এই ক্ষেত্ৰত নিৰীক্ষণৰ দায়িত্ব তৃতীয় দেশ বা সংস্থাক (যেনে ৰাষ্ট্ৰসংঘ বা আমেৰিকা) দিব পাৰে।
যুদ্ধ বিৰতিৰ উদ্দেশ্য হৈছে উত্তেজনা হ্ৰাস কৰা, আলোচনাৰ সম্ভাৱনা বৃদ্ধি কৰা আৰু জীৱন আৰু সম্পত্তিৰ সুৰক্ষা নিশ্চিত কৰা। কিন্তু ইয়াৰ স্থায়ী প্ৰভাৱ তেতিয়াহে হয় যেতিয়া দুয়োপক্ষই ইয়াক অনুসৰণ কৰে।
