পুটিনৰ বিৰুদ্ধে গ্ৰেপ্তাৰৰ পৰোৱানা! ব্যৱস্থা ল’ব নেকি ভাৰতে?

চাৰি বছৰৰ মূৰত ভাৰত ভ্ৰমণলৈ আহিব ৰাছিয়াৰ ৰাষ্ট্ৰপতি ভ্লাডিমিৰ পুটিন। অহা ৪ আৰু ৫ ডিচেম্বৰত দুদিনীয়া ভ্ৰমণসূচীৰে ভাৰতলৈ আহিব পুটিন। । তেওঁ ২৩ সংখ্যক ভাৰত-ৰাছিয়া বাৰ্ষিক সন্মিলনত অংশগ্ৰহণ কৰিব। প্ৰধানমন্ত্ৰী নৰেন্দ্ৰ মোদীৰ আমন্ত্ৰণত কৰিব  ৰাজ্যিক ভ্ৰমণ । বিগত কেইবছৰৰ পৰা সুদৃঢ় হৈ আহিছে ভাৰত-ৰাছিয়াৰ সম্পৰ্ক।

আন্তৰ্জাতিক অপৰাধ ন্যায়ালয়ে (ICC) ২০২৩ চনৰ মাৰ্চ মাহত ইউক্ৰেইনত যুদ্ধাপৰাধৰ অভিযোগত পুটিনৰ বিৰুদ্ধে গ্ৰেপ্তাৰৰ পৰোৱানা জাৰি কৰিছিল। অৱশ্যে এই ৱাৰেণ্টৰ মাজতে পুটিন ভাৰতলৈ যাত্ৰা কৰিব। এই ৱাৰেণ্ট ভাৰতৰ ক্ষেত্ৰত প্ৰযোজ্য নেকি জানো আহক।  ৰাছিয়াৰ ৰাষ্ট্ৰপতিৰ বিৰুদ্ধে কোনো ব্যৱস্থা গ্ৰহণ কৰিবলৈ হ’ব নেকি নতুন দিল্লীয়ে?

আইচিচি (ICC) কি?

নেদাৰলেণ্ডৰ হেগস্থিত আন্তঃৰাষ্ট্ৰীয় ফৌজদাৰী আদালত (ICC) হৈছে আন্তঃৰাষ্ট্ৰীয় সমাজৰ দৃষ্টিত আটাইতকৈ গুৰুতৰ অপৰাধৰ বাবে বিশ্বৰ নেতা আৰু অন্যান্য ব্যক্তিৰ বিৰুদ্ধে গোচৰ চলোৱাৰ ক্ষমতা থকা এখন বিশ্বব্যাপী আদালত। ই গণহত্যা, যুদ্ধাপৰাধ, মানৱতাৰ বিৰুদ্ধে অপৰাধ, আগ্ৰাসন আদি অভিযোগৰ তদন্ত কৰে আৰু প্ৰয়োজন হ’লে গোচৰ চলায়।

পুটিনৰ বিৰুদ্ধে গ্ৰেপ্তাৰৰ ৱাৰেণ্ট

২০০২ চনত আই চি চি স্থাপিত হৈছিল।২০২৩ চনৰ মাৰ্চ মাহত আদালতে পুটিনৰ বিৰুদ্ধে যুদ্ধাপৰাধৰ অভিযোগত গ্ৰেপ্তাৰৰ পৰোৱানা জাৰি কৰিছিল। কিন্তু গ্ৰেপ্তাৰৰ পৰোৱানা থকাৰ পিছতো পুটিনক আন দেশত আটক কৰাৰ সম্ভাৱনা নাই।

ৱাৰেণ্টৰ বিষয়ে কি কয় ৰাছিয়াই?

ৰাছিয়া বা ইউক্ৰেইন কোনোৱে ICCৰ সদস্য (signatories) নহয়। ৱাৰেণ্ট জাৰি হোৱাৰ পিছত ক্ৰেমলিনৰ মুখপাত্ৰ পেস্কোভে কয় যে, আন বহু দেশৰ দৰে ৰাছিয়াইও আদালতৰ অধিকাৰক্ষেত্ৰক স্বীকৃতি নিদিয়ে। তেওঁ লগতে কয় যে, আদালতৰ যিকোনো সিদ্ধান্তৰ ৰাছিয়ান ফেডাৰেচনৰ বাবে কোনো আইনী তাৎপৰ্য নাই।

ভাৰত বাধ্য নেকি?

১২৪খন দেশে অনুমোদন জনাইছে আই চি চিক। অৱশ্যে ভাৰত আই চি চিৰ পক্ষ নহয়, নতুন দিল্লীয়েও এই মূল চুক্তিত স্বাক্ষৰ কৰা নাই। গতিকে ভাৰত ইয়াৰ চৰ্তত বান্ধ খাই থকা নাই।

ইয়াৰ পূৰ্বে ভাৰতে আইচিচিৰ কাৰ্যবিধিৰ সন্মুখীন হোৱা নেতাক আতিথ্য প্ৰদান কৰিছিল। ২০১৫ চনত তেতিয়াৰ চুডানৰ ৰাষ্ট্ৰপতি ওমৰ হাছান আল বছিৰে ভাৰত-আফ্ৰিকা সন্মিলনত অংশগ্ৰহণৰ বাবে নতুন দিল্লী ভ্ৰমণ কৰিছিল। দাৰফুৰত অসামৰিক জনসাধাৰণৰ ওপৰত আক্ৰমণৰ উচটনি দিয়াৰ অভিযোগত আইচিচিৰ বিৰুদ্ধে অভিযুক্ত হোৱা প্ৰথমজন বহি থকা ৰাষ্ট্ৰপতি।

ভাৰতলৈ যাবলৈ কোনবোৰ পথ ল’ব পুটিনে?

ৰাষ্ট্ৰপতি পুটিনে ৬টা পথেৰে ভাৰতলৈ আহিব পাৰিব। মস্কোৰ শ্বেৰেমেটিয়েভ’ বিমানবন্দৰৰ পৰা দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰলৈ ব্যৱহাৰ কৰিব পৰা পথসমূহ চাওঁ আহক।

• ১ নং পথ: ৰাছিয়াৰ পৰা তেহৰাণ হৈ ভাৰতলৈ আহিব পাৰিব পুটিনে
• ২ নং পথ: ৰাছিয়াৰ পৰা আজাৰবাইজানৰ বাকু হৈ ভাৰতলৈ আহিব পাৰিব পুটিনে।
• ৩ নং পথ: কাবুল হৈ ভাৰতলৈ আহিব পাৰিব পুটিনে।
• ৪ নং পথ: পুটিনে প্ৰত্যক্ষ পথেৰেও যাত্ৰা কৰিব পাৰিব।
• ৫ নং পথ: উজবেকিস্তানৰ তাছকেন্দৰ পৰা তেওঁ দিল্লীলৈ আহিব পাৰিব।
• ৬ নং পথ: কাজাখস্তানৰ আলমাটি হৈ পুটিনে ভাৰতলৈ আহিব পাৰিব।