পুনৰ দুৰ্ঘটনাত পতিত যাত্ৰীবাহী বিমান, আটাইকেইজনৰে মৃত্যুৰ আশংকা

ৰাছিয়াৰ আমুৰ অঞ্চলত দুৰ্ঘটনাগ্ৰস্ত হৈছে আংগাৰা এয়াৰলাইন্সৰ এখন বিমান। বিমানখনত আছিল ৪৯ জন লোক। ৰাছিয়াৰ সেনাই  বিচাৰি পাইছে বিমানখনৰ ধ্বংসাৱশেষ। ইয়াৰ পিছত সাহায্য আৰু উদ্ধাৰৰ কাম আৰম্ভ কৰা হৈছে।  কেইঘণ্টামান আগতে ৰাডাৰৰ পৰা নিৰুদ্দেশ হৈছিল এই বিমানখন। বিমান দুৰ্ঘটনাত ৪৯ জন লোকৰ আটাইকেইজন লোকৰ মৃত্যুৰ আশংকা।

সংবাদ সংস্থা TASS ৰ মতে, এন-২৪ ক’ডেৰে পৰিচালিত এই বিমানখনত ৫টা শিশুকে ধৰি ৪৩ জন যাত্ৰী আছিল। একে সময়তে বিমানখনত ৬ জন বিমান কৰ্মী উপস্থিত আছিল। ইণ্টাৰফেক্স নিউজৰ তথ্য অনুসৰি বিমানখন টিণ্ডা বিমানবন্দৰত অৱতৰণ কৰিবলগীয়া আছিল যদিও প্ৰথম প্ৰচেষ্টাত বিমানখন সফল নহ’ল, তাৰ পিছত পাইলটে পুনৰ অৱতৰণ কৰিবলৈ চেষ্টা কৰে যদিও ১৫ কিলোমিটাৰ দূৰত বিমানখন দুৰ্ঘটনাগ্ৰস্ত হয়। এখন জংঘলত উদ্ধাৰ হৈছে বিমানখনৰ ধ্বংসাৱশেষ।

দুমাহ পূৰ্বে ৰাণৱেত অগ্নিকাণ্ড সংঘটিত হৈছিল

দুমাহ পূৰ্বে ৰাণৱেত অগ্নিকাণ্ড সংঘটিত হৈছিল অংগৰা এয়াৰলাইন্সৰ বিমান এএন-২৪ৰ। কিৰেনস্কত বিমানখন অৱতৰণ কৰাৰ লগে লগে সন্মুখভাগ ভাঙি যায়, যাৰ ফলত বিমানখনত জুই লাগে। অৱশ্যে সেই সময়ত কোনো লোকৰ মৃত্যু হোৱা নাছিল। ২০২৩ চনৰ জুলাই মাহত এএন-২৪ ছিৰিজৰ এখন বিমান দুৰ্ঘটনাগ্ৰস্ত হয়। সেই সময়ত বিমানখনত আছিল ৩৭ জন যাত্ৰী।

১৯৭৬ চনত নিৰ্মাণ কৰা হৈছিল এই বিমানখন

১৯৭৬ চনত কিয়েভৰ এভিয়েণ্ট এয়াৰক্ৰাফ্ট প্লাণ্টত নিৰ্মাণ কৰা হৈছিল এন-২৪ বিমান। সেই বছৰতে প্ৰথমখন বিমান চলোৱা হৈছিল। ২০২১ চনত বিমানখনৰ বিমানযোগ্যতাৰ প্ৰমাণ পত্ৰ ২০৩৬ চনলৈ বৃদ্ধি কৰা হয়।গৱৰ্ণৰ ইগ’ৰ কবজেভে কয় যে আমুৰ অঞ্চলত দুৰ্ঘটনাগ্ৰস্ত হোৱা এ এন-২৪ বিমানখনৰ ক্ৰু সদস্যসকল ইৰকুটস্ক অঞ্চলৰ বাসিন্দা আছিল।

দুৰ্ঘটনাগ্ৰস্ত এএন-২৪ বিমানখনৰ ধ্বংসাৱশেষ ডেৰ কিলোমিটাৰলৈকে সিঁচৰতি হৈ পৰিছে। ইফালে দুৰ্ঘটনাস্থলীত অৱতৰণ কৰাটো যথেষ্ট সমস্যাৰ সৃষ্টি হৈছে। ৰছীৰ সহায়ত তাত অৱতৰণ কৰাৰ পৰিকল্পনা কৰিছে উদ্ধাৰকাৰী দলে। ২৪ জুলাইৰ পুৱা ৭:৩৬ বজাত খাবাৰোভস্কৰ পৰা উৰা মাৰিছিল বিমানখনে। আংগাৰা এয়াৰলাইন্সৰ এই বিমানখন খাবাৰোভস্ক – ব্লাগোভেচচেনস্ক – টিণ্ডা অভিমুখে আছিল।

উল্লেখ্য যে ইষ্টলেণ্ড গ্ৰুপৰ সহযোগী প্ৰতিষ্ঠান আংগাৰা এয়াৰলাইন্স। ২০০০ চনত প্ৰতিষ্ঠা হোৱা এই বিমান সংস্থাটো ৰাছিয়া আৰু চাইবেৰিয়াৰ ঘৰুৱা বিমান সেৱাৰ বাবে আগশাৰীৰ বিমান সংস্থা। আংগাৰাই ঘৰুৱা বিমান সেৱাৰ লগতে চাৰ্টাৰ বিমান সেৱাও চলায়। ইৰকুটস্ক বিমানবন্দৰত (হেংগাৰ কমপ্লেক্স, পাৰ্কিং, গ্ৰাউণ্ড ষ্টাফ আদি) বিমানৰ ৰক্ষণাবেক্ষণ আৰু গ্ৰাউণ্ড হেণ্ডলিঙৰ বাবে আংগাৰা এয়াৰলাইন্সৰ আটাইতকৈ ডাঙৰ ঘাটি আছে। কোম্পানীটোৰ তথ্য অনুসৰি ইয়াৰ বহৰত ৩২খন বিমান আছে, য’ত আছে পাঁচখন এএন-১৪৮, সাতখন এএন-২৪, তিনিখন এএন-২৬-১০০, দুখন এএন-২ আৰু এঘাৰখন মি-৮ হেলিকপ্টাৰ বিভিন্ন পৰিৱৰ্তনত।