Nobel peace prize 2025: শান্তিৰ নোবেল কিয় নাপালে ট্ৰাম্পে? শান্তিৰ নোবেল বঁটাৰ প্ৰাৰ্থী বাচনি কৰা পাঁচগৰাকী বিচাৰক কোন?

ঘোষণা হ’ল ২০২৫ বৰ্ষৰ শান্তিৰ নোবেল বঁটা। এইবাৰ শান্তিৰ নোবেল বঁটাৰ প্ৰৱল দাবীদাৰ আছিল আমেৰিকাৰ ৰাষ্ট্ৰপতি ড’নাল্ড ট্ৰাম্প। কিন্তু ট্ৰাম্পৰ আশাত চেঁচাপানী পৰিল নাম ঘোষণাৰ পাচত। কিয়নো এই বৰ্ষৰ শান্তিৰ নোবেল বঁটা প্ৰদান কৰা হৈছে ভেনিজুৱেলাৰ গণতান্ত্ৰিক কৰ্মী মাৰিয়া ক’ৰিনা মাচাডোক। পাকিস্তানকে ধৰি কেবাখনো দেশে ট্ৰাম্পক শান্তিৰ নোবেল বঁটা প্ৰদানৰ বাবে দাবী জনাইছিল। কিন্তু সেই দাবী গ্ৰাহ্য নহ’ল।

জানুৱাৰীত দ্বিতীয়বাৰৰ বাবে হোৱাইট হাউচলৈ উভতি অহাৰ পাচৰ পৰাই ট্ৰাম্পৰ চকু আছিল শান্তিৰ নোবেলৰ ওপৰত। যাৰ বাবে একপ্ৰকাৰ লবী কৰিছিল ট্ৰাম্পে। বাৰে বাৰে ট্ৰাম্পে দাবী কৰিছিল যে তেওঁ আঠখন যুদ্ধৰ অন্ত পেলাইছে। প্ৰায় দুবছৰ ধৰি চলি থকা গাজা যুদ্ধৰ অন্ত পেলোৱাৰ ক্ষেত্ৰত ইজৰাইল আৰু হামাছৰ মাজত শান্তি প্ৰতিষ্ঠাত সফলতা লাভ কৰিছে ট্ৰাম্পে।

ইয়াৰ ফলত একাংশ সমৰ্থকৰ দৃষ্টিত ট্ৰাম্পৰ এই দাবী সফল হ’ব যেন লাগিছিল। ট্ৰাম্পে আনকি ভাৰত-পাকিস্তানৰ মাজত যোৱা মে’ মাহত উদ্ভৱ হোৱা অশান্তি দূৰ কৰাৰো কৃতিত্ব ল’ব খুজিছিল। কিন্তু দিল্লীয়ে বাৰে বাৰে ট্ৰাম্পৰ দাবীক খাৰিজ কৰে।

কিন্তু এই সকলো দাবীৰ পাছতো ৰিপাব্লিকান নেতাগৰাকীয়ে লাভ নকৰিলে শান্তিৰ নোবেল। ইয়াৰ কাৰণ কি হ’ব পাৰে, জানো আহক

ট্ৰাম্পে কিয় লাভ নকৰিলে শান্তিৰ নোবেল?

প্ৰবল দাবী সত্বেও ট্ৰাম্পক ২০২৫ বৰ্ষৰ নোবেল বঁটা লাভ নকৰিলে ড’নাল্ড ট্ৰাম্পে। ইয়াৰ অন্যতম কাৰণ নিৰ্ধাৰিত সময়সীমাৰ পাছত তেওঁৰ নাম প্ৰস্তাৱ কৰাটোও হ’ব পাৰে। চলিত বৰ্ষৰ ১ ফেব্ৰুৱাৰীৰ পূৰ্বেই নোবেল বঁটাৰ বাবে মনোনয়ন জনাব লাগিছিল।

হিন্দুস্তান টাইমছৰ এক প্ৰতিবেদন অনুসৰি ট্ৰাম্পৰ দাবী আৰু কিছুমান দেশৰ সমৰ্থনৰ পিছতো তেওঁক আওকাণ কৰাৰ বিষয়ে সোধাত নৰৱে’ৰ নোবেল কমিটীৰ অধ্যক্ষ জৰ্জেন ভাটনে ফ্ৰিডনেছে কয় যে এই সিদ্ধান্ত “কেৱল আলফ্ৰেড নোবেলৰ কাম আৰু ইচ্ছাৰ ওপৰত ভিত্তি কৰি” লোৱা হৈছে।

“শান্তি নোবেল বঁটাৰ দীঘলীয়া ইতিহাসত মই ভাবো এই সমিতিখনে প্ৰতিটো প্ৰকাৰৰ প্ৰচাৰ আৰু সংবাদ মাধ্যমৰ মনোযোগ দেখিছে। আমি প্ৰতি বছৰে হাজাৰ হাজাৰ চিঠি লাভ কৰোঁ যিসকলে তেওঁলোকৰ বাবে শান্তিৰ পথ কি সেই বিষয়ে বুজাব বিচাৰে। এই সমিতিখন সকলো বঁটা বিজয়ীৰ প্ৰতিকৃতিৰে ভৰা কোঠা এটাত বহি থাকে, আৰু সেই কোঠাটো সাহস আৰু সততা দুয়োটাৰে ভৰি আছে। সেয়েহে, আমি আমাৰ সিদ্ধান্ত কেৱল আলফ্ৰেড নোবেলৰ কাম আৰু ইচ্ছাৰ ওপৰত ভিত্তি কৰি লওঁ।” এই ঘোষণাৰ পিছতে ফ্ৰাইডনেছে এখন সংবাদমেলত এইদৰে কয়।

নোবেলৰ প্ৰবীণসকলে কয় যে কমিটীয়ে দ্ৰুত কূটনৈতিক জয়ৰ সলনি স্থায়ী, বহুপক্ষীয় প্ৰচেষ্টাক অগ্ৰাধিকাৰ দিয়ে। হেনৰী জেকচন ছ’চাইটিৰ ইতিহাসবিদ তথা গৱেষক থিও ঝিন’ৱে কয় যে ট্ৰাম্পৰ এই প্ৰচেষ্টা এতিয়াও দীৰ্ঘস্থায়ী বুলি প্ৰমাণিত হোৱা নাই।

ৰয়টাৰ্ছক ঝিন’ৱে কয় যে হ্ৰস্বম্যাদীভাৱে যুঁজ বন্ধ কৰি দিয়া আৰু সংঘাতৰ মূল কাৰণসমূহ সমাধান কৰাৰ মাজত এক বৃহৎ পাৰ্থক্য আছে। জলবায়ু পৰিৱৰ্তনৰ ক্ষেত্ৰত ট্ৰাম্পৰ অৱজ্ঞামূলক স্থিতিকো নোবেল কমিটীকে ধৰি বহুতে আটাইতকৈ ডাঙৰ দীৰ্ঘম্যাদী শান্তি প্ৰত্যাহ্বান বুলি ভবা কথাটোৰ সৈতে মিল নাই বুলিও ঝিন’ৱে আলোকপাত কৰে।

ঝিন’ৱে কয়, “মই নাভাবো যে তেওঁলোকে জলবায়ু পৰিৱৰ্তনত বিশ্বাস নকৰা ব্যক্তিক বিশ্বৰ আটাইতকৈ সন্মানীয় পুৰস্কাৰ প্ৰদান কৰিব। যেতিয়া আপুনি পূৰ্বৰ বিজয়ীসকলক চায় যিসকলে আন্তঃৰাষ্ট্ৰীয় সহযোগিতা আৰু মিলনক ​​মূৰ্ত কৰি তুলিছে: এইবোৰ ড’নাল্ড ট্ৰাম্পৰ সৈতে জড়িত শব্দ নহয়।”

লগতে ইজৰাইলৰ প্ৰধানমন্ত্ৰী বেঞ্জামিন নেতান্যাহু আৰু পাকিস্তান চৰকাৰে ১ ফেব্ৰুৱাৰীৰ সময়সীমাৰ পিছত ২০২৫ চনৰ বঁটাৰ বাবে ট্ৰাম্পক সমৰ্থন কৰি মনোনয়ন দাখিল কৰে।

শান্তি নোবেল বঁটাৰ পাঁচজন বিচাৰক কোন?

১৮৯৭ চনত নৰৱে’ৰ ষ্ট’ৰ্টিঙে (নৰৱে’ৰ সংসদ) গঠন কৰা নোবেল সমিতিখনক শান্তি নোবেল বঁটাৰ বিজয়ীসকলক বাছনি কৰাৰ দায়িত্ব দিয়া হৈছে। সমিতিৰ সদস্যসকল ছবছৰৰ বাবে নিৰ্বাচিত হয় আৰু পুনৰ নিৰ্বাচিতও হ’ব পাৰে।

শান্তি নোবেল বঁটাৰ নিয়ম অনুসৰি কমিটীৰ সদস্যসকলে নৰৱে’ৰ সংসদৰ বিভিন্ন ৰাজনৈতিক দলৰ শক্তিক প্ৰতিনিধিত্ব কৰে যদিও সংসদত বহি থকা সদস্য হ’ব নোৱাৰে। নিৰ্বাচিত হোৱাৰ পিছত কমিটীয়ে নিজৰ অধ্যক্ষ আৰু উপাধ্যক্ষ বাছি লয় আৰু নৰৱে’ৰ নোবেল ইনষ্টিটিউটৰ সঞ্চালকে কমিটীৰ সচিব হিচাপে কাম কৰে।

জৰ্জেন ৱাটনে ফ্ৰাইডনেছ: ফ্ৰাইডনেছ নোবেল কমিটীৰ অধ্যক্ষ। ৪১ বছৰ বয়সত তেওঁ এই সমিতিৰ অধ্যক্ষ হয়। আটাইতকৈ কম বয়সীয়া অধ্যক্ষ ফ্ৰাইডনেছ। ২০২১ চনত নিযুক্তি লাভ কৰা ফ্ৰাইডনেছ ২০২৬ চনলৈকে সদস্য হৈ থাকিব। ফ্ৰাইডনেছে নিজৰ কেৰিয়াৰত মানৱ অধিকাৰৰ সমৰ্থক হিচাপে কাম কৰি কটায়। মত প্ৰকাশৰ স্বাধীনতাক প্ৰসাৰিত কৰা পেন নৰৱে’ৰ সচিব প্ৰধান হিচাপেও কাৰ্যনিৰ্বাহ কৰি আহিছে। তেওঁ বেচৰকাৰী সংস্থা, মেডিচিনছ ছান্স ফ্ৰন্টিয়ৰ্ছ (ডাক্টৰ্ছ উইডাউট বৰ্ডাৰ্ছ, বা এম এছ এফ)ৰ সৈতে কাম কৰিছে আৰু মানৱ অধিকাৰ এন জি অ’, নৰৱে’ৰ হেলচিংকি কমিটিৰ সদস্য।

আছলে টোজে: ৫১ বছৰীয়া টোজে নোবেল কমিটীৰ উপাধ্যক্ষ। ২০১৮ চনৰ পৰা সদস্য হিচাপে থকা টোজেই ২০২৪-২০২৯ বৰ্ষৰ বাবে পুনৰ কমিটীত নিযুক্তি লাভ কৰে। তেওঁক ৰক্ষণশীল বুলি গণ্য কৰা হয় আৰু নোবেল কমিটীত যোগদান কৰাৰ পূৰ্বে তেওঁ নৰৱে’ৰ নোবেল ইনষ্টিটিউটত গৱেষণা সঞ্চালক হিচাপে কাৰ্যনিৰ্বাহ কৰিছিল। ইয়াৰ উপৰিও তেওঁৰ দ্য ইউৰোপিয়ান ইউনিয়ন এজ এ ছমল পাৱাৰ: আফটাৰ দ্য পষ্ট-কল্ড ৱাৰ নামৰ গ্ৰন্থ প্ৰকাশ পাইছে।

এন্নে এংগাৰ: ২০১৮ চনৰ পৰা কমিটীৰ সদস্য হিচাপে থকা ৭৫ বছৰীয়া এংগাৰক ২০২১ চনৰ পৰা ২০২৬ চনলৈকে পুনৰ নিযুক্তি দিয়া হৈছে। নাৰ্চিং অধ্যয়ন কৰি এই বিষয়ত শিক্ষকতা কৰি নিজৰ কেৰিয়াৰ আৰম্ভ কৰিছিল। পিছলৈ তেওঁ ৰাজনীতিলৈ আহে, নৰৱে’ৰ চেণ্টাৰ পাৰ্টিক তেওঁ সমৰ্থন কৰে। ১৯৯৭ চনৰ পৰা ১৯৯৯ চনৰ ভিতৰত সাংস্কৃতিক মন্ত্ৰালয়ৰ মুৰব্বী আৰু নৰৱে’ৰ প্ৰধানমন্ত্ৰীৰ উপ-সভাপতি হিচাপে কাৰ্যনিৰ্বাহ কৰা এংগাৰে ১৯৯৮ চনত ভাৰপ্ৰাপ্ত প্ৰধানমন্ত্ৰী হিচাপে কাৰ্যনিৰ্বাহ কৰিছিল আৰু ১৯৯৯ চনত চমুকৈ পেট্ৰলিয়াম আৰু শক্তি মন্ত্ৰালয়ৰ ভাৰপ্ৰাপ্ত মুৰব্বী হিচাপে কাৰ্যনিৰ্বাহ কৰিছিল। ২০০৪ চনৰ পৰা তেওঁ অষ্টফল্ড অঞ্চলৰ কাউন্টি গৱৰ্ণৰ হিচাপে কাৰ্যনিৰ্বাহ কৰিছিল।

ক্ৰীষ্টিন ক্লেমেট: ৬৮ বছৰীয়া ক্লেমেটক ২০২১ চনত কমিটীত নিযুক্তি দিয়া হৈছিল আৰু ২০২৬ চনলৈকে তেওঁ সদস্য হিচাপে থাকিব। নৰৱে’ৰ কনজাৰ্ভেটিভ পাৰ্টি হ’য়াৰৰ এগৰাকী ৰাজনীতিবিদ। পেছাত অৰ্থনীতিবিদ হিচাপে দুবাৰকৈ নৰৱে’ৰ কনজাৰ্ভেটিভ পাৰ্টিৰ পূৰ্বৰ প্ৰধানমন্ত্ৰী কেৰে উইলোচৰ উপদেষ্টা হিচাপে কাম কৰিছিল আৰু ২০০১ চনৰ পৰা ২০০৫ চনৰ ভিতৰত শিক্ষামন্ত্ৰী হিচাপে কাৰ্যনিৰ্বাহ কৰি আহিছে।

গ্ৰী লাৰ্চেন: ৪৯ বছৰীয়া লাৰ্চেন বৈদেশিক মন্ত্ৰালয়ৰ প্ৰাক্তন লেবাৰ ৰাজ্যিক সচিব আৰু বিশ্বব্যাপী মহিলাৰ অধিকাৰৰ পোষকতা কৰা নৰৱে’ৰ মানৱীয় সংস্থা কেয়াৰ নৰৱে’ৰ মুৰব্বী। ইয়াৰ পূৰ্বেও ট্ৰাম্পে বিদেশী সাহায্যৰ ব্যয় কৰ্তনক সমালোচনা কৰিছিল। ২০২৪-২০২৯ চনৰ বাবে কমিটীত নিযুক্তি দিয়া হৈছিল লাৰ্চেনক।