ভয়ংকৰ নাও দুৰ্ঘটনাত ৮৬ জন লোকৰ মৃত্যু, বেছিভাগেই ছাত্ৰ-ছাত্ৰী…

উত্তৰ-পশ্চিম কংগোৰ ইকুৱেটৰ প্ৰদেশত শুকুৰবাৰে সংঘটিত হয় এক ভয়ংকৰ নাও দুৰ্ঘটনা, য’ত কমেও ৮৬ জন লোকৰ মৃত্যু হয়। বাসাংকুছু অঞ্চলত সংঘটিত হোৱা এই ঘটনাত নিহতসকলৰ ভিতৰত বেছি সংখ্যক ছাত্ৰ-ছাত্ৰী বুলি জানিব পৰা গৈছে।

প্ৰকাশিত খবৰ অনুসৰি, মটৰচালিত এখন নাও বাগৰি যোৱাৰ ফলত এই দুৰ্ঘটনা সংঘটিত হয়। প্ৰয়োজনতকৈ অধিক যাত্ৰী আৰু লাগেজ কঢ়িয়াই আনিছিল নাওখনত। বিষয়াসকলে জনোৱা মতে, নাওখন ৰাতি যাত্ৰা কৰি আছিল আৰু এই সময়ছোৱাত নাওখনে ভাৰসাম্য হেৰুৱাই দুৰ্ঘটনাত পতিত হয়।

বিষয়াসকলে জনোৱা মতে, এতিয়ালৈকে ৮৬টা মৃতদেহ উদ্ধাৰ কৰা হৈছে। এতিয়াও বহু লোক নিৰুদ্দেশ হোৱা বুলি জানিব পৰা গৈছে। স্থানীয় প্ৰশাসন আৰু উদ্ধাৰকাৰী দল ঘটনাস্থলীত উপস্থিত থকাৰ লগতে নিৰুদ্দেশ হোৱা লোকসকলৰ সন্ধানত অভিযান অব্যাহত আছে। নদীৰ পাৰত অৱস্থিত গাঁৱৰ লোকেও এই অনুসন্ধান অভিযানত সহায় কৰিছে।

আটাইতকৈ বেদনাদায়ক দিশটো হ’ল মৃতকৰ বেছিভাগেই ছাত্ৰ-ছাত্ৰী। কোৱা হৈছে যে, ছাত্ৰ-ছাত্ৰীসকলে নিজৰ ঘৰৰ পৰা আন চহৰলৈ পঢ়া-শুনাৰ বাবে গৈ আছিল। প্ৰয়োজনতকৈ বেছি লোডিং আৰু নিশাৰ যাত্ৰা কৰাৰ ফলত েই দুৰ্ঘটনা সংঘটিত হোৱা বুলি সন্দেহ কৰা হৈছে।