ভাৰতৰ সীমান্তৰ সমীপতে ১০ মহলীয়া অট্টালিকা নিৰ্মাণ ঢাকাৰ, ধনৰ যোগান ধৰিছে চীনে; আঁৰৰ উদ্দেশ্য কি!

বাংলাদেশলৈ অনুদান প্ৰেৰণ কৰিছে ছি জিনপিঙৰ দেশে। সেই অনুদানেৰে এতিয়া দুবছৰ পূৰ্বে প্ৰস্তাৱিত প্ৰকল্প ইউনুছৰ যুগত কাৰ্যকৰী হোৱাৰ দিশে। এইদৰে এতিয়া ক্ৰমাৎ কাষ চাপিছে বাংলাদেশ-চীন। কিন্তু কি উদ্দেশ্যত বেইজিঙে ধন প্ৰেৰণ কৰিব ঢাকালৈ? জানিব পৰা মতে বাংলাদেশে চীনৰ এই অনুদানৰে এখন চিকিৎসালয় নিৰ্মাণ কৰিব। শেহতীয়াকৈ বাংলাদেশৰ স্বাস্থ্য সচিব ছাইদুৰ ৰহমানে সংবাদ সংস্থা প্ৰথম আলোৰ আগত এই বিষয়ে প্ৰকাশ কৰিছে।

তেওঁ উল্লেখ কৰা মতে চীনৰ অনুদানৰে ৰংপুৰৰ নীলফামাৰীত এখন উন্নত চিকিৎসালয় নিৰ্মাণ কৰা হ’ব। চিকিৎসালয়খনৰ আন্তঃগাঁথনি নিৰ্মাণ কৰিব বেইজিঙে, বাংলাদেশ চৰকাৰে নিয়োগ কৰিব জনশক্তি। বিগত বৰ্ষত স্বাস্থ্য বিভাগৰ সঞ্চালক প্ৰধানে বাংলাদেশ আৰু চীনৰ উদ্যোগত সমগ্ৰ দেশতে মুঠ তিনিখন চিকিৎসালয় নিৰ্মাণৰ কথা ঘোষণা কৰিছিল।

সেইমতে নীলফামাৰীত এখন বিশেষ চিকিৎসালয়, চট্টগ্ৰামত এখন সাধাৰণ চিকিৎসালয় আৰু ঢাকাত এখন পুনৰ্বাসন চিকিৎসালয় নিৰ্মাণ হ’ব। ইয়াৰে নীলফামাৰীত এখন বিশেষ চিকিৎসালয় নিৰ্মাণৰ কামত হাত আগবঢ়াবলৈ ওলাইছে ঢাকাই। শেহতীয়াকৈ যমুনাত থকা চীনৰ ৰাষ্ট্ৰদূতগৰাকীৰ ভ্ৰমণৰ পিছত শনিবাৰে সেই দেশৰ স্বাস্থ্য বিভাগে এই চিকিৎসালয়খন নিৰ্মাণৰ কথা ঘোষণা কৰে।

জানিব পৰা মতে এই বিশেষ চিকিৎসালয়খন নিৰ্মাণৰ বাবে বাংলাদেশী মুদ্ৰাত মুঠ ২,২৯২ কোটি টকা আবণ্টন দিয়া হৈছে। ইয়াৰে ২২১৯ কোটি টকা প্ৰদান কৰিব চীন চৰকাৰে। বাকী ৭৩ কোটি টকা বাংলাদেশ চৰকাৰে প্ৰদান কৰিব। অহা সপ্তাহত অন্তৱৰ্তীকালীন চৰকাৰৰ ৰাষ্ট্ৰীয় অৰ্থনৈতিক পৰিষদৰ কাৰ্যনিৰ্বাহক সমিতিৰ বৈঠকত এই প্ৰকল্পত অনুমোদন পোৱাৰ সম্ভাৱনা আছে।

অনুমোদন লাভ কৰিলে ২০২৮ চনৰ ভিতৰত চিকিৎসালয় ৰূপায়ণৰ কাম সম্পূৰ্ণ হ’ব। এই চিকিৎসালয়খনৰ অট্টালিকাটো ১০ মহলীয়া হ’ব। আৱৰ্জনা ব্যৱস্থাপনা, হেলিপেড আৰু স্বয়ংক্ৰিয় এম্বুলেঞ্চৰ ব্যৱস্থা থাকিব চিকিৎসালয়খনত। চিকিৎসালয়ৰ সা-সৰঞ্জাম ক্ৰয়ৰ বাবে ৯৪৫ মিলিয়ন টকা আবণ্টন দিয়া হৈছে। অট্টালিকা নিৰ্মাণৰ বাবে ৮০২ মিলিয়ন টকা। ইয়াৰ উপৰিও সৌৰ পেনেল, চিচিটিভিকে ধৰি আনুষংগিক খৰচৰ বাবে ২৪.৮ কোটি টকা আবণ্টন দিয়া হৈছে।