ফেব্ৰুৱাৰীলৈ সময় আছে ইউনুছৰ হাতত, অন্যথা শ্বেখ হাছিনাতকৈও বেয়া হ’ব…

ইতিমধ্যে ঘোষণা কৰা হৈছে বাংলাদেশত নিৰ্বাচনৰ দিন । কিন্তু এতিয়াও মুখ্য উপদেষ্টাগৰাকীৰ উদ্দেশ্যক লৈ সন্দেহ উপজিছে বহু লোকৰ । কৃষক শ্ৰমিক জনতা লীগৰ প্ৰতিষ্ঠাপক কাদেৰ ছিদ্দিকিয়ে সকীয়াই দিছে যে ফেব্ৰুৱাৰী মাহত নিৰ্বাচন অনুষ্ঠিত নকৰাৰ ফলত পদচ্যুত প্ৰধানমন্ত্ৰী শ্বেখ হাছিনাৰ তুলনাত মুখ্য উপদেষ্টা মহম্মদ ইউনুছৰ পৰিণতি অধিক ভয়াৱহ হ’ব পাৰে।

যোৱা এবছৰ ধৰি বাংলাদেশত শাসন চলাই আহিছে ইউনুছে। শ্বেখ হাছিনাই দেশ এৰি পলায়ন কৰাৰ পিছত ক্ষমতা দখল কৰি কৈছিল যে ৬ মাহৰ পিছত দেশত নিৰ্বাচন অনুষ্ঠিত হ’ব। কিন্তু পৰৱৰ্তী সময়ত নিৰ্বাচন অনুষ্ঠিত নোহোৱাত দেশৰ ৰাজনৈতিক দলসমূহে ইউনুছৰ বিৰুদ্ধে প্ৰতিবাদ কৰিবলৈ আৰম্ভ কৰে। তাৰ পিছত ইউনুছে নিৰ্বাচনৰ তাৰিখ ঘোষণা কৰিবলৈ বাধ্য হয়।

শনিবাৰে কাদৰিয়া বাহিনী স্বাধীনতা সংগ্ৰামীসকলৰ মকৰাই দিৱস উদযাপনত কাদেৰ ছিদ্দিকীয়ে কয় যে, “মই অধ্যাপক ইউনুছক সন্মান কৰো, কিন্তু ফেব্ৰুৱাৰী মাহত যদি নিৰ্বাচন অনুষ্ঠিত নহয় তেন্তে আপোনাৰ ভাগ্য শ্বেখ হাছিনাৰ তুলনাত দহগুণ বেয়া হ’ব।”

ইউনুছৰ শিষ্যকো আক্ৰমণ

কাদেৰে তেওঁৰ ভাষণত ইউনুছক আক্ৰমণ কৰাৰ লগতে তেওঁৰ ঘনিষ্ঠ সহায়ক নাহিদ ইছলামক সম্বোধন কৰি কয়, “যদি বংগবন্ধু ৰাষ্ট্ৰপিতা নহয়, তেন্তে আপোনাৰ পিতৃ কোন? কথা কোৱাৰ আগতে ভালদৰে চিন্তা কৰক।” বাংলাদেশৰ ঐতিহ্যৰ ওপৰত হোৱা আক্ৰমণক গৰিহণা দি তেওঁ এই কথা কয়। কাৰণ শেহতীয়াকৈ শ্বেখ মুজিবুৰ ৰহমানক অপমান কৰিছিল বাংলাদেশৰ আভ্যন্তৰীণ চৰকাৰে।

শ্বেখ হাছিনাক বহিষ্কাৰ কৰাটো আল্লাহৰ ইচ্ছা, ইউনুছৰ নহয় – কাদেৰ

বৈষম্য বিৰোধী আন্দোলনক সমৰ্থন কৰাৰ সময়ত কাদেৰে জোৰ দি কয়, “শ্বেখ হাছিনাক বহিষ্কাৰ কৰাটো আল্লাহৰ ইচ্ছাৰ বাবেই হৈছে, আন কাৰো উদ্দেশ্যৰ বাবে নহয়।” তেওঁ স্পষ্ট কৰি দিয়ে যে সেয়া নাহিদ বা ইউনুছৰ ইচ্ছা নহয়, কিন্তু মানুহ ৰাজপথলৈ ওলাই অহাৰ বাবেই এনেকুৱা হৈছিল। লগতে তেওঁ কয়, “যদি আপুনি শ্বেখ হাছিনাৰ বিৰুদ্ধে কিবা ভুল কৰিবলৈ চেষ্টা কৰে তেন্তে মই জীয়াই থকালৈকে তাৰ বিৰুদ্ধে যুঁজিম।”

আইন অনুসৰি হাছিনাৰ বিৰুদ্ধে ব্যৱস্থা গ্ৰহণ কৰিব লাগে

শ্বেখ হাছিনাৰ শাস্তিৰ দাবী সন্দৰ্ভত ভাষণ দি কাদেৰে কয়, ঠশ্বেখ হাছিনাৰ সিদ্ধান্ত আইন অনুসৰি হ’ব লাগে, আৰু প্ৰয়োজন হ’লে শাস্তি দিব লাগে।ঠ তেওঁ কয়, “শ্বেখ মুজিবুৰ ৰহমান আৰু শ্বেখ হাছিনা একে নহয়। বাংলাদেশ যেতিয়ালৈকে থাকিব তেতিয়ালৈকে জয় বাংলা থাকিব।” তেওঁ আৰু কয়, “যদি কোনোবাই তেওঁৰ বিৰুদ্ধে কিবা ভুল কৰিবলৈ চেষ্টা কৰে, তেন্তে মই জীয়াই থকালৈকে তেওঁৰ বিৰুদ্ধে যুঁজিম।”

লগতে পঢ়ক: নিজৰ দেশতে বিমান আক্ৰমণ সেনাৰ, ২১ জন নিহত…