গুৰুতৰভাৱে অসুস্থ বাংলাদেশৰ প্ৰাক্তন প্ৰধানমন্ত্ৰী এইগৰাকী নেত্ৰী, লণ্ডনলৈ স্থানান্তৰৰ প্ৰস্তুতি

বাংলাদেশৰ প্ৰাক্তন প্ৰধানমন্ত্ৰী তথা বিএনপি (বাংলাদেশ নেচনেলিষ্ট পাৰ্টি)ৰ অধ্যক্ষ খালেদা জিয়াৰ স্বাস্থ্যৰ পুনৰ অৱনতি ঘটিছে। ঢাকাৰ এভাৰকেয়াৰ হাস্পতালত ভৰ্তি কৰোৱা খালেদা জিয়াক এইবাৰ হাওঁফাওঁ আৰু হৃদযন্ত্ৰৰ গুৰুতৰ সংক্ৰমণৰ বাবে জৰুৰীকালীন কক্ষলৈ অনা হয়। বাতৰি অনুসৰি তেওঁৰ পৰিয়ালে তেওঁক চিকিৎসাৰ বাবে লণ্ডনলৈ উৰাজাহাজেৰে লৈ যোৱাৰ প্ৰস্তুতি আৰম্ভ কৰিছে। মেডিকেল ব’ৰ্ডৰ অনুমোদনৰ বাবে অপেক্ষা কৰি আছে।

বিএনপিৰ মুৰব্বীগৰাকীৰ পৰিয়াল আৰু দলৰ সূত্ৰ অনুসৰি খালেদা জিয়াক চলিত বৰ্ষৰ জানুৱাৰী মাহত চিকিৎসা গ্ৰহণ কৰা লণ্ডনৰ একেখন চিকিৎসালয়তে ভৰ্তি কৰাৰ পৰিকল্পনা চলি আছে। তেওঁৰ চিকিৎসাৰ বাবে নিযুক্তি দিয়া মেডিকেল ব’ৰ্ডৰ চিকিৎসকসকল লণ্ডনস্থিত বিশেষজ্ঞৰ সৈতে অহৰহ যোগাযোগত থাকে। এয়াৰ এম্বুলেন্সৰ ব্যৱস্থা সন্দৰ্ভতো কাটাৰ চৰকাৰৰ সৈতে আলোচনা কৰা হৈছে।

হাওঁফাওঁ আৰু হৃদযন্ত্ৰৰ গুৰুতৰ সংক্ৰমণ, সংকটজনক অৱস্থা

দেওবাৰে উশাহ-নিশাহৰ তীব্ৰ সমস্যাত ভোগাৰ পাছতেই খালেদা জিয়াক চিকিৎসালয়লৈ অনা হয়। তথ্য অনুসৰি তেওঁৰ হাওঁফাওঁ আৰু হৃদযন্ত্ৰৰ গুৰুতৰ সংক্ৰমণ হৈছে। খালেদা জিয়াৰ অৱস্থা সংকটজনক যদিও বৰ্তমান সুস্থিৰ।

অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে খালেদা জিয়াৰ স্বাস্থ্যৰ অৱনতি ঘটাক লৈ গভীৰ উদ্বেগ প্ৰকাশ কৰিছে। লগতে তেওঁৰ আশু আৰোগ্যৰ বাবে প্ৰাৰ্থনা কৰিবলৈ জনসাধাৰণক আহ্বান জনাইছে। শনিবাৰে অন্তৱৰ্তীকালীন চৰকাৰৰ পৰামৰ্শদাতা পৰিষদৰ এক বিশেষ বৈঠকত খালেদা জিয়াৰ বাবে প্ৰাৰ্থনা কৰে। ৰাষ্ট্ৰপতি মহম্মদ ছাহাবুদ্দিনেও তেওঁৰ অৱনতি ঘটা অৱস্থাক লৈ গভীৰ উদ্বেগ প্ৰকাশ কৰিছে।

বহু বছৰ ধৰি গুৰুতৰ ৰোগৰ সৈতে যুঁজি আছে

দীৰ্ঘদিন ধৰি কেইবাটাও জটিল ৰোগৰ সৈতে যুঁজি আহিছে খালেদা জিয়াই।

• লিভাৰ চিৰ’চিছ
• ডায়েবিটিছ
• হৃদৰোগ (তিনিটা ব্লক, পেচমেকাৰ স্থাপন)
• বৃক্ক আৰু হাওঁফাওঁৰ সমস্যা
• চকুৰ ৰোগ

২০২১ চনতো তেওঁ ক’ভিডত আক্ৰান্ত হৈছিল, তাৰ পিছতো কেবাবাৰো স্বাস্থ্যৰ অৱনতি ঘটিছিল।

মুক্তিৰ পৰা বৰ্তমানৰ সংকটলৈকে, এক দৃষ্টিত এক যাত্ৰা

১৯৯১ চনৰ পৰা ১৯৯৬ চনলৈ আৰু ২০০১ চনৰ পৰা ২০০৬ চনলৈ দুবাৰ বাংলাদেশৰ প্ৰধানমন্ত্ৰী হিচাপে কাৰ্যনিৰ্বাহ কৰা খালেদা জিয়া প্ৰাক্তন ৰাষ্ট্ৰপতি জিয়াউৰ ৰহমানৰ পত্নী। ১৯৮১ চনৰ ৩০ মে’ত ৰহমানক হত্যা কৰা হয়। স্বামীৰ মৃত্যুৰ পিছত বিএনপি দলটো বিভাজিত হ’বলৈ ধৰে আৰু দলৰ নেতাসকলে খালেদাক নেতৃত্ব ল’বলৈ মান্তি কৰে। প্ৰথম অৱস্থাত তেওঁ অনিচ্ছুক আছিল যদিও ১৯৮৪ চনত খালেদা জিয়াই দলৰ দায়িত্ব লয়।

২০১৮ চনত দুৰ্নীতিৰ গোচৰত দোষী সাব্যস্ত হোৱাৰ পিছত কাৰাগাৰত থকা খালেদা জিয়াক পৰৱৰ্তী সময়ত স্বাস্থ্যজনিত কাৰণত বিশেষ চৰ্তত মুকলি কৰি দিয়া হয়। ৰাজনৈতিক সংকটৰ সময়ত ২০২৪ চনৰ ৬ আগষ্টত সকলো শাস্তিৰ পৰা মুকলি কৰি দিয়া হৈছিল খালেদা জিয়াক। তেতিয়াৰ পৰাই চিকিৎসালয় আৰু ঘৰৰত চিকিৎসা গ্ৰহণ কৰি আহিছে নেত্ৰীগৰাকীয়ে।