IND vs UAE: সহজ জয়েৰে এছিয়া কাপৰ অভিযান আৰম্ভ ভাৰতৰ, ৯ উইকেটত পৰাস্ত UAE

এছিয়া কাপ ২০২৫ৰ গ্ৰুপ এৰ প্ৰথমখন খেল ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত ভাৰত আৰু সংযুক্ত আৰব আমিৰশ্বাহীৰ দলৰ মাজত অনুষ্ঠিত হয়। এই মেচখনত ভাৰতীয় দলটোৱে নিজৰ উজ্জ্বল বেটিং আৰু বলিঙেৰে ইউ এ ইক পৰাস্ত কৰি জয়েৰে প্ৰতিযোগিতাখন আৰম্ভ কৰে। অভিষেক শৰ্মা আৰু শুভমন গিলৰ যুটিয়ে একপক্ষীয় কৰি তোলা এই মেচখনত ভাৰতে জয়ৰ বাবে এটা সৰু টাৰ্গেট লাভ কৰিছিল।

মেচখনত ছত জয়লাভ কৰি প্ৰথমে বলিং কৰাৰ সিদ্ধান্ত লয় ভাৰতে। শক্তিশালী আৰম্ভণিৰে বিপক্ষ দলটোক হেঁচা প্ৰয়োগ কৰে। ভাৰতীয় বলাৰসকলে উজ্জ্বল প্ৰদৰ্শন আগবঢ়াই ইউ এ ইৰ বেটছমেনসকলক ৰান সংগ্ৰহৰ বিশেষ সুযোগ নিদিলে। দলটোক প্ৰথমটো সফলতা দিয়ে যশপ্ৰীত বুমৰাহে আৰু এটাৰ পিছত আনটো উইকেট পৰিবলৈ ধৰে । ইউ এ ইৰ হৈ অ’পেনাৰ আলিশান শৰাফুৱে সৰ্বাধিক ২২ ৰান আৰু অধিনায়ক মহম্মদ ৱাছিমে ১৯ ৰান সংগ্ৰহ কৰে। এই যুটিৰ বাহিৰে কোনো বেটছমেনে ১০ ৰানৰ নিৰ্দিষ্ট স্থান স্পৰ্শ কৰিব নোৱাৰিলে।

ভাৰতৰ সকলো বলাৰেই অতি সুন্দৰভাৱে বলিং কৰিছিল। বিশেষকৈ কুলদীপ যাদৱ আৰু শিৱম ডুবে আটাইতকৈ সফল হৈছিল। কুলদীপ যাদৱে ২.১ অভাৰত মাত্ৰ ৭ ৰান দি ৪ জন বেটছমেনক পেভিলিয়নৰ ৰাস্তা দেখুৱাইছিল। একে সময়তে শিৱম ডুবেইও মাত্ৰ ২ অভাৰত বলিং কৰি ৪ ৰান দি ৩ জন আউট কৰে। ইয়াৰ উপৰিও যশপ্ৰীত বুমৰাহ, অক্ষৰ পেটেল আৰু বৰুণ চক্ৰৱৰ্তীয়ে ১-১ উইকেট দখল কৰিবলৈ সক্ষম হয়।

এই মেচখনত জয়ী হ’বলৈ মাত্ৰ ৫২ ৰানৰ লক্ষ্য লাভ কৰিছিল টীম ইণ্ডিয়াই। ভাৰতৰ হৈ অভিষেক শৰ্মা আৰু শুভমন গিলে ইনিংছ প্ৰথম বলৰ পৰাই আগ্ৰাসী ৰূপত ইনিংছ আৰম্ভ কৰে। অভিষেক শৰ্মাই ১৫টা বলত ৩০ ৰানৰ ইনিংছ  খেলিছিল, য’ত ২টা চাৰি আৰু ৩টা ছিক্স আছিল। একে সময়তে শুভমন গিলে ৮ বলত ১৬ ৰানৰ অপৰাজিত ইনিংছ খেলিছিল। অধিনায়ক সূৰ্যকুমাৰ যাদৱে ১টা বল খেলি ছিক্সাৰ মাৰে। যাৰ বাবে ভাৰতে মাত্ৰ ৪.৩ অভাৰত ১ উইকেট হেৰুৱাই এই লক্ষ্যত উপনীত হয়।