গৰমৰ দিনত অত্যাধিক ঘাম ওলোৱাটো কিমান বিপদজ্জনক? জানক ইয়াৰ কাৰণ আৰু নিয়ন্ত্ৰণৰ উপায়…
গ্ৰীষ্মকালত শৰীৰৰ ঘাম ওলোৱাটো এটা সাধাৰণ কথা, কিন্তু যদি অত্যধিক ঘাম ওলায় তেন্তে ই বিপদৰ সংকেত। অত্যধিক ঘাম ওলোৱাৰ ফলত বহু ৰোগৰ জন্ম হয়। এনে পৰিস্থিতিত কিছু সাৱধানতা অৱলম্বন কৰি আমি এই বিপদবোৰৰ পৰা আঁতৰি থাকিব পাৰো। বিশেষজ্ঞসকলৰ পৰা প্ৰতিৰোধৰ উপায়সমূহ জানো আহক।
গ্ৰীষ্মকাল অহাৰ লগে লগে বহু ৰোগৰ আশংকা বাঢ়ি যায়। বিশেষকৈ ছালৰ লগত জড়িত ৰোগবোৰ সাধাৰণ হৈ পৰে। গৰম বৃদ্ধিৰ বাবে শৰীৰৰ পৰা ঘাম প্ৰচুৰ পৰিমাণে ববলৈ আৰম্ভ কৰে। ঘাম ওলোৱাটো স্বাভাৱিক যদিও যেতিয়া অত্যাধিক ঘাম ওলাবলৈ আৰম্ভ কৰে তেতিয়া ই বিপদৰ সংকেত হ’ব পাৰে। চিকিৎসকৰ মতে, অত্যধিক ঘামৰ ফলত বহু ৰোগ আৰু সমস্যাৰ সৃষ্টি হ’ব পাৰে। এই সমস্যাবোৰ কি হ’ব পাৰে আৰু আমি কেনেকৈ ইয়াৰ পৰা হাত সাৰিব পাৰো জানো আহক।
শৰীৰত পানী আৰু নিমখৰ অভাৱ
যেতিয়া আমি বহুত ঘাম ওলায় তেতিয়া কেৱল পানীয়েই নহয়, ছডিয়াম, পটাছিয়াম আৰু ক্লৰাইডৰ দৰে প্ৰয়োজনীয় খনিজ পদাৰ্থও শৰীৰৰ পৰা ওলাই যায়। ইয়াৰ ফলত ডিহাইড্ৰেচন আৰু ইলেক্ট্ৰলাইটৰ অভাৱ হ’ব পাৰে। ইয়াৰ লক্ষণসমূহ হ’ল দুৰ্বলতা, মূৰৰ বিষ, মূৰ ঘূৰোৱা, মুখ শুকান আৰু ভাগৰুৱা।
হিট ষ্ট্ৰোকৰ আশংকা
দীৰ্ঘসময় ৰ’দত থকা আৰু অত্যাধিক ঘাম ওলোৱাৰ বাবে শৰীৰৰ উষ্ণতা নিয়ন্ত্ৰণ নহয়, যাৰ ফলত হিট ষ্ট্ৰ’ক হ’ব পাৰে। ইয়াত শৰীৰৰ উষ্ণতা ১০৪ ডিগ্ৰী ফাৰেনহাইটৰ ওপৰলৈ যায় আৰু ব্যক্তিজন আনকি অচেতন হৈ পৰিব পাৰে। এই অৱস্থা মাৰাত্মক হ’ব পাৰে।
ছালৰ সংক্ৰমণ
সঘনাই ঘাম ওলোৱা আৰু তিতা কাপোৰে ছালত ভেঁকুৰ আৰু বেক্টেৰিয়াৰ সংক্ৰমণ বৃদ্ধি কৰে। ইয়াৰ ফলত ছালত খজুৱতি, জ্বলা-পোৰা, ৰঙা ফোহা বা গৰমৰ ফোহা হ’ব পাৰে। বাহুৰ তলৰ অংশ, কঁকাল আৰু উৰুৰ মাজৰ ছালত ইয়াৰ প্ৰাদুৰ্ভাৱ বেছি।
উচ্চ ৰক্তচাপ আৰু ভাগৰুৱা
গ্ৰীষ্মকালত শৰীৰৰ হৃদযন্ত্ৰই অধিক কষ্ট কৰে যাতে শৰীৰক শীতল কৰি ৰাখিব পাৰি। ইয়াৰ ফলত ৰক্তচাপ প্ৰভাৱিত হয় আৰু হৃদৰোগ থকা লোকৰ বাবে ইয়াৰ সম্ভাৱনা বৃদ্ধি পায়। ইয়াৰ উপৰিও অবিৰত ঘামৰ ফলত সোনকালে ভাগৰুৱা হৈ পৰে আৰু কাম কৰাৰ ক্ষমতাও কমি যায়।
নিজকে কেনেকৈ ৰক্ষা কৰিব?
হাইড্ৰেটেড হৈ থাকক: দিনটোৰ ভিতৰত প্ৰচুৰ পৰিমাণে পানী খাব লাগে। নেমু পানী, নাৰিকল পানী, বেলৰ চৰবত আদি প্ৰাকৃতিক পানীয় গ্ৰহণ কৰক। শৰীৰত থকা ইলেক্ট্ৰ’লাইট পুনৰ ভৰোৱাৰ বাবেও অ’ আৰ এছ গ্ৰহণ কৰিব পাৰি।
পাতল আৰু কপাহী কাপোৰ পিন্ধক: গৰমৰ দিনত ঢিলা কপাহী আৰু পাতল ৰঙৰ কাপোৰ পিন্ধক যাতে ঘাম সোনকালে শুকাই যায় আৰু ছালখনে উশাহ ল’ব পাৰে।
সঘনাই মুখ আৰু শৰীৰ ধুব লাগে: বাহিৰলৈ ওলোৱাৰ প্ৰয়োজন হ’লে ঘৰলৈ উভতি অহাৰ পিছত মুখ আৰু শৰীৰ ধুবলৈ নাপাহৰিব। ইয়াৰ ফলত ছালত জমা হোৱা ঘাম পৰিষ্কাৰ হয় আৰু সংক্ৰমণৰ সম্ভাৱনা কম হয়।
ছানস্ক্ৰীণ আৰু ছাতি ব্যৱহাৰ: প্ৰবল ৰ’দত ওলাই যোৱাৰ সময়ত ছাতি, টুপী বা ছানস্ক্ৰীণ ব্যৱহাৰ কৰিব লাগে যাতে সূৰ্যৰ ৰশ্মিয়ে শৰীৰত প্ৰত্যক্ষ প্ৰভাৱ নপৰে।
খাদ্যাভ্যাসৰ প্ৰতি গুৰুত্ব দিয়ক: গৰমৰ দিনত তেলীয়া, মছলাযুক্ত আৰু গধুৰ খাদ্য পৰিহাৰ কৰক। ফল-মূল আৰু শাক-পাচলি অধিক পৰিমাণে সেৱন কৰক যাতে শৰীৰে প্ৰয়োজনীয় পুষ্টি লাভ কৰি থাকে।
ডাক্তৰৰ পৰামৰ্শ
বিশেষজ্ঞসকলৰ মতে যদি গ্ৰীষ্মকালত অত্যধিক ঘাম ওলোৱাৰ লগে লগে সঘনাই মূৰ ঘূৰোৱা, দুৰ্বলতা বা ছালৰ বিষ হয়, তেন্তে ইয়াক সহজভাৱে ল’ব নালাগে। লগে লগে চিকিৎসকৰ লগত যোগাযোগ কৰক।
