অৰ্থনৈতিক উন্নয়নৰ ডাঙৰ চালিকা শক্তি হৈছে শক্তিশালী আন্তঃগাঁথনি: প্ৰধানমন্ত্ৰী
এটা অঞ্চলৰ উন্নয়নত আন্তঃগাঁথনিৰ গুৰুত্বৰ ওপৰত আলোকপাত কৰি তেওঁ কয় যে, এখন চহৰে যেতিয়া উন্নত সংযোগ লাভ কৰে তেতিয়াই নিজাববীয়াকৈ উন্নয়ন হ’বলৈ আৰম্ভ কৰে। প্ৰধানমন্ত্ৰী মোদীয়ে কয়, বিশ্বৰ উন্নত দেশসমূহত অৰ্থনৈতিক উন্নয়নৰ এটা ডাঙৰ কাৰণ হৈছে তেওঁলোকৰ আন্তঃগাঁথনি।
দ্ৰুতগতিত সলনি হৈছে ভাৰতীয় ৰে’লৱে ব্যৱস্থা। নতুন প্ৰযুক্তিৰ ব্যৱহাৰে এই ব্যৱস্থাৰ উন্নতিত অধিক অৰিহণা যোগাইছে। ভাৰতীয় ৰে’লৱেৰ পৰিৱৰ্তনৰ গুৰুত্বৰ ওপৰত আলোকপাত কৰি প্ৰধানমন্ত্ৰী নৰেন্দ্ৰ মোদীয়ে শনিবাৰে কয় যে, বন্দে ভাৰত, নমো ভাৰত, আৰু অমৃত ভাৰতৰ দৰে ৰে’লে ভাৰতীয় ৰে’লৱেৰ পৰৱৰ্তী জেনেৰেচনৰ ভেটি স্থাপন কৰিছে আৰু লগতে কয় যে, এতিয়া আনকি বিদেশী পৰ্যটকসকলেও বন্দে ভাৰতৰ ৰে’লসমূহ দেখি আচৰিত হৈ পৰিছে।
বাৰাণসীত চাৰিখন বন্দে ভাৰত এক্সপ্ৰেছ ৰে’লৰ ফ্লেগিং অফ অনুষ্ঠানত ভাষণ দি প্ৰধানমন্ত্ৰী মোদীয়ে দেশত এতিয়া ১৬০খনতকৈও অধিক বন্দে ভাৰত এক্সপ্ৰেছ ৰে’ল চলি থকা বুলি উল্লেখ কৰি এই সাফল্যৰ বাবে দেশৰ নাগৰিকক অভিনন্দন জনায়। “আজি বন্দে ভাৰত, নমো ভাৰত, আৰু অমৃত ভাৰতৰ দৰে ৰে’লে ভাৰতীয় ৰে’লৰ পৰৱৰ্তী জেনেৰেচনৰ বাবে ভেটি স্থাপন কৰিছে। বন্দে ভাৰত হৈছে ভাৰতীয়, ভাৰতীয়ৰ বাবে আৰু ভাৰতীয়ৰ দ্বাৰা নিৰ্মিত এখন ৰে’ল, যিটো প্ৰতিজন ভাৰতীয়ই গৌৰৱ কৰে। এতিয়া আনকি বিদেশী পৰ্যটকসকলেও বন্দে ভাৰতৰ ৰে’ল দেখি আচৰিত হয়।”
এটা অঞ্চলৰ উন্নয়নত আন্তঃগাঁথনিৰ গুৰুত্বৰ ওপৰত আলোকপাত কৰি তেওঁ কয় যে, এখন চহৰে যেতিয়া উন্নত সংযোগ লাভ কৰে তেতিয়াই নিজাববীয়াকৈ উন্নয়ন হ’বলৈ আৰম্ভ কৰে। প্ৰধানমন্ত্ৰী মোদীয়ে কয়, “বিশ্বৰ উন্নত দেশসমূহত অৰ্থনৈতিক উন্নয়নৰ এটা ডাঙৰ কাৰণ হৈছে তেওঁলোকৰ আন্তঃগাঁথনি। যিবোৰ দেশত উল্লেখযোগ্য উন্নয়ন হৈছে, সেইবোৰ দেশতে তেওঁলোকৰ অগ্ৰগতিৰ আঁৰৰ এটা ডাঙৰ চালিকা শক্তি হৈছে আন্তঃগাঁথনি উন্নয়ন।”
“যদি কোনো অঞ্চলত দীৰ্ঘদিন ধৰি ৰে’লপথৰ অভাৱ হয়, কিন্তু তাত ৰে’লপথ স্থাপন কৰাৰ লগে লগে সেই চহৰখন স্বয়ংক্ৰিয়ভাৱে উন্নয়ন আৰম্ভ হয়। এখন চহৰৰ উন্নয়ন ভাল সংযোগ লাভ কৰাৰ লগে লগে নিজাববীয়াকৈ আৰম্ভ হয়…আন্তঃগাঁথনি কেৱল বিশাল দলং আৰু ঘাইপথতে সীমাবদ্ধ নহয়…নিৰ্মাণ কৰা বিমানবন্দৰৰ সংখ্যা, চলি থকা বন্দে ভাৰত ৰে’লৰ সংখ্যা-এই সকলোবোৰ কথা উন্নয়নৰ সৈতে জড়িত,আৰু আজি ভাৰতো এই পথত অতি দ্ৰুতগতিত আগবাঢ়িছে।” এইদৰে কয় প্ৰধানমন্ত্ৰী মোদীয়ে।
প্ৰধানমন্ত্ৰী নৰেন্দ্ৰ মোদীয়ে বাৰাণসীৰ পৰা চাৰিখন নতুন বন্দে ভাৰত এক্সপ্ৰেছ ৰে’লৰ ফ্লেগ অফ কৰে, যিয়ে দেশৰ প্ৰধান অঞ্চলসমূহ সংযোগ কৰিব। বানাৰস-খাজুৰাহো, লক্ষ্ণৌ-চাহাৰানপুৰ, ফিৰোজপুৰ-দিল্লী আৰু এৰ্নাকুলাম-বাংগালুৰু পথত চলিব এই নতুন বন্দে ভাৰত এক্সপ্ৰেছ ৰে’ল।
