ৱেইটিং টিকটৰ যাত্ৰীসকলৰ বাবে ডাঙৰ সকাহ! ৰে’লৱেই সলনি কৰিলে চাৰ্টিং ব্যৱস্থা

চাৰ্টিং ব্যৱস্থাত এক বৃহৎ পৰিৱৰ্তন আনিছে ভাৰতীয় ৰে’লৱেই। ৰে’লৱেই ৱেইটিং টিকট থকাসকলক ডাঙৰ সকাহ দিছে আৰু চাৰ্ট প্ৰস্তুত কৰাৰ সময় বৃদ্ধি কৰিছে। এতিয়া ৰে’ল যাত্ৰাৰ ৮ ঘণ্টা পূৰ্বে প্ৰস্তুত কৰা হ’ব চাৰ্ট।

এতিয়ালৈকে ৰে’লৱেই ৰে’ল যাত্ৰাৰ ৪ ঘণ্টা আগতেই ৰিজাৰ্ভেচন চাৰ্ট প্ৰস্তুত কৰিছিল। যাৰ বাবে ৱেইটিং টিকটত থকা যাত্ৰীসকলে টিকট নিশ্চিত হোৱাৰ বাবে শেষ মুহূৰ্তলৈকে অপেক্ষা কৰিবলগীয়া হৈছিল। যাৰ বাবে ৰে’ল যাত্ৰাৰ বাবে দূৰৈৰ অঞ্চলৰ পৰা অহা  যাত্ৰীসকলৰ বাবে এয়া এক ডাঙৰ সমস্যা হৈ পৰে। এতিয়া পুৱা ২ বজাৰ আগতে যাত্ৰা কৰিবলগীয়া ৰে’লৰ বাবে এদিন আগতে নিশা ৯ বজাত এই চাৰ্ট প্ৰস্তুত কৰা হ’ব। বাকী ৰে’লসমূহৰ বাবে এতিয়া ৰে’ল যাত্ৰাৰ ৮ ঘণ্টা পূৰ্বে প্ৰস্তুত কৰা হ’ব চাৰ্ট।

এই পৰিৱৰ্তনৰ লগে লগে ৱেইটিঙত থকা যাত্ৰীসকলে সময়মতে তথ্য লাভ কৰিব, যাতে তেওঁলোকে বিকল্প ভ্ৰমণ পৰিকল্পনা কৰিব পাৰে। বিশেষকৈ গ্ৰাম্য অঞ্চল বা চহৰৰ পৰা দূৰৰ অঞ্চলৰ পৰা অহা যাত্ৰীসকলে ইয়াৰ পৰা ডাঙৰ সুবিধা লাভ কৰিব।

এই সুবিধাও আৰম্ভ কৰা হ’ব

ৰে’লৱেই অতি সোনকালে নতুন আৰু আধুনিক যাত্ৰী সংৰক্ষণ ব্যৱস্থা (PRS) আৰম্ভ কৰিবলৈ ওলাইছে, যিটো ২০২৫ চনৰ ডিচেম্বৰৰ ভিতৰত আৰম্ভ হ’ব। এই প্ৰকল্পটো চেণ্টাৰ ফৰ ৰে’লৱে তথ্য ব্যৱস্থা (CRIS)ৰ দ্বাৰা চলাই থকা হৈছে। নতুন পি আৰ এছ ব্যৱস্থাৰ জৰিয়তে এক মিনিটত ডেৰ লাখতকৈ অধিক টিকট বুকিং কৰিব পৰা যাব, যিটো বৰ্তমান প্ৰতি মিনিটত ৩২ হাজাৰ টিকটতকৈ প্ৰায় পাঁচগুণ বেছি। লগতে টিকট অনুসন্ধান ব্যৱস্থাও উন্নীত কৰা হ’ব, য’ত অনুসন্ধানৰ ক্ষমতা প্ৰতি মিনিটত ৪ লাখৰ পৰা ৪০ লাখলৈ বৃদ্ধি পাব। ইয়াৰ দ্বাৰা লাখ লাখ যাত্ৰীয়ে ৰিয়েল টাইম বুকিং তথ্য লাভ কৰিব।

ইয়াৰ উপৰিও ২০২৫ চনৰ ১ জুলাইৰ পৰা তৎকাল বুকিঙৰ বাবে আধাৰ লিংক কৰাটো প্ৰয়োজনীয় হ’ব। তৎকাল কোটাত টিকট বুকিং কৰিবলৈ যাত্ৰীসকলে বুকিং কৰাৰ সময়ত আধাৰৰ সবিশেষ দিব লাগিব। ৰে’লৱেই ২৬ বিত্তীয় বৰ্ষত প্ৰায় ৭.৫৭ বিলিয়ন যাত্ৰীয়ে যাত্ৰা কৰিব বুলি আশা প্ৰকাশ কৰিছে।  যিটো ২৫ বিত্তীয় বৰ্ষত ৭.২৭ বিলিয়ন যাত্ৰী অধিক।