জীৱিকা সখীসকল সকলোতে মূলাগাভৰু হ’ব লাগিব: স্কুটাৰ বিতৰণ অনুষ্ঠানত কেইবাটাও ঘোষণা মুখ্যমন্ত্রীৰ

খানাপাৰাৰ পশুচিকিৎসা বিজ্ঞান মহাবিদ্যালয় খেলপথাৰত আয়োজিত এক বিশেষ অনুষ্ঠানত উপস্থিত থাকে মুখ্যমন্ত্রী ড° হিমন্ত বিশ্ব শৰ্মা। এই অনুষ্ঠানত  ‘সখী এক্সপ্ৰেছ’ আঁচনিৰ অধীনত ৰাজ্যিক জীৱিকা অভিযানৰ ৯,৭০৪ গৰাকী ‘কমিউনিটি কেডাৰলৈ স্কুটাৰ প্ৰদান আৰু আজীৱিকা গ্রামীণ এক্সপ্ৰেছ যোজনাৰ অধীনত ‘ক্লাষ্টাৰ লেভেল ফেডাৰেশ্যন লৈ ৫১ খন ব্যৱসায়িক বাহন প্রদান কাৰ্যসূচীৰ আনুষ্ঠানিক শুভাৰম্ভ কৰে।

উল্লেখ্য যে, ৰাজ্য চৰকাৰে ২০২০-২১ বৰ্ষৰ বাজেটত সকলো জীৱিকা সখীক স্কুটাৰ প্ৰদানৰ উদ্দেশ্যে সখী এক্সপ্ৰেছ নামৰ এখন আঁচনি গ্ৰহণৰ কথা ঘোষণা কৰিছিল। ২০২২-২৩ বর্ষত এই পদক্ষেপৰ সম্প্ৰসাৰণ ঘটাই জীৱিকা সখীৰ উপৰি পশু সখী, কৃষি সখী, বেংক সখী, বীমা সখী, চিআৰপি-এণ্টাৰপ্ৰাইজ প্রমোশ্যন, মাষ্টাৰ বুক কিপাৰ, ইণ্টাৰনেল মেণ্টৰ, এমচিপি ট্রেইনাৰ, বিডিএছপি আদি সকলো কেডাৰকে কমিউনিটি কেডাৰ হিচাপে সামৰি লোৱা হয়। আঁচনিখনৰ অধীনত ২০২০-২১ আৰু ২০২১-২২ বৰ্ষত ১০,৯০৮ গৰাকী কমিউনিটি কেডাৰে স্কুটাৰ লাভ কৰা বিপৰীতে ২০২৪-২৫ আৰু ২০২৫-২৬ বিত্তীয় বৰ্ষৰ বাবে আজি ৯,৭০৪ গৰাকী সামুহিক কেডাৰক স্কুটাৰ প্ৰদানৰ প্ৰক্ৰিয়া আনুষ্ঠানিকভাৱে শুভাৰম্ভ কৰা হয়।

এই প্ৰয়াসৰ আধাৰত আজীৱিকা গ্রামীণ এক্সপ্ৰেছ যোজনাৰ জৰিয়তে প্রায় ৪ কোটি টকা ব্যয়েৰে ১০ খন জিলাৰ ১৫ টা উন্নয়ন খণ্ড সামৰি ৫১ খন ব্যৱসায়িক বাহনৰ সেৱা আৰম্ভ কৰাৰ পদক্ষেপ গ্রহণ কৰা হৈছে। ৫১ টা ক্লাষ্টাৰ লেভেল ফেডাৰেশ্যনক উপকৃত কৰিব এই আঁচনিখনে । এই উপলক্ষে প্রদান কৰা ভাষণত মুখ্যমন্ত্রী ড° শৰ্মাই কয়, “এখন ৰাজ্যই বিকাশ আৰু প্ৰগতিৰ দিশত আগবাঢ়ি যোৱাত মহিলাসমাজে গুৰুত্বপূর্ণ ভূমিকা গ্রহণ কৰে। বৰ্তমানৰ ৰাজ্য চৰকাৰখনে সেয়ে মহিলা সবলীকৰণৰ দিশত সর্বাধিক গুৰুত্ব আৰোপ কৰি বহুকেইখন গুৰুত্বপূৰ্ণ আঁচনি গ্রহণ কৰিছে।”

মুখ্যমন্ত্রীয়ে ঘোষণা কৰে যে জীৱিকা সখীসকলে মুখ্যমন্ত্রী উদ্যমিতা অভিযানৰ অধীনত এইবাৰ ১৫ হাজাৰ টকা লাভ কৰাৰ বিপৰীতে অহা বৰ্ষত ৪০ হাজাৰ টকাকৈ লাভ কৰিব। এই ধনৰাশিৰ ২০ হাজাৰ টকা ৰাজ্য চৰকাৰে আৰু অৱশিষ্ট ২০ হাজাৰ টকা বেংকৰ জৰিয়তে ঋণ হিচাপে আগবঢ়োৱা হ’ব। এই ঋণৰ সুদ চৰকাৰে বহন কৰিব বুলিও তেওঁ ঘোষণা কৰে। তেওঁ কয়- ‘এই কমিউনিটি কেডাৰসকল হৈছে সমাজৰ আদর্শস্বৰূপ। সেয়ে তেওঁলোকে সন্তানৰ সংখ্যা সীমিত ৰাখি উপযুক্ত শিক্ষাৰ ব্যৱস্থা কৰা আদিৰ দিশতো বিশেষ গুৰুত্ব আৰোপ কৰিব লাগিব। আমাৰ জীৱিকা সখীসকল সকলোতে মূলাগাভৰু হ’ব লাগিব। আমি বিচাৰিছোঁ, প্ৰতিটো পৰিয়ালত যিকোনো সিদ্ধান্ত লোৱাৰ সময়ত যাতে মহিলাসকলে নিজৰ অভিমত দাঙি ধৰিব পাৰে।’

ভাষণত মুখ্যমন্ত্রীয়ে বাল্য বিবাহ ৰোধৰ দিশতো গুৰুত্ব প্রদান কৰিবলৈ জীৱিকা সখীসকলক আহ্বান জনায়। অনুষ্ঠানত মুখ্যমন্ত্রীয়ে ঘোষণা কৰে যে যিসকল জীৱিকা সখীয়ে বিভিন্ন কাৰণত এতিয়ালৈকে অৰুণোদয় আঁচনিৰ সুবিধা লাভ কৰা নাই, তেনে প্ৰতিগৰাকী মহিলাকে আঁচনিখনৰ সুবিধা পোনপটীয়াকৈ প্ৰদান কৰা হ’ব আৰু তেওঁলোকে আঁচনিখনৰ অধীনত প্ৰতিটো ৰন্ধন গেছৰ চিলিণ্ডাৰৰ বাবদ ২৫০ টকাৰ ৰাজসাহায্যও লাভ কৰিব।  তেওঁ লগতে ৰাজ্যিক জীৱিকা অভিযানৰ অধীনত স্কুটাৰ লাভকৰা সকলো কমিউনিটি কেডাৰক হেলমেট পৰিধান কৰিহে বাহনসমূহ চলাবলৈ আহ্বান জনায় আৰু কয় যে এতিয়াৰে পৰা কমিউনিটি কেডাৰৰ সকলো ‘সখী’য়ে সমান সা-সুবিধা লাভ কৰিব।

লগতে পঢ়ক: খাবলৈ নাপালে বঢ়া ভাত! পত্নীৰ সন্মুখতে স্বামীক হত্যা কৰি…নলবাৰীত ভয়ংকৰ ঘটনা