চুমিৰ সন্ধান নাই, বায়েকক এৰি অকলেই জে’ললৈ গ’ল বিশাল!

ন্যায়িক জিম্মালৈ প্ৰেৰণ কৰা হ’ল প্ৰৱঞ্চক বিশাল ফুকনক। আৰক্ষীৰ জিম্মাৰ ম্যাদ উকলি যোৱাৰ পাছত আজি আদালতত হাজিৰ কৰোৱা হৈছিল বিশালক।  আৰক্ষীয়ে জিম্মাত নিবিচৰাত ডিব্ৰুগড় কেন্দ্ৰীয় কাৰাগাৰলৈ প্ৰেৰণ কৰে বিশালক। ৬দিন ধৰি মাৰাথন জেৰা চলোৱা হৈছিল বিশাল ফুকনক। কিন্তু আৰক্ষীৰ তথ্য অনুসৰি জেৰাত চুমি বৰাৰ বিষয়ে একো কথাই নক’লে বিশালে।

৪ ছেপ্টেম্বৰত ৩ দিনৰ আৰক্ষীৰ জিম্মালৈ প্ৰেৰণ কৰা হৈছিল বিশাল ফুকনক। আদালতত হাজিৰৰ পাছতে ডিব্ৰুগড় আৰক্ষীয়ে ৩ দিনৰ আৰক্ষীৰ জিম্মাত বিচাৰি আদালতক জনাইছিল আবেদন আৰক্ষীৰ আবেদনক মঞ্জুৰ কৰি বিশালক ৩ দিনৰ আৰক্ষীৰ জিম্মালৈ প্ৰেৰণ কৰিছিল আদালতে। শ্বেয়াৰ মাৰ্কেটত নিশ্চিত ৰিটাৰ্ণৰ নামত প্ৰৱঞ্চনাৰে ধন ঘটিছিল বিশালে। বিশালৰ বাসগৃহৰ পৰা উদ্ধাৰ হৈছিল আৰবীয় মুদ্ৰা। বিদেশী মুদ্ৰাৰ ব্যৱসায়ৰ সৈতেও বিশাল জড়িত থকাৰ সন্দেহ। বিশাল ফুকনে নীতিবহিৰ্ভূতভাৱে ফৰেক্স ট্ৰেড কৰাৰ সন্দেহ।

বিশাল নামৰ ২২ বছৰীয়া প্ৰৱঞ্চকটোৱে বিনিয়োগকাৰীক অধিক ধন লাভৰ আশা দেখুৱাই প্ৰৱঞ্চনাৰ জালত পেলাইছিল। ষ্টকত বিনিয়োগৰ নামত শ শ কোটি টকা লুণ্ঠন কৰা বিশাল ফুকনক সোমবাৰে গ্ৰেপ্তাৰ কৰে আৰক্ষীয়ে। বিশাল ফুকনৰ ডিব্ৰুগড়়ৰ বাসগৃহত আৰক্ষীয়ে তালাচী অভিযান চলোৱাৰ লগতে তেওঁৰ আন এজন সহযোগীকো গ্ৰেপ্তাৰ কৰিছিল। অভিযোগ অনুসৰি বিশালে বিনিয়োগকাৰীক দুগুণ ধন ঘূৰাই দিয়াৰ চলেৰে কোটি কোটি টকা লুটিছিল।

অতি বিলাসী জীৱন আছিল বিশালৰ। সঘনাই স্কাই ডাইভিঙত যোৱা বিশালৰ বিলাসীকতাৰ অন্ত নাই। ২০২৩ চনত বিশালৰ মাতৃয়ে ক্ৰয় কৰিছিল ২৩ লাখ টকীয়া বিলাসী গাড়ী। ইয়াৰ পূৰ্বেও মন গলেই গাড়ী ক্ৰয় কৰিব পৰাকৈ ধন আছিল বিশালৰ। এনেকৈয়ে বিশাল হৈ পৰিছিল প্ৰায় ২০০০ কোটি টকাৰ মালিক। পাতি লোৱা ভায়েক বিশালে চুমি বৰাৰ নামতো খৰচ কৰিছিল কোটি কোটি টকা। আনৰ টকাৰেই বিশালে স্থাপন কৰিছিল তিনিটাকৈ কোম্পানী। লগতে ঘৰ-মাটি-গাড়ীকে ধৰি কোটি কোটি টকাৰ সম্পত্তিৰ পাহাৰ গঢ়িছিল বিশাল ফুকনে

কোটি টকীয়া প্ৰৱঞ্চনাৰে নাম সাঙোৰ খাইছিল অভিনেত্ৰী, নৃত্যশিল্পী চুমি বৰাৰ। বিশালক গ্ৰেপ্তাৰৰ পাছৰে পৰা পলাতক হৈ আছে চুমি বৰা। অসম আৰক্ষীয়ে চুমি বৰাক আত্মসমৰ্পণ কৰিবলৈ দিছে যদিও এতিয়ালৈকে আত্মসমৰ্পণ কৰা নাই চুমিয়ে। চুমিৰ লগতে সন্ধান নাই স্বামী তাৰ্কিক বৰাৰো। দুয়োৰে সন্ধান অভিযান অব্যাহত আছে আৰক্ষীৰ।

লগতে পঢ়ক: মানসিকভাৱে বহুত কষ্ট পাইছোঁ, দুৰ্বল হৈ গৈছোঁ: ফেচবুকযোগে দীক্ষুৱে দিলে স্পষ্টীকৰণ