মানসিকভাৱে বহুত কষ্ট পাইছোঁ, দুৰ্বল হৈ গৈছোঁ: ফেচবুকযোগে দীক্ষুৱে দিলে স্পষ্টীকৰণ

আজি পুনৰ আদালতত হাজিৰ কৰোৱা হ’ব বিশাল ফুকনক। ডিব্ৰুগড় আৰক্ষীৰ জিম্মাত আছে প্ৰৱঞ্চক বিশাল ফুকন। পূৰ্বে ৩ দিনৰ জিম্মাত লৈছিল আৰক্ষীয়ে। ম্যাদ উকলাত আজি পুনৰ আদালতত হাজিৰ কৰাব আৰক্ষীয়ে। বিশালক পুনৰ আৰক্ষীৰ জিম্মাত বিচৰাৰ সম্ভাৱনা। আৰক্ষীৰ জেৰাত বিশাল ফুকনে ফাদিল কৰিছে প্ৰৱঞ্চনাৰ বহু তথ্য।

আৰক্ষীৰ জিম্মাত থকা চুমিৰ বনাই লোৱা ভাতৃ বিশাল ফুকনে কৈ গৈছে বহুতো চিনাকি মুখৰ নাম। য’ত ৰাজ্যৰ বিভিন্ন ক্ষেত্ৰৰ লগতে সাংস্কৃতিক জগতখনক টাৰ্গেট কৰি কোটি কোটি টকা সংগ্ৰহৰ ভয়ংকৰ তথ্য ফাদিল হৈছে। বিশাল ফুকনে আৰক্ষীৰ জেৰাত একাংশ অভিনেতা-অভিনেত্ৰী আৰু সংগীতশিল্পীৰ নাম লোৱা বুলি খবৰ প্ৰকাশৰ পাছতেই সাংস্কৃতিক জগতত উঠিছে কঁপনি। অৱশ্যে এতিয়াও পলাতক বিশাল ফুকনৰ সহযোগী চুমী। বিগত ৬ দিন ধৰি খবৰ নাই পলাতক চুমি বৰাৰ লগতে স্বামী তাৰ্কিকৰ। বহু লোকৰ পৰা কৌশলেৰে ধন আত্মসাৎ কৰা দুয়োৰে আজিলৈকে নাই সন্ধান।

ইফালে পুনৰ আৰক্ষীৰ জিম্মালৈ স্বপ্ননীল দাস। ৩ দিনৰ আৰক্ষীৰ জিম্মাত দিছে আদালতে। ট্ৰেডিং কেলেংকাৰিৰ গোচৰত গ্ৰেপ্তাৰ হৈছিল স্বপ্ননীল দাস। একাংশ বিনিয়োগকাৰীয়ে আনিছিল গুৰুতৰ অভিযোগ। মালয়েছিয়া, ডুবাই, আমেৰিকাত ধন বিনিয়োগৰ তথ্য লাভ আৰক্ষীৰ। বিদেশতো বেংক একাউণ্ট আছে ট্ৰেডিং কাণ্ডৰ অভিযুক্তটোৰ ।

ইয়াৰ মাজতে ঘটনাক লৈ পুনৰ মুখ খুলিছে কণ্ঠশিল্পী দীক্ষু শৰ্মাই। খবৰ অনুসৰি পলায়নৰ পাছত দীক্ষুৰ ঘৰত উপস্থিত হৈছিল চুমি আৰু তেওঁৰ স্বামী তাৰ্কিক বৰা। জনপ্ৰিয় গায়কগৰাকীৰ ঘৰত আশ্ৰয় লোৱাৰ পাছত নিশা প্ৰায় ১২-১ মান বজাত সেই স্থানৰ পৰা পলায়ন কৰিছিল চুমি আৰু তেওঁৰ স্বামী। আৰক্ষীৰ মতে জনপ্ৰিয় অভিনেত্ৰী তথা নৃত্যশিল্পীগৰাকীক আত্মগোপন কৰি থকাত যোৱা দুটা দিন যথেষ্ঠ সহায় কৰিছিল দীক্ষু আৰু তেওঁৰ পত্নীয়ে।

ফেচবুক ভিডিঅ’যোগে স্পষ্টীকৰণ আগবঢ়াই দীক্ষুৱে কৈছে, “যোৱা কিছুদিন ধৰি সামাজিক মাধ্যম আৰু সংবাদ মাধ্যমত মোৰ সম্পৰ্কে যিখিনি কথা ওলাই আছে, এই কথাবোৰত মই মানসিকভাৱে বহুত কষ্ট পাইছোঁ আৰু আচলতে দুৰ্বল হৈ গৈছোঁ। মই ৰাইজলৈ বিনম্ৰভাৱে এইটোৱে অনুৰোধ কৰিব খুজিছোঁ যোৱা ২০টা বছৰে আপোনালোকে যেনেকৈ মোক মৰম আৰু বিশ্বাস কৰিছে, সেই বিশ্বাস আৰু মৰমখিনি যাতে আপোনালোকে মোৰ ওপৰত সদায় ৰাখে। কিয়নো, মই আগতেও কেতিয়াও বেআইনী কাম কৰা নাছিলোঁ, এতিয়াও কৰা নাই আৰু ভৱিষ্যতেও নকৰো। এই বিশ্বাস মোৰ ওপৰত ৰাখক।”

দীক্ষুৱে পুনৰ কয়, “আৰু এটা কথা ওলাই আছে যে মই গাড়ী বা সম্পত্তি উপহাৰ পাইছোঁ, আচলতে সেয়া নহয়। মোৰ যৎসামান্য শক্তিৰে যিখিনি আৰ্জন কৰোঁ, সেইখিনিৰেই মই গাড়ী বা মই থকা ঘৰটো ক্ৰয় কৰিছোঁ। সেয়াও লোন লৈহে ক্ৰয় কৰিছোঁ। সেই লোন এতিয়াও চলি আছে। গতিকে এইখিনি বিশ্বাস ৰাখক। বেলেগ কথাত বিশ্বাস নকৰিব। সেয়াই মোৰ অনুৰোধ। মই কোনো বেআইনী কাম কৰা নাই। এতিয়া চলি থকা আইনী অনুসন্ধান প্ৰক্ৰিয়াত সকলোক্ষেত্ৰতে মোৰ সৰ্বতোপ্ৰকাৰৰ সহযোগিতা থাকিব। মই যিহেতু বেয়া কাম কৰা নাই। মোৰ সৎ সাহস আছে সহযোগ কৰিবলৈ। বেলেগ কথাত বিশ্বাস নকৰি মোৰ প্ৰতি যেন বিশ্বাস ৰাখে, সেয়াই মোৰ বিনম্ৰ অনুৰোধ।”