ভোটাৰ তালিকাত খেলিমেলি! বিজেপিৰ বিৰুদ্ধে এজাহাৰ কংগ্ৰেছৰ, নিৰ্বাচন আয়োগক মৌন দৰ্শক আখ্য়া

বিজেপিয়ে ভোটাৰ তালিকাক লৈ ষড়যন্ত্ৰ ৰচনা কৰা বুলি অখিল গগৈয়ে তোলা অভিযোগৰ পাছতে এইবাৰ বিষয়োটক লৈ সৰৱ হৈছে বিৰোধী দল কংগ্ৰেছ। প্ৰদেশ কংগ্ৰেছৰ সভাপতি গৌৰৱ গগৈয়ে শুকুৰবাৰে বিজেপিৰ জ্যেষ্ঠ নেতাসকলে বিজেপিক সমৰ্থন নকৰা ভোটাৰৰ নাম নিৰ্বাচনী তালিকাৰ পৰা আঁতৰোৱাৰ সন্দৰ্ভত আলোচনাত জড়িত হোৱাৰ অভিযোগ উত্থাপন কৰি ইয়াক সাংবিধানিক অধিকাৰৰ ওপৰত প্ৰত্যক্ষ আক্ৰমণ বুলি অভিহিত কৰে।

সংবাদ মাধ্যমৰ প্ৰতিবেদনৰ কথা উল্লেখ কৰি গগৈয়ে কয় যে বিজেপিৰ অনলাইন বৈঠকৰ সময়ত দলটোৰ ৰাজ্যিক সভাপতিয়ে বিজেপিক ভোট নিদিয়া লোকৰ নাম ভোটাৰ তালিকাৰ পৰা আঁতৰোৱাৰ কথা আলোচনা কৰা বুলি দাবী কৰি বাতৰি কাকতত এটা বাতৰি প্ৰকাশ পাইছিল। গগৈয়ে এয়া গণতন্ত্ৰক ভেঙুচালি কৰাৰ প্ৰয়াস বুলি অভিহিত কৰি বিষয়টোক লৈ গুৰুতৰ উদ্বেগ প্ৰকাশ কৰি কয়, “ভোটাৰ তালিকাৰ পৰা মানুহৰ নাম আঁতৰাবলৈ তেওঁলোক কোন? ভোটাধিকাৰ সাংবিধানিক অধিকাৰ।”

ভাৰতৰ নিৰ্বাচন আয়োগে এই বিষয়ত মৌনতা অৱলম্বন কৰা বুলি সমালোচনা কৰি কংগ্ৰেছ সাংসদগৰাকীয়ে কয় যে এনে অভিযোগ সন্দৰ্ভত সাংবিধানিক কৰ্তৃপক্ষৰ পৰা তাৎক্ষণিকভাৱে স্পষ্টীকৰণ আৰু ব্যৱস্থা গ্ৰহণৰ প্ৰয়োজনীয়তা আছে। কংগ্ৰেছে আইনী পদক্ষেপ ল’ব বুলি উল্লেখ কৰি গগৈয়ে কয়, “এই বিষয়ত কেন্দ্ৰীয় নিৰ্বাচন আয়োগ মৌন। এয়া অত্যন্ত গুৰুতৰ।” তেওঁ দৃঢ়তাৰে কয়, “আমি এই সন্দৰ্ভত এফআইআৰ পঞ্জীয়ন কৰিছো।”

ভোটাৰক ভয় খুৱাবলৈ বা নিৰ্বাচনী তালিকাত হেতালি খেলাৰ যিকোনো প্ৰচেষ্টাক তীব্ৰ বিৰোধিতা কৰা হ’ব বুলি উল্লেখ কৰি কংগ্ৰেছ নেতাগৰাকীয়ে এনে কাৰ্যই দেশৰ গণতান্ত্ৰিক ভেটিৰ প্ৰতি ভাবুকি কঢ়িয়াই আনিছে বুলি সকীয়াই দিয়ে।

ইফালে, অসম প্ৰদেশ কংগ্ৰেছ কমিটীয়ে ৮ জানুৱাৰী বৃহস্পতিবাৰে বিজেপি নেতৃত্বাধীন ৰাজ্য চৰকাৰ আৰু ভাৰতৰ নিৰ্বাচন আয়োগৰ ওপৰত তীব্ৰ আক্ৰমণ চলাই অসমত চলি থকা বিশেষ সাৰাংশ সংশোধন (SSR) প্ৰক্ৰিয়াত অনিয়মৰ জৰিয়তে অসমৰ নিৰ্বাচনী তালিকাত হেতালি খেলাৰ অভিযোগ উত্থাপন কৰে। ৰাজীৱ ভৱনত এখন সংবাদমেল সম্বোধন কৰি ধুবুৰী লোকসভাৰ সাংসদ ৰকিবুল হুছেইন আৰু ৰাজ্যসভাৰ প্ৰাক্তন সাংসদ ৰিপুন বৰাই দাবী কৰে যে ইয়াৰ পূৰ্বে মহাৰাষ্ট্ৰ, হাৰিয়ানা, কৰ্ণাটকৰ দৰে ৰাজ্যত সংঘটিত হোৱাৰ দৰে ভোটাৰ তালিকাৰ হেতালি খেলাৰ আৰ্হি অসমত দেখা গৈছে।

ৰকিবুল হুছেইনে অভিযোগ কৰে যে অসমৰ মুখ্য নিৰ্বাচনী বিষয়া (চি ই অ’)ৰ পৰা এছ এছ আৰ অনুশীলন নিয়মীয়া বাৰ্ষিক পুনৰীক্ষণৰ দৰে হ’ব বুলি আশ্বাস দিয়াৰ পিছতো এতিয়াৰ পৰিস্থিতিয়ে বেলেগ কাহিনী কৈছে। তেওঁ দাবী কৰে যে নিৰ্বাচনী তালিকাৰ খচৰা প্ৰস্তুত কৰাৰ সময়ত বুথ স্তৰৰ তত্বাৱধায়কসকলক অজ্ঞাত কৰি ৰখা হৈছিল, যাৰ ফলত দাবী আৰু আপত্তি প্ৰক্ৰিয়াৰ সময়ত বিভ্ৰান্তি আৰু অনিয়মৰ সৃষ্টি হৈছিল।

কংগ্ৰেছ নেতাগৰাকীয়ে আৰু অভিযোগ উত্থাপন কৰে যে নিৰ্বাচন আয়োগে একাধিক ভোটাৰৰ বিৰুদ্ধে এজন ব্যক্তিক আপত্তি উত্থাপন কৰিবলৈ অনুমতি দি নিজৰ নিৰ্দেশনা উলংঘা কৰিছে। হুছেইনে কয়, ‘‘বিধিসমূহে স্পষ্টভাৱে কেৱল ব্যক্তিগত আপত্তিহে অনুমতি দিয়ে। এজন ব্যক্তিক কেইবাজনো ভোটাৰৰ ওপৰত আপত্তি কৰিবলৈ দিয়াটোৱে প্ৰক্ৰিয়াটোৰ অখণ্ডতাক লৈ গুৰুতৰ চিন্তাৰ সৃষ্টি কৰে।”

মুখ্যমন্ত্ৰী হিমন্ত বিশ্ব শৰ্মাক লক্ষ্য কৰি হুছেইনে অভিযোগ কৰে যে নিৰ্বাচনী তালিকাত বাহিৰৰ লোকক অন্তৰ্ভুক্ত কৰাত সুবিধা প্ৰদান কৰাৰ সমান্তৰালকৈ প্ৰকৃত ভোটাৰক ডিলিট কৰাৰ উদ্দেশ্যেৰে আপত্তি দাখিল কৰা হৈছে। নিৰ্বাচন আয়োগৰ নীতি-নিয়মৰ অধীনত বাধ্যতামূলক কৰা অনুসৰি ৰাজনৈতিক দলসমূহৰ সৈতে দাবী আৰু আপত্তিৰ সাপ্তাহিক আপডেট ভাগ-বাটোৱাৰা নকৰাৰ অভিযোগো উত্থাপন কৰে হুছেইনে।

সমগ্ৰ প্ৰক্ৰিয়াটোক অসাংবিধানিক আৰু অনৈতিক বুলি অভিহিত কৰি হুছেইনে অভিযোগ কৰে যে, ‘প্ৰতিষ্ঠিত কোনো নিয়ম মানি চলা হোৱা নাই। নিৰ্বাচন আয়োগে কি হৈ আছে সেই বিষয়ে সম্পূৰ্ণৰূপে অৱগত যদিও মৌন দৰ্শক হৈ থাকিবলৈ বাছি লৈছে।”

প্ৰাক্তন সাংসদ ৰিপুণ বৰাই এই বিষয়ত উদ্বেগ প্ৰকাশ কৰি বিজেপিয়ে নিৰ্বাচন আয়োগক “পুতলা”লৈ ৰূপান্তৰিত কৰাৰ অভিযোগ উত্থাপন কৰে। তেওঁ আঙুলিয়াই দিয়ে যে ডিচেম্বৰৰ শেষৰ ফালে আৰু জানুৱাৰী মাহৰ আৰম্ভণিতে প্ৰকাশিত নিৰ্বাচনী তালিকাৰ খচৰাত নগণ্য পাৰ্থক্য দেখা গৈছে, যাৰ ফলত ভোটাৰ আৰু ৰাজনৈতিক দলসমূহে পৰিৱৰ্তন চিনাক্ত কৰাটো বা সংশোধন বিচৰাটো প্ৰায় অসম্ভৱ হৈ পৰিছে।

বৰাই অভিযোগ কৰে যে নতুনকৈ সংযোজিত ভোটাৰ, মৃত ভোটাৰৰ নাম বাদ পৰা, বদলি হোৱা ভোটাৰৰ দৰে গুৰুত্বপূৰ্ণ তথ্য একেলগে খচৰা তালিকাত প্ৰতিফলিত হোৱা নাই। তেওঁ কয় যে এই সবিশেষ কেৱল চূড়ান্ত নিৰ্বাচনী তালিকাতহে দেখা যাব বুলি নিৰ্বাচন আয়োগে দিয়া ব্যাখ্যাই আপত্তি প্ৰক্ৰিয়াৰ উদ্দেশ্যক পৰাস্ত কৰে।

বৰাই এখন কথিত অনলাইন বৈঠক সন্দৰ্ভত সংবাদ মাধ্যমৰ বাতৰিৰ কথাও উল্লেখ কৰে, য’ত অসম বিজেপিৰ সভাপতিয়ে শাসকীয় দলক সমৰ্থন নকৰা ভোটাৰক চিনাক্ত কৰিবলৈ দলৰ নেতাসকলক নিৰ্দেশ দিয়াৰ খবৰ আহিছে। তেওঁ প্ৰশ্ন উত্থাপন কৰে যে যদিহে প্ৰকাশিত প্ৰতিবেদন শুদ্ধ নহয়, তেন্তে নিৰ্বাচন আয়োগে কিয় এই সন্দৰ্ভত এই সন্দৰ্ভত কোনো ধৰণৰ স্পষ্টীকৰণ প্ৰকাশ কৰা নাই।

অধিক উদ্বেগ উত্থাপন কৰি বৰাই অভিযোগ কৰে যে ৰাজনৈতিক হেঁচাত কাম কৰিবলৈ অস্বীকাৰ কৰাৰ অভিযোগত কেইবাটাও ক্ষেত্ৰত বুথ লেভেল অফিচাৰ (বি এল অ’)ক তেওঁলোকৰ কামৰ মাজভাগত সলনি কৰা হৈছে। তেওঁ লগতে দাবী কৰে যে কিছুমান সম্প্ৰদায়ৰ অন্তৰ্গত বিএলঅ’সমূহ নিৰ্বাচিতভাৱে আঁতৰোৱা হৈছে।

গুৱাহাটীৰ দৃষ্টান্ত উদ্ধৃতি দি বৰাই দিছপুৰৰ ভোটকেন্দ্ৰসমূহত গুৰুতৰ অনিয়মৰ অভিযোগ উত্থাপন কৰে, য’ত মালিকৰ অজ্ঞাতে ঘৰত অতিৰিক্ত ভোটাৰ অন্তৰ্ভুক্ত হোৱাৰ অভিযোগ উত্থাপন হোৱাৰ বিপৰীতে আন বুথত ভোটাৰ তালিকাৰ পৰা সমগ্ৰ পৰিয়াল নিৰুদ্দেশ হোৱা বুলি অভিযোগ উত্থাপন কৰে।

এই অভিযোগ উত্থাপন কৰি বিতং স্মাৰক পত্ৰ ৯ জানুৱাৰীত অসমৰ মুখ্য নিৰ্বাচনী বিষয়াক দাখিল কৰা হ’ব বুলি ঘোষণা কৰে কংগ্ৰেছ নেতাসকলে। বিজেপি নেতাসকলৰ সৈতে জড়িত বিতৰ্কিত ভিডিঅ’ কনফাৰেন্সৰ ফৰেনছিক তদন্তৰ দাবী উত্থাপন কৰিব কংগ্ৰেছে। আগন্তুক দিনত বিৰোধী দলৰ যৌথ প্ৰতিনিধি দলে নতুন দিল্লীত মুখ্য নিৰ্বাচন আয়ুক্তক সাক্ষাৎ কৰি সংশোধনী ব্যৱস্থাৰ বাবে হেঁচা দিয়াৰ সম্ভাৱনা আছে বুলি কংগ্ৰেছ নেতাসকলে প্ৰকাশ কৰে।