বিয়াত দৰা বা কইনাক কেতিয়াও নিদিব এনে উপহাৰ, কাঢ়ি নিব নৱ দম্পতীৰ বিবাহিত জীৱনৰ সুখ

এতিয়া চৌদিশে বিয়াৰ বতৰ। নিমন্ত্ৰণ ৰক্ষা কৰি আত্মীয়-স্বজন, বন্ধুবৰ্গ বা চিনাকি আন কোনো লোকৰ বিবাহলৈ হয়তো আপুনিও গৈছে। লগত হয়তো নিছে কোনো উপহাৰ। সেইদৰে আগন্তুক কোনো বিবাহৰ বাবেও হয়তো উপহাৰ নিয়াৰ পৰিকল্পনা কৰিছে। পিছে এনে শুভ অনুষ্ঠানত আপুনি দিয়া উপহাৰকো অত্যন্ত গুৰুত্বপূৰ্ণ হিচাপে গণ্য কৰা হয়। এই উপহাৰে আনকি নৱ দম্পতীহালৰ বৈবাহিক জীৱনৰ সুখো কাঢ়ি নিব পাৰে! হিন্দু ধৰ্মৰ শাস্ত্ৰ, পৰম্পৰা তথা জ্যোতিষতো বিয়াত কিছুমান বস্তু উপহাৰ হিচাপে দিয়াটো অশুভ বুলি কোৱা হৈছে।

এই ধৰ্মীয় বিশ্বাস অনুসৰি এনে সামগ্ৰীসমূহ উপহাৰ স্বৰূপে আগবঢ়ালে সম্পৰ্কলৈ নেতিবাচক শক্তি কঢ়িয়াই আনিব পাৰে বা বিবাহিত জীৱনত বাধাৰ সৃষ্টি কৰিব পাৰে। দৰা-কইনাক উপহাৰ হিচাপে আগবঢ়োৱাৰ ক্ষেত্ৰত কোনবোৰ সামগ্ৰী পৰিহাৰ কৰিব লাগে, জানো আহক-

ক’লা সামগ্ৰী

হিন্দু বিশ্বাস অনুসৰি ক’লা ৰংটো প্ৰায়ে দুৰ্ভাগ্য, শোক বা নেতিবাচক শক্তিৰ সৈতে জড়িত হৈ থাকে। বিয়া আৰু নতুন জীৱনৰ আৰম্ভণিৰ দৰে শুভ অনুষ্ঠানত সেয়ে যিকোনো ক’লা ৰঙৰ উপহাৰ যেনে ক’লা কাপোৰ, জোতা বা আন যিকোনো বস্তু উপহাৰ হিচাপে দিয়াটো অশুভ বুলি গণ্য কৰা হয়। ইয়াৰ ফলত নৱবিবাহিত দম্পতীৰ জীৱনলৈ দুৰ্ভাগ্য বা নেতিবাচকতা আহিব পাৰে।

চোকা বা ধাৰ থকা সামগ্ৰী

পৰম্পৰা অনুসৰি কটাৰী, কেঁচি, ছুৰী বা তেনে যিকোনো চোকা ধাৰ থকা সামগ্ৰী উপহাৰ দিব নালাগে। এনে সামগ্ৰীসমূহক সম্পৰ্কত তিক্ততা, বিচ্ছেদ বা বিভাজনৰ প্ৰতীক হিচাপে গণ্য কৰা হয়। বিশ্বাস কৰা হয় যে এই উপহাৰে নৱবিবাহিত দম্পতীৰ মাজৰ বন্ধন ছিন্ন কৰে আৰু প্ৰেম হ্ৰাস কৰিব পাৰে।

কাঁচৰ সামগ্ৰী

বিয়া উপলক্ষে উপহাৰ ৰূপে কাঁচৰ যিকোনো সামগ্ৰী বা শ্ব’পিচ দিয়াটো পৰিহাৰ কৰিব লাগে। কাঁচ সহজে ভাগিব পাৰে আৰু কাঁচ ভাঙি যোৱাটো অতি অশুভ বুলি কোৱা হয়। সেয়ে বিয়াত কাঁচৰ সামগ্ৰী উপহাৰ দিলে বৈবাহিক সম্পৰ্কতো ভাঙোন আহিব পাৰে বুলি ধাৰণা কৰা হয়।

যিকোনো সুগন্ধি

লোকবিশ্বাস আৰু জ্যোতিষৰ বিবেচনা অনুসৰি বিয়াত সুগন্ধি উপহাৰ দিয়াটোও অশুভ বুলি গণ্য কৰা হয়। নতুন সংসাৰ গঢ়িবলৈ সাজু হোৱাৰ সময়ত সুগন্ধিৰ দৰে সামগ্ৰী উপহাৰ দিলে নেতিবাচক শক্তিৰ আাগমন ঘটি বৈবাহিক সম্পৰ্কত অস্থিৰতা সৃষ্টি কৰিব পাৰে।

তাৰ পৰিৱৰ্তে কি দিব?

বাস্তুৰ মতে ৰূপৰ মুদ্ৰা, দেৱতাৰ মূৰ্তি, ৰঙা বা হালধীয়া কাপোৰ, শিল্পকৰ্ম বা ঘৰ সজোৱাৰ বাবে শুভ প্ৰতীক আদি উপহাৰ নৱবিবাহিতসকলৰ বাবে আটাইতকৈ উপযুক্ত হিচাপে গণ্য কৰা হয়। গতিকে নতুন সংসাৰৰ বাবে সাজু হোৱা দৰা কইনাক এনে উপহাৰ আগবঢ়াই আপুনি তেওঁলোকৰ ভৱিষ্যতৰ সময় সুখকৰ কৰি তুলিব পাৰে।

বিশেষ দ্ৰষ্টব্যঃ ধৰ্মীয় বিশ্বাস তথা লোক বিশ্বাসৰ ওপৰত ভিত্তি কৰি এই লেখাটি প্ৰস্তুত কৰা হৈছে। এইক্ষেত্ৰত TV9 Assam-এ নিজা কোনো মত প্ৰকাশ কৰা নাই।