পাকঘৰত লগাওক এইসমূহ সামগ্ৰী, দূৰ হ’ব বাস্তু দোষ; মাত্ৰ মনত ৰাখক এইকেইটা বিশেষ দিশ

প্ৰাচীন ভাৰতীয় বাস্তু শাস্ত্ৰ কেৱল ঘৰৰ চাৰিসীমা বা নিৰ্মাণশৈলীতে আৱদ্ধ নহয়। ঘৰত থকা প্ৰতিটো কোঠা আৰু তাত ব্যৱহৃত সৰু-সুৰা সামগ্ৰীবোৰে আমাৰ জীৱনত কেনেদৰে প্ৰভাৱ পেলায়, তাৰ বাখ্যা আগবঢ়ায়। বহু সময়ত দেখা যায় যে কোনো বিশেষ কাৰণ নোহোৱাকৈয়ে ঘৰত এক মানসিক গধুৰ পৰিৱেশ বা অশান্তিয়ে বিৰাজ কৰে। ইয়াৰ এটা অন্যতম কাৰণ হ’ব পাৰে পাকঘৰৰ বাস্তু দোষ। যিহেতু পাকঘৰৰ পৰাই সমগ্ৰ পৰিয়ালৰ স্বাস্থ্য আৰু শক্তিৰ সঞ্চাৰ হয়, সেয়েহে ইয়াৰ শুদ্ধিকৰণ অতি প্ৰয়োজনীয়।

পাকঘৰত এগজষ্ট ফেনৰ গুৰুত্ব

বাস্তু শাস্ত্ৰত পাকঘৰক ঘৰৰ আটাইতকৈ গুৰুত্বপূৰ্ণ অংশ হিচাপে গণ্য কৰা হয়, কাৰণ সমগ্ৰ পৰিয়ালৰ স্বাস্থ্য আৰু শক্তি ইয়াৰ সৈতেই জড়িত। বাস্তু অনুসৰি পাকঘৰত এটা এগজষ্ট ফেন (Exhaust Fan) থকাটো অতি প্ৰয়োজন। ই কেৱল ধোঁৱা বা দুৰ্গন্ধই বাহিৰ নকৰে, বৰঞ্চ পাকঘৰৰ নেতিবাচক শক্তিও আঁতৰাই পঠিয়ায়।

মন কৰিব যে এগজষ্ট ফেন যিকোনো দিশত লগোৱাটো উচিত নহয়। বাস্তু শাস্ত্ৰৰ মতে, পাকঘৰৰ এগজষ্ট ফেন সদায় পূব দিশত লগাব লাগে। বিশ্বাস কৰা হয় যে পূব দিশেদি নেতিবাচক শক্তি বাহিৰ হৈ যায় আৰু ঘৰত ইতিবাচকতা বিৰাজ কৰে।

পোহৰ আৰু বতাহৰ প্ৰয়োজনীয়তা

পাকঘৰৰ খিৰিকীখনৰ বাবেও পূব দিশটোৱেই সৰ্বোত্তম। পূব দিশৰ পৰা অহা ৰাতিপুৱাৰ কোমল সূৰ্যৰ পোহৰে পাকঘৰৰ বীজাণু ধ্বংস কৰাৰ লগতে পৰিৱেশটো পবিত্ৰ কৰি ৰাখে। পৰ্যাপ্ত পোহৰ-বতাহ সোমাব পৰাকৈ খিৰিকীখন যথেষ্ট ডাঙৰ হোৱা উচিত। ইয়াৰ ফলত ৰান্ধনীৰ মনটোও শান্ত আৰু প্ৰফুল্লিত হৈ থাকে, যাৰ ধনাত্মক প্ৰভাৱ খাদ্যৰ সোৱাদ আৰু গুণাগুণত পৰে।

পৰিষ্কাৰ-পৰিচ্ছন্নতা আৰু আৰ্থিক সমৃদ্ধি

পাকঘৰৰ পৰিষ্কাৰ-পৰিচ্ছন্নতাই ঘৰৰ অৰ্থনৈতিক অৱস্থাকো প্ৰতিনিধিত্ব কৰে। পাকঘৰত জমা হোৱা তেলৰ চেকা, ধূলি বা লেতেৰা আবৰ্জনাবোৰে বাস্তু দোষৰ সৃষ্টি কৰি দৰিদ্ৰতাক আমন্ত্ৰণ জনায়। সেয়েহে, নিশা শুবলৈ যোৱাৰ পূৰ্বে পাকঘৰটো সদায় পৰিষ্কাৰ কৰি ৰখা উচিত। এক সুবিন্যস্ত আৰু চাফ-চিকুণ পাকঘৰে কেৱল শাৰীৰিক স্বাস্থ্যই নহয়, বৰঞ্চ ঘৰৰ আধ্যাত্মিক আৰু মানসিক শান্তিও অটুট ৰাখে।