ভেজাল ঔষধ কেনেকৈ চিনাক্ত কৰিব পাৰি ? নকল ঔষধ ধৰা পেলোৱাৰ সহজ উপায় জানক
নকল ঔষধে ভৰি পৰিছে বজাৰ। প্ৰশ্ন হ’ল, সাধাৰণ মানুহে এই নকল ঔষধ কেনেকৈ চিনাক্ত কৰিব? প্ৰকৃত আৰু ভেজাল ঔষধৰ মাজৰ পাৰ্থক্য কেনেকৈ বিচাৰিব? জানোঁ আহক।
বৰ্তমান সময়ত নকল ঔষধৰ ক’লা বেহা দিনক দিনে বৃদ্ধি পাইছে। বিভিন্ন ধৰণৰ নকল ঔষধে ভৰি পৰিছে বজাৰ। প্ৰশ্ন হ’ল, সাধাৰণ মানুহে এই নকল ঔষধ কেনেকৈ চিনাক্ত কৰিব? প্ৰকৃত আৰু ভুৱা ঔষধৰ মাজৰ পাৰ্থক্য কেনেকৈ বিচাৰিব? জানোঁ আহক।
ভেজাল ঔষধ হৈছে এক বিষ যিয়ে লাহে লাহে মানুহৰ জীৱনটোক অধিক বিপদৰ মাজলৈ লৈ যাব পাৰে । প্ৰকৃত আৰু ভেজাল ঔষধৰ মাজত পাৰ্থক্য চিনাক্ত কৰাটো কঠিন যদিও অলপ সাৱধানতা অৱলম্বন কৰিলে সহজেই এই ঔষধ এৰাই চলিব পাৰি। মনত ৰাখিব, বেমাৰৰ বিৰুদ্ধে যুঁজিবলৈ ঔষধ সেৱন কৰা হয়, কিন্তু ঔষধ যদি ভেজাল হয়, তেন্তে ৰোগ আৰু বৃদ্ধি পাব পাৰে।
ভুৱা ঔষধ চিনাক্তকৰণৰ সহজ উপায়
পেকেজিং ভালদৰে চাওক – অৰিজিনেল ঔষধৰ পেকেজিং ভাল মানৰ। নকল ঔষধত ছপা প্ৰায়ে অস্পষ্ট হয়, বানান ভুল হয় বা পেকিং ঢিলা হয়।
এম আৰ পি, বেচ নম্বৰ আৰু ম্যাদ উকলি গৈছে নেকি পৰীক্ষা কৰক – এই তথ্যসমূহ প্ৰকৃত ঔষধত স্পষ্টকৈ ছপা কৰা থাকে। ভুৱা ঔষধত বেচ নম্বৰটো অদ্ভুত দেখা যাব বা সকলো পেকেটত একে লিখা থাকিব।
বাৰক’ড বা QR ক’ড স্কেন কৰক – এতিয়া বেছিভাগ মূল কোম্পানীয়ে QR ক’ড প্ৰদান কৰে। মোবাইলৰ সহায়ত স্কেন কৰাৰ লগে লগে আপুনি গম পাব যে ঔষধ কোম্পানীৰ ৰেকৰ্ডত আছে নে নাই।
ঔষধৰ ৰং আৰু আকৃতি পৰীক্ষা কৰক- মূল ঔষধৰ ৰং আৰু আকৃতি প্ৰতিবাৰেই একে হ’ব। ভুৱা ঔষধৰ ৰং ম্লান বা উজ্জ্বল যেন লাগিব পাৰে।
সদায় বিল লৈ ঔষধ কিনিব- ঔষধ ১০ টকাৰ হওক বা ১০০০ টকাৰ হওক, বিলখন লওক। বিল নথকা ঔষধ সন্দেহজনক হ’ব পাৰে।
কোম্পানীৰ ল’গ’ পৰীক্ষা কৰক- বহু নকল পেকেজিঙত কোম্পানীৰ ল’গ’ কপি কৰা হয়, কিন্তু ভালদৰে চালে পাৰ্থক্য দেখা পাব।
চিকিৎসকক সুধিব- যদি ঔষধ খোৱাৰ পিছত কোনো পাৰ্থক্য নাথাকে বা কোনো অদ্ভুত পাৰ্শ্বক্ৰিয়া হয়, তেন্তে লগে লগে চিকিৎসকৰ পৰামৰ্শ লৈ ঔষধৰ বিষয়ে কোম্পানী বা ঔষধ বিভাগক খবৰ দিব লাগে।
চৰকাৰ আৰু জনসাধাৰণৰ দায়িত্ব
ভেজাল ঔষধ বিক্ৰী কৰা চক্ৰৰ বিৰুদ্ধে চৰকাৰে ব্যৱস্থা গ্ৰহণ কৰে, কিন্তু সত্যটো হ’ল সাধাৰণ ৰাইজ যদি সচেতন নহয়, তেন্তে এই ব্যৱসায় কেতিয়াও বন্ধ নহ’ব। আমি যেনেকৈ ফলমূল আৰু শাক-পাচলি কিনাৰ সময়ত গুণগত মান চাওঁ, ঠিক তেনেদৰে ঔষধ খোৱাৰ সময়তো সাৱধান হোৱাটো প্ৰয়োজন।
