সিন্ধু জল চুক্তিৰ বিষয়ত পাকিস্তানে সহিলে আন এক আঘাতঃ বিশ্ব বেংকে ক’লে এইদৰে…

পহলগাম আক্ৰমণৰ পিছতে সিন্ধু জল চুক্তি স্থগিত ৰাখি ভাৰতে গ্ৰহণ কৰিছিল গুৰুত্বপূৰ্ণ কুটনৈতিক পদক্ষেপ। ভাৰতৰ এই পদক্ষেপে পাকিস্তানক বাৰুকৈয়ে সমস্যাত পেলায়। এতিয়া সিন্ধু জল চুক্তিৰ বিষয়ত পাকিস্তান আন এক আঘাত সহিবলগা হৈছে। এইবাৰ বিশ্ব বেংকৰ পৰা নিৰাশাৰ খবৰ পাইছে পাকিস্তানে। সিন্ধু জল চুক্তিৰ বিষয়ত ভাৰতৰ সিদ্ধান্তক বাধা দিব নোৱাৰে বুলি বিশ্ব বেংকে স্পষ্ট কৰি দিছে। বিশ্ব বেংকৰ অধ্যক্ষ অজয় ​​বাংগাই সিন্ধু জল চুক্তিৰ ক্ষেত্ৰত বিশ্ব বেংকৰ কোনো ভূমিকা নাই বুলি উল্লেখ কৰিছে।

বিশ্ব বেংকৰ অধ্যক্ষগৰাকীয়ে কয়, “সিন্ধু জল চুক্তিৰ বিষয়ত আমাৰ কোনো ভূমিকা নাই। আমাৰ ভূমিকা কেৱল এজন সুবিধা প্ৰদানকাৰীৰ, গতিকে আমি এই বিষয়ত হস্তক্ষেপ নকৰোঁ।” উল্লেখ্য যে ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ এদিন পিছতে ভাৰতে সিন্ধু জল চুক্তি স্থগিত ৰাখিছিল। পাকিস্তান ভিত্তিক সন্ত্ৰাসবাদীয়ে সংঘটিত কৰা এই আক্ৰমণত ২৬ জন লোকে প্ৰাণ হেৰুৱাইছিল।

এই সিন্ধু জল চুক্তি দুয়োখন দেশে ১৯৬০ চনত সিন্ধু, ঝেলুম আৰু চেনাবৰ জলভাগৰ ভাগ-বতৰা কৰাৰ বাবে স্বাক্ষৰ কৰিছিল। এই সন্ধি বিশ্ব বেংকৰ মধ্যস্থতাত হৈছিল। এনে কাৰণতে সিন্ধু জল চুক্তি স্থগিত ৰখাৰ পিছত বিশ্ব বেংকে এই বিষয়ত হস্তক্ষেপ কৰিব পাৰে বুলি চৰ্চা চলিছিল। কিন্তু বিশ্ব বেংকৰ সভাপতি অজয় বাংগাই স্পষ্টকৈ কৈছে যে বিশ্ব বেংকৰ ভূমিকা কেৱল সুবিধা প্ৰদানকাৰীৰ। হস্তক্ষেপৰ কথাবোৰ ভিত্তিহীন।

সিন্ধু জল চুক্তি স্থগিত ৰখাৰ পিছত ভাৰতে চেনাব নদীৰ পানী বন্ধ কৰি দিছিল। চেনাব নদীৰ পানী বন্ধ কৰিবলৈ বাগলীহাৰ বান্ধৰ সকলো দুৱাৰ বন্ধ কৰি দিয়া হ’ল। ইয়াৰ পিছত সিন্ধু আৰু ইয়াৰ উপনৈ ঝেলুমৰ পানী বন্ধ কৰাৰ বাবেও প্ৰস্তুতি চলোৱা হৈছে। ভাৰতৰ এই পদক্ষেপৰ পিছত চেনাবৰ প্ৰবাহ ৯০ শতাংশ হ্ৰাস পাইছে, অৰ্থাৎ পাকিস্তানী ভূখণ্ডলৈ বৈ যোৱা চেনাব শুকাবলৈ আৰম্ভ কৰিছে।

সিন্ধু জল চুক্তিক পাকিস্তানৰ জীৱনৰেখা হিচাপে গণ্য কৰা হয়। পাকিস্তানৰ ২১ কোটিৰো অধিক জনসংখ্যা পানীৰ বাবে সিন্ধু আৰু ইয়াৰ চাৰিখন উপনৈৰ ওপৰত নিৰ্ভৰশীল। ইয়াৰ বাহিৰেও ৯০% মাটিৰ জলসিঞ্চনৰ পানী সিন্ধু নদীৰ পৰা আহে। গতিকে ভাৰতে সিন্ধু জল চুক্তি স্থগিত কৰাৰ সিদ্ধান্তই পাকিস্তানক বাৰুকৈয়ে জোকাৰি গৈছে।