১৫ দিনৰ ভিতৰত সলনি হ’ব ভাৰতীয় সেনাৰ ৰেহ-ৰূপ, শত্ৰুৰ বাবে সাজু ঘাতক পৰিকল্পনা
Indian Army: শীঘ্ৰেই নিজৰ শক্তিৰ নতুন ৰূপ দেখুৱাব ভাৰতীয় সেনাই। চুবুৰীয়াৰ ৰাষ্ট্ৰৰ সৈতে সংঘাতপূৰ্ণ সম্পৰ্কৰ কথা মন ৰাখিয়েই ভাৰতীয় সেনাই নিজৰ শক্তি বৃদ্ধিৰ বাবে গ্ৰহণ কৰি আহিছে ইটোৰ পিছত সিটো পদক্ষেপ। ডীকেড অৱ ট্ৰেন্সফৰ্মেচন একচন প্লেনৰ অধীনত কাৰ্যক্ষম কৰা হ'ব দিব্যাস্ত্ৰ বেটাৰী, ভৈৰৱ বেটেলিয়ন আৰু শক্তিবাণ ৰেজিমেণ্ট।
অনাগত ১৫ দিনত নিজৰ নতুন ৰূপ দেখুৱাবলৈ সাজু হৈছে ভাৰতীয় সেনা। ডীকেড অৱ ট্ৰেন্সফৰ্মেচন একচন প্লেনৰ অধীনত প্ৰথম পৰ্যায়ৰ বাবে আগষ্টৰ শেষলৈকে সময়সীমা নিৰ্ধাৰণ কৰা হৈছে। যুদ্ধৰ ভিত্তিত ইয়াক সম্পূৰ্ণ কৰাত নিয়োজিত হৈছে সেনা। এই পৰিকল্পনাৰ অধীনত দিব্যাস্ত্ৰ বেটাৰী, ভৈৰৱ বেটেলিয়ন আৰু শক্তিবাণ ৰেজিমেণ্ট সম্পূৰ্ণৰূপে কাৰ্যক্ষম কৰা হ’ব।
শেহতীয়া অপাৰেচন সেন্দূৰত ভাৰতীয় সেনাই শত্ৰু দেশসমূহক এক উপযুক্ত শিক্ষা দি নিজৰ যৌথ যুদ্ধ সামৰ্থ প্ৰদৰ্শন কৰে। এই সফলতাৰ পিছত সেনাই নিজৰ ডীকেড অৱ ট্ৰেন্সফৰ্মেচন পৰিকল্পনা ত্বৰান্বিত কৰিছে।
চীন-পাকিস্তানৰ যৌথ প্ৰত্যাহ্বান
চীনে নিজৰ সমগ্ৰ সামৰিক এলেকা ৫ টা থিয়েটাৰ কমাণ্ডলৈ ৰূপান্তৰিত কৰিছে। ভাৰতৰ সীমান্তৰ সংলগ্ন অঞ্চলসমূহ পশ্চিম থিয়েটাৰ কমাণ্ডৰ নিয়ন্ত্ৰণত আছে, য’ত চীনা সেনা আৰু বায়ুসেনা একেলগে নিয়োজিত হৈ আছে। কেৱল এয়াই নহয়, চীনে নিজৰ বহু সামৰিক বিভাগক কম্বাইণ্ড আৰ্মড ব্ৰিগেড (CAB)লৈ ৰূপান্তৰিত কৰিছে।
আনহাতে পাকিস্তানেও চীনৰ অস্ত্ৰৰ সহায়ত ভাৰতৰ সৈতে সংঘৰ্ষৰ বাবে প্ৰস্তুতি চলাইছে। পাকিস্তানে গঠন কৰিছে আৰ্মি ৰকেট ফৰ্চ কমাণ্ড।
আৰ্টিলাৰীৰ আধুনিকীকৰণ… দিব্যাস্ত্ৰ আৰু শক্তিবাণৰ উন্মোচন
ভাৰতীয় সেনাৰ আৰ্টিলাৰী আধুনিকীকৰণ কৰা হৈছে। ইয়াৰ অধীনত পুনৰ্গঠনৰ কাম দ্ৰুতগতিত চলি আছে। প্ৰথম পৰ্যায়ৰ অন্তিম তাৰিখ আগষ্ট হিচাপে নিৰ্ধাৰণ কৰা হৈছে। আৰ্টিলাৰীক আধুনিকীকৰণৰ বাবে সেনাই গঠন কৰিছে দিব্যাস্ত্ৰ বেটাৰী আৰু শক্তিবাণ ৰেজিমেণ্ট।
দিব্যাস্ত্ৰ বেটাৰীত আৰ্টিলাৰী বন্দুকৰ লগতে লইটাৰিং মিউনিচন আৰু ড্ৰ’ন থাকিব। প্ৰথম পৰ্যায়ত ৫টা বেটাৰী প্ৰস্তুত কৰা হৈছে। আনহাতে শক্তিবাণ ৰেজিমেণ্টত থাকিব কেৱল ড্ৰ’ন আৰু লইটাৰিং মিউনিয়ন, কামান নহয়। প্ৰথম পৰ্যায়ত ৩ শক্তিবাণ ৰেজিমেণ্ট স্থাপন কৰা হ’ব।
ভৈৰৱ বেটেলিয়ন… সীমান্তত শত্ৰুক ভাবুকি
প্ৰথম পৰ্যায়ত ৫টা ভৈৰৱ বেটেলিয়ন গঠন কৰা হৈছে। এই লাইট কমাণ্ডো ইউনিটে বিশেষ বাহিনী আৰু পদাতিক ইউনিটৰ মাজত সংযোগী হিচাপে কাম কৰিব। গধুৰ অস্ত্ৰৰে সজ্জিত হোৱাৰ পৰিৱৰ্তে তেওঁলোকৰ গুৰুত্ব দ্ৰুত আৰু নিখুঁত আক্ৰমণত থাকিব, যাতে শত্ৰুক আচৰিত কৰিব পাৰে।
সেনাবাহিনীৰ প্ৰতিটো পদাতিক বেটেলিয়নত এটা ড্ৰ’ন প্লাটুনো সংযোজন কৰা হৈছে, যাৰ কাম হ’ব চোৰাংচোৱাগিৰি আৰু আক্ৰমণাত্মক দুয়োটা কাৰ্যকলাপ চলোৱা। আগষ্টৰ শেষৰ ফালে সকলো ড্ৰ’ন প্লাটুন সক্ৰিয় কৰা হ’ব।
‘ৰুদ্ৰ’ ব্ৰিগেড.. অল আৰ্মছ ষ্ট্ৰাইক ফৰ্চ
অপাৰেচন সেন্দূৰৰ পিছত ‘ৰুদ্ৰ’ ব্ৰিগেড গঠনৰ প্ৰক্ৰিয়া ত্বৰান্বিত হয়। এতিয়ালৈকে ২টা পদাতিক ব্ৰিগেডক অল আৰ্মছ ৰুদ্ৰ ব্ৰিগেডলৈ ৰূপান্তৰিত কৰা হৈছে, য’ত ইনফেণ্ট্ৰি, মেকানাইজড ইনফেণ্ট্ৰি, টেংক, আৰ্টিলাৰী, বিশেষ বাহিনী আৰু মানৱবিহীন আকাশী ব্যৱস্থাই একেলগে কাম কৰে।
এই পৰিৱৰ্তনে ভাৰতীয় সেনাৰ আক্ৰমণৰ শক্তি, প্ৰতিক্ৰিয়াৰ সময় আৰু প্ৰযুক্তি বৃদ্ধি কৰিব, যাৰ ফলত ভৱিষ্যতে যিকোনো সংঘাতত ই নিৰ্ণায়ক প্ৰান্ত লাভ কৰিবলৈ সক্ষম হ’ব।
