শুল্ক শূন্য! আমেৰিকালৈ বিশেষ প্ৰস্তাৱ নতুন দিল্লীৰ

মোদী আৰু ট্ৰাম্প

আমেৰিকাৰ সৈতে বাণিজ্যিক চুক্তিৰ আলোচনাৰ মাজতে ভাৰতৰ এক নতুন প্ৰস্তাৱ । পাৰস্পৰিক শুল্কৰ ক্ষেত্ৰত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ কঠোৰ স্থিতিৰ মাজতে কিছুমান ক্ষেত্ৰত পাৰস্পৰিক শুল্ক শূন্য কৰাৰ প্ৰস্তাৱ আগবঢ়াইছে নতুন দিল্লীয়ে । ষ্টীল, অটো পাৰ্টছ আৰু ঔষধৰ আমদানিৰ ওপৰত নিৰ্দিষ্ট পৰিমাণৰ পাৰস্পৰিক শুল্ক শূন্য কৰাৰ প্ৰস্তাৱ আগবঢ়াইছে ভাৰতে । দুয়োখন দেশৰ মাজত বাণিজ্যিক চুক্তিৰ আলোচনাত ইয়াক তাৎপৰ্যপূৰ্ণ বুলি গণ্য কৰিছে কূটনৈতিক মহলে ।

দ্বিতীয়বাৰৰ বাবে মাৰ্কিন ৰাষ্ট্ৰপতি হিচাপে হোৱাইট হাউছত প্ৰৱেশ কৰাৰ লগে লগে ট্ৰাম্পে পাৰস্পৰিক শুল্কৰ বিষয়ে এটা ডাঙৰ ঘোষণা কৰে । তেওঁ ভাৰতৰ ওপৰত ২৬ শতাংশ পাৰস্পৰিক শুল্ক ঘোষণা কৰে। ট্ৰাম্পে নিজৰ সিদ্ধান্ত ৯০ দিনৰ বাবে স্থগিত ৰখাৰ কথাও ঘোষণা কৰিছে । সেই ৯০ দিনৰ সময়সীমা শেষ হোৱাৰ পূৰ্বে আমেৰিকাই একাধিক দেশৰ সৈতে বাণিজ্যিক চুক্তি সম্পন্ন কৰিবলৈ বিচাৰিছে । ভাৰতৰ সৈতে বাণিজ্যিক চুক্তিৰ আলোচনাও যথেষ্ট অগ্ৰগতি লাভ কৰিছে । শেহতীয়াকৈ ভাৰত ভ্ৰমণ কৰিছিল আমেৰিকাৰ উপ-ৰাষ্ট্ৰপতি জে ডি ভেন্সে । বাণিজ্য চুক্তি সন্দৰ্ভত প্ৰধানমন্ত্ৰী নৰেন্দ্ৰ মোদীৰ সৈতে বৈঠকত মিলিত হয় ভেন্স ।

ট্ৰাম্পে দিয়া ৯০ দিনৰ সময়সীমা শেষ হোৱাৰ পূৰ্বে ভাৰত-আমেৰিকাৰ বাণিজ্যিক চুক্তি সম্পূৰ্ণ কৰাৰ বাবে দুয়োখন দেশে কেইবাটাও ক্ষেত্ৰত গুৰুত্ব আৰোপ কৰিছে । এনে পৰিস্থিতিত ভাৰতৰ বাণিজ্যিক বিষয়াসকল যোৱা মাহৰ শেষৰ ফালে ৱাশ্বিংটনলৈ গৈছিল । খবৰ অনুসৰি তীখা, অটো পাৰ্টছ, ঔষধৰ আমদানিৰ ওপৰত পাৰস্পৰিক শুল্ক এটা নিৰ্দিষ্ট সীমালৈকে শূন্য কৰাৰ প্ৰস্তাৱ আছিল । সেই সীমা অতিক্ৰম কৰা আমদানিৰ ক্ষেত্ৰত নিৰ্দিষ্ট হাৰত শুল্ক আৰোপ কৰা হ’ব । এই সন্দৰ্ভত আমেৰিকাৰ বক্তব্য এতিয়াও জানিব পৰা হোৱা নাই ।

চলিত বৰ্ষৰ ফেব্ৰুৱাৰী মাহৰ মাজভাগত আমেৰিকা ভ্ৰমণ কৰিছিল প্ৰধানমন্ত্ৰী মোদীয়ে । হোৱাইট হাউছত কেইবা ঘণ্টা ধৰি ট্ৰাম্পৰ সৈতে সাক্ষাৎ কৰে তেওঁ । সেই বৈঠকৰ অন্তত ট্ৰাম্পে কয় যে মোদী তেওঁতকৈ নিপুণ আলোচনাপন্থী । ভাৰত ভ্ৰমণ কৰা উপ-ৰাষ্ট্ৰপতি ভেন্সেও প্ৰধানমন্ত্ৰী মোদী এজন নিপুণ আলোচনাপন্থী বুলি কয় । নিজৰ দেশক প্ৰথম স্থান দিয়ে । সেইবাবেই আমেৰিকাই তেওঁক সন্মান কৰে । বাণিজ্যিক চুক্তিৰ প্ৰতি প্ৰধানমন্ত্ৰীৰ দায়বদ্ধতা স্পষ্ট । এতিয়া এই চুক্তি কেতিয়া সম্পূৰ্ণ হয় সেয়া হ’ব লক্ষ্যণীয় ।