বন্দে মাতৰমৰ পৰা পংক্তি কৰ্তন কৰি পাপ কৰিছিল নেহৰুৱে! বিজেপিৰ অভিযোগ

ভাৰতীয় জনতা পাৰ্টিয়ে শুকুৰবাৰে ভাৰতৰ প্ৰথম প্ৰধানমন্ত্ৰী জৱাহৰলাল নেহৰুৱে দেৱী দুৰ্গাক প্ৰশংসা কৰা ‘বন্দে মাতৰম’ৰ কিছুমান অংশ কাটি “ঐতিহাসিক পাপ” কৰাৰ অভিযোগ উত্থাপন কৰে।

ছ’চিয়েল মিডিয়া এক্সত বিজেপিৰ মুখপাত্ৰ চি আৰ কেশৱনে কয় যে নেহৰুৰ সভাপতিত্বত কংগ্ৰেছে ১৯৩৭ চনৰ ফৈজপুৰ অধিৱেশনত দলৰ জাতীয় গীত হিচাপে কেৱল এটা অংশ ছেদ কৰা বন্দে মাতৰমকহে গ্ৰহণ কৰিছিল। নেহৰুৱে সুভাষ চন্দ্ৰ বসুলৈ লিখা পত্ৰখনৰো তেওঁ উদ্ধৃতি দিয়ে য’ত নেহৰুৱে কয় যে বন্দে মাতৰমৰ দেৱী দুৰ্গাৰ লগত কোনো সম্পৰ্ক নাই আৰু বন্দে মাতৰম জাতীয় গীত হিচাপে উপযুক্ত নহয় বুলি মতামত আগবঢ়ায়।

“আমাৰ নৱ প্ৰজন্মৰ বাবে এইটো জনাটো অতি প্ৰয়োজনীয় যে “নেহৰুৰ নেতৃত্বত কংগ্ৰেছ দলে নিজৰ সাম্প্ৰদায়িক এজেণ্ডা অনুসৰণ কৰি, ১৯৩৭ চনৰ ফৈজপুৰ অধিৱেশনত বন্দে মাতৰমৰ সংক্ষিপ্ত সংস্কৰণকহে দলৰ জাতীয় গীত হিচাপে গ্ৰহণ কৰিছিল, আনহাতে প্ৰধানমন্ত্ৰী নৰেন্দ্ৰ মোদীয়ে আজি ১৫০ বছৰীয়া স্মৃতিচাৰণ উদ্বোধন কৰিব আৰু সমগ্ৰ দেশতে গৌৰৱময় বন্দে মাতৰমৰৰ সম্পূৰ্ণ সংস্কৰণ সমবেতভাৱে পৰিৱেশন কৰা হ’ব।” কেশৱনে কয়।

“গৌৰৱময় বন্দে মাতৰম আমাৰ জাতিৰ ঐক্য আৰু সংহতিৰ কণ্ঠস্বৰ হৈ পৰিল, আমাৰ মাতৃভূমিক উদযাপন কৰিলে, জাতীয়তাবাদী মনোভাৱ জগাই তুলিলে আৰু দেশপ্ৰেমৰ পোষকতা কৰিলে। ইয়াক জপ কৰাটো ইংৰাজে অপৰাধমূলক কাৰ্য হিচাপে গণ্য কৰিছিল। ই কোনো বিশেষ ধৰ্ম বা ভাষাৰ অন্তৰ্গত নাছিল। কিন্তু কংগ্ৰেছে গীতটোক ধৰ্মৰ লগত সংযোগ কৰাৰ ঐতিহাসিক পাপ আৰু বিভ্ৰান্তিৰ সৃষ্টি কৰিলে। নেহৰুৰ অধীনত কংগ্ৰেছে ধৰ্মীয় ভিত্তিৰ উদ্ধৃতি দি ইচ্ছাকৃতভাৱে দেৱী মা দুৰ্গাক প্ৰশংসা কৰা বন্দে মাতৰমৰ স্তৱক আঁতৰাই পেলাইছিল।” তেওঁ লগতে কয়।

বিজেপি নেতাগৰাকীয়ে লোকসভাৰ বিৰোধী নেতা ৰাহুল গান্ধীকো আক্ৰমণ কৰি নেহৰুৰ “হিন্দু বিৰোধী মানসিকতাই” চঠ পূজা সন্দৰ্ভত কংগ্ৰেছ নেতাৰ শেহতীয়া মন্তব্যত তীক্ষ্ণ প্ৰতিধ্বনি বিচাৰি পায় বুলি দাবী কৰে।

“১৯৩৭ চনৰ ১ ছেপ্টেম্বৰৰ এখন পত্ৰত নেহৰুৱে ক্ষোভিতভাৱে লিখিছে যে বন্দে মাতৰমৰ শব্দবোৰক যিকোনো ব্যক্তিয়ে দেৱীৰ সৈতে জড়িত বুলি গণ্য কৰাটো অৰ্থহীন আছিল। বন্দে মাতৰম জাতীয় গীত হিচাপে উপযোগী নহয় বুলিও তেওঁ উপহাসমূলকভাৱে মতামত আগবঢ়ায়। নেতাজী সুভাষ চন্দ্ৰ বসুৱে বন্দে মাতৰমৰ সম্পূৰ্ণ মৌলিক সংস্কৰণৰ তীব্ৰ পোষকতা কৰিছিল। ১৯৩৭ চনৰ ২০ অক্টোবৰত নেহৰুৱে নেতাজী বসুলৈ পত্ৰ লিখি দাবী কৰে যে বন্দে মাতৰমৰ পটভূমিয়ে মুছলমানসকলক বিৰক্ত কৰাৰ সম্ভাৱনা আছে। তেওঁ আৰু কয় যে বন্দে মাতৰমৰ বিৰুদ্ধে হোৱা আন্দোলনৰ সন্দৰ্ভত কোনো বিষয়বস্তু থকা যেন লাগে আৰু সাম্প্ৰদায়িকভাৱে প্ৰৱল লোকসকল ইয়াৰ দ্বাৰা প্ৰভাৱিত হ’ব।” কেশৱনে কয়।

“১৯৩৭ চনত যদি কংগ্ৰেছৰ সভাপতি হিচাপে নেহৰুৱে বন্দে মাতৰমৰ এটা অংশ ছেদ কৰি দেৱী মা দুৰ্গাৰ নাম আঁতৰাই পেলাইছিল, তেন্তে ২০২৪ চনৰ মাৰ্চ মাহত ৰাহুল গান্ধীয়ে কু-অভিপ্ৰায়েৰে মন্তব্য কৰিছিল যে ‘হিন্দু ধৰ্মত শক্তি নামৰ এটা শব্দ আছে আৰু আমি শক্তিৰ বিৰুদ্ধে যুঁজি আছো’। শেহতীয়াকৈ পবিত্ৰ ষঠ পূজাক নাটক আখ্যা দি অপমান আৰু বদনাম কৰি লাখ লাখ ভক্তৰ আৱেগক আঘাত কৰা ৰাহুল গান্ধীৰ মাজত নেহৰুৰ হিন্দু বিৰোধী মানসিকতাৰ স্পষ্ট ৰূপ দেখা যায়।” তেওঁ লগতে কয়।

It is imperative for our younger generation to know how the Congress party brazenly pandering to its communal agenda under the Presidentship of Nehru, adopted only a truncated Vande Mataram as the party’s national song in its 1937 Faizpur Session , while PM @narendramodi ji today… pic.twitter.com/13NBta11OV

— C.R.Kesavan (@crkesavan) November 7, 2025

কেশৱনে এই কথাও প্ৰকাশ কৰিছে যে প্ৰধানমন্ত্ৰী নৰেন্দ্ৰ মোদীয়ে শুকুৰবাৰে ইন্দিৰা গান্ধী ইনড’ৰ ষ্টেডিয়ামত বন্দে মাতৰমৰ ১৫০ বছৰীয়া স্মৃতিত বছৰজোৰা উদযাপন আৰম্ভ কৰিবলৈ সাজু হৈছে। অনুষ্ঠানৰ সময়ত তেওঁ এটা স্মৃতিচাৰণ ডাকটিকট আৰু মুদ্ৰাও মুকলি কৰিব। এই কাৰ্যসূচীত ভাৰতৰ স্বাধীনতা আন্দোলনক অনুপ্ৰাণিত কৰা আৰু জাতীয় গৌৰৱ আৰু ঐক্যক উদগনি যোগোৱা গীতটিৰ বছৰজোৰা তথা দেশজোৰা স্মৃতিচাৰণ আনুষ্ঠানিকভাৱে উন্মোচন কৰা হ’ব।

“বংকিম চন্দ্ৰ চেটাৰ্জীৰ দ্বাৰা ৰচিত ‘বন্দে মাতৰম’ প্ৰথম প্ৰকাশ হৈছিল ১৮৭৫ চনৰ ৭ নৱেম্বৰত ‘বংগদৰ্শন’ নামৰ সাহিত্য আলোচনীত। “পিছলৈ বাংকিম চন্দ্ৰ চেটাৰ্জীয়ে গীতটো তেওঁৰ অমৰ উপন্যাস ‘আনন্দমথ’ত সন্নিৱিষ্ট কৰিলে, যিখন ১৮৮২ চনত প্ৰকাশ পাইছিল। ই জাতিটোৰ সভ্যতা, ৰাজনৈতিক আৰু সাংস্কৃতিক চেতনাৰ অবিচ্ছেদ্য অংগ হৈ পৰিছে।” চৰকাৰী বিবৃতিত কোৱা হৈছে।