৫০০ টকীয়া নোটৰ প্ৰচলন সন্দৰ্ভত পোহৰলৈ আহিছে ডাঙৰ তথ্য, বন্ধ হ’ব নেকি প্ৰচলন?

প্ৰতীকী ছবি

যোৱা এসপ্তাহ ধৰি এটা বিষয়ে আটাইতকৈ বেছি বাতৰিৰ শিৰোনাম দখল কৰিছে, সেই বিষয়টো হৈছে ৫০০ টকীয়া নোট । আচলতে সংবাদ মাধ্যমত এটা খবৰ চলি আছে যে অনাগত দিনত ৫০০ টকীয়া নোট বন্ধ হ’ব পাৰে । এই খবৰৰ আঁৰত দিয়া কাৰণটো হ’ল ভাৰতীয় ৰিজাৰ্ভ বেংকে এ টি এমত ১০০ আৰু ২০০ টকীয়া নোটৰ সংখ্যা বৃদ্ধি কৰিবলৈ বেংকক নিৰ্দেশ দিছিল । ইয়াৰ বাবে বেংকক সময়সীমাও দিছে আৰ বি আইয়ে । আৰ বি আইৰ এই নিৰ্দেশৰ পিছত হঠাৎ আলোচনালৈ আহে ৫০০ টকীয়া নোটৰ প্ৰসংগ ।

শেহতীয়াকৈ চৰকাৰৰ ফেক্ট চেক ইউনিট পিআইবিয়ে ৫০০ টকীয়া নোট নিষিদ্ধ কৰাৰ খবৰক লৈ টুইট কৰিছে । পিআইবিৰ এই তথ্য পৰীক্ষাত কোৱা হৈছে যে কেপিটেল টিভি নামৰ ইউটিউব চেনেল এটাই ৫০০ টকীয়া নোট নিষিদ্ধ কৰাৰ খবৰ দেখুৱাইছে । এই খবৰত কোনো সত্যতা নাই । চৰকাৰী ইউনিট পিআইবিয়ে ফেক্ট চেকত ভুৱা আখ্যা দিছে এই খবৰক । পিআইবিয়ে কয় যে আৰ বি আইয়ে এনে কোনো ঘোষণা কৰা নাই । পিআইবিৰ ফেক্ট চেক অনুসৰি ৫০০ টকীয়া নোট নিষিদ্ধ কৰা নহয় আৰু ই প্ৰচলন হৈ থাকিব ।

এই সমগ্ৰ বিষয়টোৰ চৰ্চা আৰম্ভ হৈছিল যেতিয়া ভাৰতীয় ৰিজাৰ্ভ বেংকে দেশৰ সকলো বেংকক এটিএমত ১০০ আৰু ২০০ টকীয়া নোটৰ প্ৰচলন বৃদ্ধি কৰিবলৈ নিৰ্দেশ দিছিল । ইয়াৰ পিছত দেশৰ বিভিন্ন বিশেষজ্ঞই এই নিৰ্দেশনা নিজ নিজ ধৰণে ল’বলৈ আৰম্ভ কৰিলে । এজন বিশেষজ্ঞৰ মতে, বেংকৰ এটিএমত প্ৰথমে ১০০ আৰু ২০০ টকীয়া নোটৰ সংখ্যা বৃদ্ধি কৰা হ’ব আৰু ৫০০ টকীয়া নোট ক্ৰমান্বয়ে বজাৰৰ পৰা উলিয়াই বেংকত জমা কৰা হ’ব । এই প্ৰক্ৰিয়াটো এদিনতে সম্পূৰ্ণ নহ’ব । কিন্তু আৰ বি আইয়ে ক্ৰমান্বয়ে ইয়াক প্ৰচলনৰ পৰা আঁতৰাই আনিব ।

ইয়াৰ পিছত এই বিষয়টোৱে অধিক গুৰুত্ব লাভ কৰিলে যেতিয়া অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৱে কেন্দ্ৰীয় চৰকাৰে ৫০০ টকীয়া আৰু তাৰ ওপৰৰ নোট নিষিদ্ধ কৰিব লাগে বুলি কৈছিল । তাৰ পিছত ৫০০ নোট শিৰোনামলৈ আহিছিল । চন্দ্ৰবাবু নাইডুৰ মতে, ডাঙৰ নোট হৈছে দুৰ্নীতিৰ আটাইতকৈ ডাঙৰ শিপা আৰু যদি ইয়াক নিৰ্মূল কৰিব লাগে তেন্তে ডাঙৰ নোটৰ প্ৰচলন বন্ধ কৰি লাগে ।