StarLink: ষ্টাৰলিংকৰ সস্তা প্লেন মুকলি, ভাৰতত প্ৰৱেশ কৰিলে জিঅ’-এয়াৰটেলক ঢোকে ঢোকে পানী খুৱাব!

ইলন মাস্কৰ চেটেলাইট ইণ্টাৰনেট সেৱা প্ৰদানকাৰী ষ্টাৰলিংকে যিকোনো সময়ত ভাৰতীয় বজাৰত প্ৰৱেশ কৰিব পাৰে। ভাৰতীয় বজাৰত প্ৰৱেশ কৰিলেই 5G ইণ্টাৰনেট সেৱা প্ৰদানকাৰী সংস্থাসমূহৰ কি হ’ব? সেইটোৱেই প্ৰশ্ন উত্থাপন হয়। কাৰণ ষ্টাৰলিংকে আমেৰিকাৰ বজাৰৰ বাবে আটাইতকৈ কম খৰচী পৰিকল্পনা আনিছে। এই পৰিকল্পনাৰ নাম দিয়া হৈছে ‘ৰেচিডেঞ্চিয়েল 100 MBPS’। ইয়াৰ খৰচ প্ৰতিমাহে মাত্ৰ ৪০ ডলাৰ। ভাৰতীয় মুদ্ৰাত যিটো প্ৰায় ৩৪০০ টকা। তেওঁলোকৰ আন পৰিকল্পনাতকৈ বহু কম। এই পদক্ষেপে বজাৰত এক নতুন প্ৰতিযোগিতাৰ সৃষ্টি কৰিব।

এই নতুন ৪০ ডলাৰৰ প্লেনটো বৰ্তমানৰ ১২০ ডলাৰৰ ৰেচিডেন্সিয়েল প্লেন আৰু ৮০ ডলাৰৰ ৰেচিডেন্সিয়েল লাইট প্লেনতকৈ বহু কম। কিন্তু সস্তীয়া ইণ্টাৰনেটৰ লগত এটা গুৰুত্বপূৰ্ণ সতৰ্কবাণীও আহিছে। নতুন প্লেনে ডাউনলোডৰ গতি ১০০ এমবিপিএছত দিয়া হৈছে। কিন্তু আপলোডৰ গতি বা ডাটা ব্যৱহাৰৰ কোনো সীমা নাই।

এই পৰিকল্পনা আপোনাৰ বাবে উপযুক্ত নেকি?

ষ্টাৰলিংকে স্পষ্টকৈ কৈছে যে, এই পৰিকল্পনা সৰু পৰিয়ালৰ বাবে আদৰ্শ। ২ৰ পৰা ৩ জন সদস্য থকা ঘৰত ইয়াক দৈনন্দিন ব্যৱহাৰৰ বাবে ডিজাইন কৰা হৈছে যেনে ৱেব ব্ৰাউজিং, ভিডিঅ’ কল, আৰু HD ভিডিঅ’ ষ্ট্ৰীমিং। যদি আপুনি একে সময়তে 4K ষ্ট্ৰীমিং কৰি আছে বা ডাঙৰ ডাঙৰ গেম ডাউনলোড কৰি আছে, তেন্তে এই পৰিকল্পনা আপোনাৰ বাবে নহয়। কাৰণ ইয়াক সাধাৰণ ব্যৱহাৰকাৰীক মনত ৰাখি ডিজাইন কৰা হৈছে।

আনহাতে, ৰেচিডেঞ্চিয়েল লাইট প্লেনে প্ৰায় ২৫০ এমবিপিএছ গতি প্ৰদান কৰাৰ বিপৰীতে ৰেচিডেঞ্চিয়েল প্লেনে ৪০০ এমবিপিএছ বা তাতকৈ অধিক গতি প্ৰদান কৰে।

দাম কিয় কমি ?

বজাৰত আধিপত্য বৃদ্ধি আৰু অধিক ব্যৱহাৰকাৰীক আকৰ্ষণ কৰিবলৈ ষ্টাৰলিংকে এই মূল্য হ্ৰাস কৰিছে। জুলাই মাহলৈকে এই কোম্পানীটোৰ সক্ৰিয় গ্ৰাহকৰ সংখ্যাই ২০ লাখ অতিক্ৰম কৰিছে। আমেৰিকাৰ বজাৰত আন ইণ্টাৰনেট সেৱা প্ৰদানকাৰীয়ে সাধাৰণতে প্ৰতিমাহে প্ৰায় ৮০ ডলাৰ লয়। পিছে ষ্টাৰলিংকৰ এই ৪০ ডলাৰৰ পৰিকল্পনা এতিয়া পৰম্পৰাগত ব্ৰডবেণ্ড কোম্পানীসমূহৰ বাবে এক ডাঙৰ প্ৰত্যাহ্বান।