ড’নাল্ড ট্ৰাম্পেই হওক বা ৰাষ্ট্ৰপতি পুটিন, কিয় দুই মহাশক্তিয়ে বিচাৰে প্ৰধানমন্ত্ৰী মোদীক?

দুই মহাশক্তিয়ে বিচাৰে প্ৰধানমন্ত্ৰী মোদীক

দুয়োখন শক্তিশালী দেশ ৰাছিয়া আৰু আমেৰিকাই দশক দশক ধৰি ভাৰতৰ গুৰুত্বপূৰ্ণ কৌশলগত অংশীদাৰ হৈ আহিছে। আমেৰিকাৰ সৈতে চলি থকা শুল্ক যুদ্ধ আৰু দ্ৰুতগতিত পৰিৱৰ্তিত বিশ্ব পৰিস্থিতিৰ প্ৰতি লক্ষ্য ৰাখি এই দুই মহাশক্তিৰ বাবে প্ৰধানমন্ত্ৰী কিয় ইমান গুৰুত্বপূৰ্ণ হৈ পৰিছে সেয়া প্ৰশ্ন কৰাটো স্বাভাৱিক। এই প্ৰশ্নটোও উত্থাপন হৈছে কাৰণ দুয়োজন নেতাই প্ৰধানমন্ত্ৰী মোদীৰ ৭৫ সংখ্যক জন্মদিনত অভিনন্দন জনাবলৈ ইমানেই আগ্ৰহী আছিল। আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰধানমন্ত্ৰীক “নৰেন্দ্ৰ” বুলি সম্বোধন কৰি বন্ধু বুলি অভিহিত কৰাৰ বিপৰীতে ৰাছিয়াৰ ৰাষ্ট্ৰপতি ভ্লাদিমিৰ পুটিনে প্ৰধানমন্ত্ৰী মোদীৰ অৱদানৰ প্ৰশংসা কৰে।

ট্ৰাম্পে প্ৰধানমন্ত্ৰী মোদীক বন্ধু বুলি আখ্যা দিয়ে

ভাৰতৰ ওপৰত আমেৰিকাই ৫০ শতাংশ শুল্ক আৰোপ কৰাৰ পিছত দুয়োখন দেশৰ সম্পৰ্কৰ ব্যৱধান হ্ৰাস কৰি ৰাষ্ট্ৰপতি ট্ৰাম্পে প্ৰধানমন্ত্ৰী মোদীক জন্মদিনৰ শুভেচ্ছা জনায়। ছ’চিয়েল মিডিয়াত এটা পোষ্টত ট্ৰাম্পে প্ৰধানমন্ত্ৰী মোদীক “নৰেন্দ্ৰ” বুলি সম্বোধন কৰি পুনৰবাৰ তেওঁক নিজৰ “বন্ধু” বুলি অভিহিত কৰে। ট্ৰাম্পে লিখিছে, ” এইমাত্ৰ মোৰ বন্ধু প্ৰধানমন্ত্ৰী নৰেন্দ্ৰ মোদীৰ সৈতে ফোনত কথা পাতিলোঁ। মই তেওঁক জন্মদিনৰ বহুত শুভেচ্ছা জনাইছো। তেওঁ এক উল্লেখযোগ্য কাম কৰি আছে।” তেওঁ লগতে কয়, “নৰেন্দ্ৰ, ৰাছিয়া আৰু ইউক্ৰেইনৰ মাজৰ যুদ্ধৰ অন্ত পেলোৱাত আপোনাৰ সমৰ্থনৰ বাবে ধন্যবাদ।”

পুটিনে প্ৰধানমন্ত্ৰী মোদীৰ অৱদানৰ প্ৰশংসা কৰে

ৰাষ্ট্ৰপতি ট্ৰাম্পে ৰাছিয়া আৰু ইউক্ৰেইনৰ যুদ্ধৰ অন্ত পেলোৱাৰ দাবীৰ মাজতে ৰাছিয়াৰ ৰাষ্ট্ৰপতি পুটিনে প্ৰধানমন্ত্ৰী মোদীক জন্মদিনত অভিনন্দন জনায়। ৰাছিয়াৰ ৰাষ্ট্ৰপতিগৰাকীয়ে তেওঁৰ বাৰ্তাত দ্বিপাক্ষিক সম্পৰ্ক সুদৃঢ় কৰাৰ বাবে প্ৰধানমন্ত্ৰী মোদীৰ ব্যক্তিগত প্ৰচেষ্টাক প্ৰশংসা কৰে। তেওঁ লিখিছে, “আপুনি (মোদীয়ে) চৰকাৰৰ মুৰব্বী হিচাপে কৰা কাম জৰিয়তে  দেশবাসীৰ মাজত এক অনন্য সন্মান অৰ্জন কৰিছে, আৰু এই প্ৰভাৱ বিশ্বৰ মঞ্চত স্পষ্ট হৈ পৰিছে। প্ৰধানমন্ত্ৰী মোদীৰ নেতৃত্বত ভাৰতে সামাজিক, অৰ্থনৈতিক, আৰু বৈজ্ঞানিক আৰু প্ৰযুক্তিগত ক্ষেত্ৰত উল্লেখযোগ্য সফলতা লাভ কৰিছে।”

ৰাছিয়াই ভাৰতক তেলৰ পৰা আৰম্ভ কৰি অস্ত্ৰ-শস্ত্ৰ বিক্ৰী

ৰাছিয়াৰ পৰা তেল ক্ৰয় কৰাৰ বাবে আমেৰিকাই ভাৰতৰ ওপৰত ২৫ শতাংশ অতিৰিক্ত শুল্ক আৰোপ কৰিছে। অৱশ্যে ৰাছিয়াৰ সৈতে ভাৰতৰ সম্পৰ্ক দীৰ্ঘদিনীয়া আৰু বিশ্বাসযোগ্য। প্ৰতিৰক্ষা চুক্তিৰ পৰা আৰম্ভ কৰি শক্তি যোগানলৈকে ভাৰতৰ বাবে ৰাছিয়া মূল অংশীদাৰ। ষ্টকহোম আন্তঃৰাষ্ট্ৰীয় শান্তি গৱেষণা প্ৰতিষ্ঠানৰ তথ্য অনুসৰি ২০১৯ চনৰ পৰা ২০২৩ চনৰ ভিতৰত ভাৰতে নিজৰ ৩৬ শতাংশ অস্ত্ৰ ৰাছিয়াৰ পৰা আমদানি কৰিছিল। ভাৰতে ইয়াৰ মুঠ তেল প্রয়োজনীয়তাৰ প্রায় ৮৮ শতাংশ আমদানি কৰে৷ বাণিজ্য মন্ত্ৰালয়ৰ তথ্য অনুসৰি ২০২৪-২৫ চনত ভাৰতে আমদানিৰ প্ৰায় ৩৫ শতাংশ তেল ৰাছিয়াৰ পৰা লাভ কৰিব। ইউক্ৰেইন যুদ্ধৰ পিছত ৰাছিয়াত জাৰি কৰা নিষেধাজ্ঞাৰ পিছতে ভাৰতক সৰ্বাধিক তেল বিক্ৰী কৰি আছে ৰাছিয়াই।

ভাৰত আমেৰিকাৰ সৰ্ববৃহৎ বাণিজ্যিক অংশীদাৰ

আমেৰিকাৰ সৰ্ববৃহৎ বাণিজ্যিক অংশীদাৰ হৈ পৰিছে ভাৰত । ২০২৪-২৫ চনত দুয়োখন দেশৰ মাজত মুঠ ১৩১.৮৪ বিলিয়ন ডলাৰৰ বাণিজ্য হৈছিল। ভাৰতে আমেৰিকাৰ পৰাও উচ্চ প্ৰযুক্তিৰ অস্ত্ৰ ক্ৰয় কৰে। ইয়াৰ উপৰিও ভাৰতে আমেৰিকাৰ সৈতে বছৰি প্ৰায় ৪১ বিলিয়ন ডলাৰত ব্যৱসায় কৰে। আগষ্ট মাহত দুয়োখন দেশৰ মাজত মুঠ সামগ্ৰী আৰু সেৱাৰ ৰপ্তানি মুঠ ৬৯.১৬ বিলিয়ন ডলাৰ হোৱাৰ বিপৰীতে আমদানিৰ পৰিমাণ আছিল মুঠ ৭৯.০৪ বিলিয়ন ডলাৰ। চলিত বিত্তীয় বৰ্ষৰ প্ৰথম পাঁচ মাহত (২০২৫ চনৰ এপ্ৰিল-আগষ্ট) পেট্ৰলিয়াম সামগ্ৰী (১৩.২৬ বিলিয়ন ডলাৰ), কয়লা আৰু ক’ক (২ বিলিয়ন ডলাৰ), ইলেক্ট্ৰনিক সামগ্ৰী (৯.৭৩ বিলিয়ন ডলাৰ), ৰাসায়নিক সামগ্ৰী (২.৪৯ বিলিয়ন ডলাৰ), উদ্ভিদ তেল (২ বিলিয়ন ডলাৰ), আৰু সাৰ (১.৬৫ বিলিয়ন ডলাৰ) আদি আমদানি কৰা হৈছিল।

ভাৰতৰ সৈতে ভাৰসাম্য ৰক্ষা কৰাটো দুয়োখন দেশৰ বাবে গুৰুত্বপূৰ্ণ

আন্তঃৰাষ্ট্ৰীয় ৰাজনীতিত ভাৰতে কেতিয়াও কোনো সামৰিক বা ৰাজনৈতিক গোটৰ অংশ হোৱা নাই। আন্তঃৰাষ্ট্ৰীয় ৰাজনীতিত ভাৰতে সদায় স্বতন্ত্ৰ আৰু নিৰপেক্ষ স্থিতি বজাই ৰাখিছে। এনে পৰিস্থিতিত দুয়োখন শক্তিশালী দেশেই ভাৰতৰ সৈতে ভাৰসাম্য ৰক্ষা কৰিব বিচাৰে। ভাৰতৰ বাবে আমেৰিকা আৰু ৰাছিয়া অপৰিহাৰ্য যদিও সাম্প্ৰতিক পৰিস্থিতিত ভাৰত অবিহনে আমেৰিকা আৰু ৰাছিয়াৰ বাবে আগবাঢ়ি যোৱাটো কঠিন। চীনে দুয়োখন দেশৰ বাবে এক উল্লেখযোগ্য প্ৰত্যাহ্বানৰ সৃষ্টি কৰি আছে।