অটল পেঞ্চন যোজনাত পূৰ্বৰ দৰে কৰিব নোৱাৰিব পঞ্জীয়ন, জানি লওক কি কি নিয়মৰ পৰিৱৰ্তন হৈছে আঁচনিখনত
অটল পেঞ্চন যোজনা (APY) ভাৰতৰ অসংগঠিত খণ্ডৰ শ্ৰমিকসকলৰ বাবে এক অতি গুৰুত্বপূৰ্ণ আঁচনি, বৃদ্ধ বয়সত আৰ্থিক সুৰক্ষা প্ৰদান কৰাৰ বাবে এই আঁচনি ৰূপায়ণ কৰা হৈছিল। এতিয়া পঞ্জীয়ন প্ৰক্ৰিয়া সহজ কৰি তুলিবলৈ নতুন নিয়ম ৰূপায়ণ কৰা হৈছে।
অটল পেঞ্চন যোজনা চমুকৈ APY ৰ পঞ্জীয়ন প্ৰক্ৰিয়া সহজ আৰু সুৰক্ষিত কৰাৰ বাবে চৰকাৰে নতুন নিয়ম ৰূপায়ণ কৰিছে। ডাক বিভাগে আনুষ্ঠানিক অধিসূচনা জাৰি কৰি কয় যে ২০২৫ চনৰ ১ অক্টোবৰৰ পৰা কাৰ্যকৰী হোৱাকৈ পুৰণি APY প্ৰ-পত্ৰ আৰু গ্ৰহণ কৰা নহ’ব।
নতুন পঞ্জীয়নৰ বাবে কেৱল নতুন, সংশোধিত প্ৰ-পত্ৰহে বৈধ হ’ব। এই আঁচনিৰ অধীনত ব্যক্তিসকলক প্ৰদান কৰা পেঞ্চন আৰু আনুষংগিক সেৱাসমূহ উন্নীত আৰু সুশৃংখলিতকৰণৰ বাবে পেঞ্চন পুঁজি নিয়ন্ত্ৰণ আৰু উন্নয়ন কৰ্তৃপক্ষৰ নিৰ্দেশনা অনুসৰি পদক্ষেপ গ্ৰহণ কৰা হৈছে।
অটল পেঞ্চন যোজনা কি?
অটল পেঞ্চন যোজনা ভাৰত চৰকাৰৰ সামাজিক সুৰক্ষা আঁচনি, বিশেষভাৱে দেশৰ অসংগঠিত খণ্ডৰ শ্ৰমিকসকলৰ বাবে এই আঁচনি ৰূপায়ণ কৰা হৈছে। ১৮ৰ পৰা ৪০ বছৰৰ ভিতৰৰ যিকোনো ভাৰতীয় নাগৰিকে এই আঁচনি গ্ৰহণ কৰিব পাৰে।
এই আঁচনিৰ অধীনত সদস্যসকলে ৬০ বছৰ বয়সত মাহেকীয়া পেঞ্চন লাভ কৰাৰ অধিকাৰ আছে, যিটো ন্যূনতম ১০০০ টকাৰ পৰা সৰ্বোচ্চ ৫,০০০ টকালৈকে হ’ব। পেঞ্চনৰ পৰিমাণ সদস্যৰ নিয়মীয়া জমা পুঁজিৰ ওপৰত নিৰ্ভৰ কৰে। ইয়াৰ উদ্দেশ্য হৈছে দৰিদ্ৰ আৰু মধ্যবিত্তীয় লোকসকলক বৃদ্ধ বয়সত আৰ্থিক নিৰাপত্তা প্ৰদান কৰা।
নতুন নিয়মৰ অধীনত কি কি পৰিৱৰ্তন হৈছে?
এতিয়া নতুন APY পঞ্জীয়ন কেৱল নতুন প্ৰ-পত্ৰৰ জৰিয়তেহে গ্ৰহণ কৰা হ’ব, য’ত কিছুমান নতুন প্ৰয়োজনীয় তথ্যও আহিব। এই প্ৰ-পত্ৰত বাধ্যতামূলক FATCA/CRS (বিদেশী কৰ সম্পৰ্কীয়)ৰ ঘোষণা অন্তৰ্ভুক্ত কৰা হৈছে। অৰ্থাৎ এতিয়া আবেদনকাৰীয়ে নিজৰ বিদেশী নাগৰিকত্বৰ তথ্য দিব লাগিব, যাতে আঁচনিখন ভাৰতীয় নাগৰিকৰ মাজতে সীমাবদ্ধ হৈ থাকে। ইয়াৰ উপৰিও নতুন APY একাউণ্ট কেৱল ডাকঘৰৰ জৰিয়তেহে খুলিব পাৰিব, কিয়নো এই একাউণ্টসমূহ ডাক সঞ্চয় একাউণ্টৰ সৈতে সংযুক্ত। ৩০ ছেপ্টেম্বৰ, ২০২৫ৰ পিছত পুৰণি প্ৰ-পত্ৰ ব্যৱহাৰ কৰি কোনো নতুন পঞ্জীয়ন কৰিব নোৱাৰিব।
পঞ্জীয়নৰ বাবে যোগ্যতাৰ মাপকাঠী
অটল পেঞ্চন যোজনা লাভ কৰিবলৈ আবেদনকাৰীৰ বয়স ১৮ৰ পৰা ৪০ বছৰৰ ভিতৰত হ’ব লাগিব। বেংক বা ডাকঘৰত সঞ্চয় একাউণ্টো থাকিব লাগিব। তেওঁলোক কৰদাতা হ’ব নালাগে। পঞ্জীয়নৰ সময়ত আধাৰ কাৰ্ড আৰু মোবাইল নম্বৰ দিয়াটো বাধ্যতামূলক, যাতে আপুনি মোবাইল ফোনত পোনপটীয়াকৈ গুৰুত্বপূৰ্ণ আঁচনিৰ আপডেট লাভ কৰিব পাৰে।
ডাকঘৰ আৰু বেংক শাখালৈ নিৰ্দেশনা
সমগ্ৰ দেশৰ সকলো ডাকঘৰক কেৱল নতুনকৈ সংশোধিত APY প্ৰ-পত্ৰ ব্যৱহাৰ কৰিবলৈ আৰু জনসাধাৰণক ইয়াৰ বিষয়ে সবিশেষ জনাবলৈ নিৰ্দেশ দিছে ডাক বিভাগে। এই পৰিৱৰ্তনৰ বিষয়ে তথ্য সকলো ডাকঘৰৰ জাননী ফলকতো পোষ্ট কৰা হ’ব, যাতে সকলোৱে এই নতুন নিয়মৰ বিষয়ে অৱগত হয়।
