ব্যয়বহুল হ’ব Zomato-Swiggy ৰ খাদ্য ! প্ৰতিটো অৰ্ডাৰত আপুনি অতিৰিক্ত কিমান টকা দিব লাগিব জানেনে?

মাজে মাজে Zomato বা Swiggy ৰ পৰা খাদ্য অৰ্ডাৰ কৰে নেকি? যদি কৰে তেন্তে আপোনাৰ বাবে বেয়া খবৰ ! কাৰণ ২২ ছেপ্টেম্বৰৰ পৰা খাদ্য ডেলিভাৰী এপসমূহৰ ডেলিভাৰী মাচুলৰ ওপৰত ১৮ শতাংশ জি এছ টি বা সামগ্ৰী আৰু সেৱা কৰ আৰোপ কৰা হ’ব। কেন্দ্ৰীয় বিত্তমন্ত্ৰী নিৰ্মলা সীতাৰমণে এই সিদ্ধান্ত ঘোষণা কৰিছে।

আন্তঃৰাষ্ট্ৰীয় সংস্থা মৰ্গান ষ্টেনলিৰ হিচাপ অনুসৰি Zomato ৰ প্ৰতিটো অৰ্ডাৰত আপোনাৰ খৰচ প্ৰায় ২ টকা বৃদ্ধি পাব পাৰে। Swiggy ৰ ক্ষেত্ৰত এই বৃদ্ধি হ’ব পাৰে ২ টকা ৬০ পইচা। অৰ্থাৎ এই অতিৰিক্ত ধন আপোনাৰ অৰ্ডাৰৰ মুঠ বিলত যোগ হ’ব।

উল্লেখ্য যে, প্ৰায়ে চহৰৰ অঞ্চলত Zomato বা Swiggy ত খাদ্য অৰ্ডাৰ কৰাৰ প্ৰৱণতা বৃদ্ধি পাইছে। ইয়াৰ মাজতে এই সিদ্ধান্ত গ্ৰহণ কৰিছে কেন্দ্ৰই।

দীৰ্ঘদিন ধৰি ডেলিভাৰী মাচুল ‘পাছ-থ্ৰু কষ্ট’ বুলি দেখুৱাই জি এছ টি আদায় নিদিলে খাদ্য ডেলিভাৰী কোম্পানীয়ে। এনেদৰে নিয়ম বাইপাছ কৰাটো মানি ল’ব নোৱাৰিলে চৰকাৰে। ফলত এই নতুন নিয়ম অনা হৈছে বুলি কোৱা হৈছে।

যি সময়ত কোম্পানীসমূহে প্লেটফৰ্ম চাৰ্জ আৰু চাৰ্জ প্ৰাইচিঙৰ দৰে কেইবাটাও চাৰ্জ বৃদ্ধি কৰিছে, সেই সময়তে চৰকাৰে ডেলিভাৰী চাৰ্জত জি এছ টি আৰোপ কৰাৰ সিদ্ধান্ত গ্ৰহণ কৰিছে। ফলত এই অতিৰিক্ত কৰৰ বোজা কঢ়িয়াব লাগিব সাধাৰণ গ্ৰাহকে।