শুল্ক সন্দৰ্ভত ট্ৰাম্পৰ গুৰুত্বপূৰ্ণ সিদ্ধান্ত, কেবাটাও সামগ্ৰীৰ ওপৰত থকা শুল্ক বাতিল

আমেৰিকাৰ ৰাষ্ট্ৰপতি ড’নাল্ড ট্ৰাম্পে বিশ্বৰ দেশসমূহৰ ওপৰত আৰোপ কৰা শুল্কত কিছু পৰিৱৰ্তন কৰিছে। তেওঁ পাৰস্পৰিক শুল্কৰ পৰা কিছুমান সামগ্ৰী বাদ দিছে, অৰ্থাৎ এতিয়া ট্ৰাম্পৰ পাৰস্পৰিক শুল্ক কেৱল কিছুমান নিৰ্বাচিত সামগ্ৰীৰ ওপৰতহে কাৰ্যকৰী হ’ব।

আমেৰিকাৰ হোৱাইট হাউছে যোৱা ২ এপ্ৰিলত কাৰ্যকৰী হোৱা পাৰস্পৰিক শুল্কত পৰিৱৰ্তন সাধন কৰি বুলিয়ন সম্পৰ্কীয় সামগ্ৰীকে ধৰি কিছুমান সামগ্ৰী আৰু কিছুমান গুৰুত্বপূৰ্ণ খনিজ আৰু ঔষধজাত সামগ্ৰী এই শুল্কৰ পৰা বাদ দিছে।

হোৱাইট হাউছে জনোৱা মতে, নতুন অৰ্ডাৰত এলুমিনিয়াম হাইড্ৰ’ক্সাইড, ৰেজিন আৰু ছিলিকন সামগ্ৰীও অন্তৰ্ভুক্ত কৰা হৈছে, যিবোৰৰ ওপৰত পাৰস্পৰিক শুল্ক আৰোপ কৰা হ’ব। শুকুৰবাৰে জাৰি কৰা কাৰ্যবাহী আদেশত এই পৰিৱৰ্তন কৰা হৈছে। অহা সোমবাৰৰ পৰা কাৰ্যকৰী হ’ব এই পৰিৱৰ্তন।

কোনবোৰ সামগ্ৰীত শুল্ক আৰোপ কৰা নহয়?

শুকুৰবাৰে ৰাষ্ট্ৰপতি ড’নাল্ড ট্ৰাম্পে এক বিশেষ আদেশ জাৰি কৰি গ্ৰেফাইট, টাংষ্টেন, ইউৰেনিয়াম, গোল্ড বুলিয়ন আৰু আন কেইবাটাও ধাতুৰ ওপৰত দেশভিত্তিক শুল্ক প্ৰত্যাহাৰ কৰে। কিন্তু ছিলিকন সামগ্ৰীৰ ওপৰত এই শুল্ক আৰোপ কৰা হৈছে।

ইতিমধ্যে বাণিজ্য বিভাগৰ অধীনত থকা ছ্যুড’ইফেড্ৰিন, এন্টিবায়টিক আৰু আন কিছুমান ঔষধকো এই নতুন ব্যৱস্থাৰ পৰা আঁতৰাই ৰখা হৈছে। ছিলিকন সামগ্ৰীৰ উপৰিও ট্ৰাম্পে ৰেজিন আৰু এলুমিনিয়াম হাইড্ৰ’ক্সাইডৰ ওপৰতো শুল্ক বৃদ্ধি কৰাৰ সিদ্ধান্ত লৈছে।

ট্ৰাম্পৰ এই বিশ্বব্যাপী শুল্কসমূহ তেওঁৰ বৃহত্তৰ পৰিকল্পনাৰ অংশ য’ত তেওঁ বাণিজ্যিক ভাৰসাম্যহীনতাক শুধৰণি কৰিব বিচাৰে। তেওঁ ইয়াক ৰাষ্ট্ৰীয় নিৰাপত্তাৰ প্ৰতি ভাবুকি বুলি অভিহিত কৰিছে। যোৱা মাহত কেইবাখনো দেশৰ ওপৰত পৃথকে পৃথকে শুল্ক বৃদ্ধি কৰাৰ পূৰ্বে ট্ৰাম্পে কিছুমান দেশৰ সৈতে চুক্তি কৰিছিল। য’ত বিদেশী বিনিয়োগকাৰীয়ে কম শুল্কৰ বিনিময়ত আমেৰিকাৰ সামগ্ৰীৰ ওপৰত থকা নিষেধাজ্ঞা প্ৰত্যাহাৰ কৰিব পাৰিব।

এই শুল্ক আৰু কিছুমান চুক্তি কেইবামাহো ধৰি খৰখেদাকৈ গৃহীত হৈছিল। ইয়াৰ ফলত অত্যাৱশ্যকীয় বজাৰত প্ৰভাৱ পৰিব পাৰে আৰু আমেৰিকাত নিৰ্মাণ বা লাভ কৰিব নোৱাৰা সামগ্ৰীৰ মূল্য বৃদ্ধি পাব পাৰে বুলি উদ্বেগ প্ৰকাশ কৰিছে।