৩১ ডিচেম্বৰ অন্তিম দিন! তাৰ পূৰ্বে কৰক এইসমূহ কাম, অন্যথা ডাঙৰ বিপদত পৰিব…

৩১ ডিচেম্বৰৰ পূৰ্বে কৰক এইসমূহ কাম

নৱবৰ্ষৰ উদযাপন আৰু পাৰ্টিৰ হুলস্থূলৰ মাজত আপুনি আপোনাৰ আটাইতকৈ গুৰুত্বপূৰ্ণ আৰ্থিক কামবোৰ পাহৰি গৈছে নেকি?  দ্ৰুতগতিত সলনি হৈছে কেলেণ্ডাৰ আৰু ২০২৫ চনৰ অন্ত পৰিবলৈ মাজত মাত্ৰ কেইটামান দিন বাকী। কিন্তু ইয়াৰ লগে লগে কিছুমান গুৰুত্বপূৰ্ণ দায়িত্বও আছে। তোমাৰ হাতত মাত্ৰ ন দিন বাকী আছে।

যদি আপুনি আয়কৰ, বেংকিং, আৰু পৰিচয় পত্ৰৰ সৈতে জড়িত এই গুৰুত্বপূৰ্ণ কামসমূহ ৩১ ডিচেম্বৰৰ ভিতৰত সম্পূৰ্ণ নকৰে, তেন্তে ১ জানুৱাৰীৰ পুৱাই নতুন সমস্যা আৰু আৰ্থিক লোকচান হ’ব পাৰে। কেৱল জৰিমনা ভৰিবলগীয়া নহয়, বেংক একাউণ্ট আৰু গুৰুত্বপূৰ্ণ নথি-পত্ৰ ব্লক হোৱাৰ আশংকাও আছে।

আই টি আৰ ফাইলিং

আটাইতকৈ ডাঙৰ চিন্তা হ’ব লাগে ২০২৪-২৫ বিত্তীয় বৰ্ষৰ বাবে এতিয়াও আয়কৰ ৰিটাৰ্ণ (আইটিআৰ) দাখিল নকৰা কৰদাতাসকলৰ বাবে। আয়কৰ বিভাগৰ নিয়ম অনুসৰি ২০২৫ চনৰ ৩১ ডিচেম্বৰ হৈছে “Belated ITR” দাখিল কৰাৰ শেষ তাৰিখ। যদি আপুনি এই তাৰিখটো মিছ কৰে, তেন্তে আপুনি সাধাৰণ প্ৰক্ৰিয়াৰ অধীনত আপোনাৰ ৰিটাৰ্ণ দাখিল কৰিব নোৱাৰিব। তাৰ পিছত আপুনি “আপডেটেড ৰিটাৰ্ণ” (ITR-U)ৰ আশ্ৰয় ল’ব লাগিব, যাৰ ফলত গধুৰ জৰিমনা আৰু অতিৰিক্ত কৰ লাগিব পাৰে।

কেৱল এয়াই নহয়, ৰিটাৰ্ণ দাখিল সময়ত ভুল কৰাসকলৰ বাবেও এয়া শেষ তাৰিখ। নাম, বেংকৰ বিৱৰণ, বা আয়ৰ যিকোনো ভুল শুধৰণি কৰিবলৈ সংশোধিত আইটিআ (Revised ITR) ৰ দাখিল কৰাৰ এইটোৱেই অন্তিম সুযোগ। ইয়াৰ পিছত আপোনাৰ অতীতৰ ভুলৰ ফলত নতুন বছৰত জাননী আহিব পাৰে।

পেন-আধাৰ লিংক

চৰকাৰ তথা আয়কৰ বিভাগে আপোনাৰ পেন কাৰ্ড আধাৰৰ সৈতে লিংক কৰাৰ সন্দৰ্ভত দীৰ্ঘদিন ধৰি সকীয়াই দি আহিছে। এতিয়া ২০২৫ চনৰ ৩১ ডিচেম্বৰৰ বাবে সময়সীমা নিৰ্ধাৰণ কৰা হৈছে।এই বিষয়টো অত্যন্ত গুৰুতৰ কাৰণ সময়সীমাৰ ভিতৰত এই দুখন নথি লিংক নকৰিলে ২০২৬ চনৰ ১ জানুৱাৰীৰ পৰা আপোনাৰ পেন কাৰ্ড নিষ্ক্ৰিয় হৈ পৰিব।

আপোনাৰ পেন কাৰ্ড নিষ্ক্ৰিয় কৰিলে আপোনাৰ আৰ্থিক জীৱনত প্ৰত্যক্ষ প্ৰভাৱ পৰিব। আয়কৰ ৰিটাৰ্ণ দাখিল কৰিব নোৱাৰিব বা ধন ঘূৰাই পোৱাৰ দাবী কৰিব নোৱাৰিব। আনকি মিউচুৱেল ফাণ্ড, ষ্টক মাৰ্কেটত বিনিয়োগ  আৰু ৫০,০০০ তকৈ অধিক  বেংকিং লেনদেন সম্পূৰ্ণৰূপে বন্ধ হ’ব পাৰে। বৰ্তমান ইয়াক লিংক কৰিবলৈ ১০০০ টকা লেট মাচুলৰ প্ৰয়োজন হয় যদিও সময়সীমা পাৰ হোৱাৰ পিছত লোকচান বহুত বেছি হ’ব পাৰে।

বেংকৰ লকাৰ আৰু পেঞ্চন

কেৱল কৰ নহয়, বেংকিং সম্পৰ্কীয় কামৰ বাবেও এয়া শেষ সময়। বেংকৰ লকাৰ থাকিলে সাৱধান হওক। ভাৰতীয় ৰিজাৰ্ভ বেংকৰ গাইডলাইনৰ অধীনত সকলো লকাৰ ধাৰীয়ে নিজৰ বেংকৰ সৈতে লকাৰ চুক্তি নবীকৰণ বা আপডেট কৰিব লাগিব। যদিহে ৩১ ডিচেম্বৰৰ ভিতৰত এই প্ৰক্ৰিয়া সম্পূৰ্ণ নহয় তেন্তে বেংকে নতুন বছৰত আপোনাৰ লকাৰ খোলাত বাধা দিব পাৰে।

আমাৰ জ্যেষ্ঠ নাগৰিক আৰু পেঞ্চনাৰসকলৰ বাবেও এই সময় অতি গুৰুত্বপূৰ্ণ। নিৰৱচ্ছিন্নভাৱে চৰকাৰী পেঞ্চনৰ সুবিধা লাভ কৰি থাকিবলৈ জীৱনৰ প্ৰমাণ পত্ৰ জমা দিয়াটো বাধ্যতামূলক। বহু পেঞ্চনাৰসকলে হয়তো নৱেম্বৰ মাহত এই প্ৰক্ৰিয়াটো সম্পূৰ্ণ কৰিছে, কিন্তু যদি তেওঁলোকে কিবা কাৰণত এই প্ৰক্ৰিয়াটো বাদ দিছিল, তেন্তে যিকোনো মূল্যতে ৩১ ডিচেম্বৰৰ ভিতৰত জমা দিয়ক। তেনে নকৰিলে পিছৰ মাহৰ পৰা পেঞ্চনৰ ধনৰাশি বন্ধ হৈ যাব পাৰে, যাৰ ফলত বৃদ্ধ বয়সত আপোনাৰ আৰ্থিক সুৰক্ষা বিপন্ন হ’ব পাৰে।