EPFOৰ ডাঙৰ আপডেট: এই মাহৰ পৰা UPIৰ জৰিয়তে উলিয়াব পাৰিব পিএফ…

EPFO

EPFO-এ সমগ্ৰ দেশৰ লাখ লাখ কৰ্মচাৰীৰ বাবে এক বৃহৎ আৰু আশ্বস্ত কৰা আপডেট ঘোষণা কৰিছে। ২০২৬ চনৰ এপ্ৰিল মাহৰ পৰা কৰ্মচাৰীয়ে ইউ পি আইৰ জৰিয়তে পোনপটীয়াকৈ পি এফ পুঁজি উলিয়াব পাৰিব। অৰ্থাৎ দীঘলীয়া ফৰ্ম, দাবী, অপেক্ষাৰ হেঁচা বহুলাংশে নাইকিয়া হ’ব। ইউপিআই পিন ব্যৱহাৰ কৰি পিএফৰ ধন পোনপটীয়াকৈ বেংক একাউণ্টলৈ ট্ৰেন্সফাৰ কৰিব পাৰিব। এইটো ম’বাইল পেমেণ্ট কৰাৰ দৰেই সহজ হ’ব। এই পৰিৱৰ্তনে ইপিএফঅ’ৰ প্ৰায় ৮ কোটি সদস্যক প্ৰত্যক্ষভাৱে লাভৱান কৰিব বুলি আশা কৰা হৈছে।

ইউপিআইৰ জৰিয়তে পিএফ উলিওৱা: কি সলনি হ’ব

খবৰ অনুসৰি ইপিএফঅ’ই ২০২৬ চনৰ এপ্ৰিল মাহৰ পৰা ইউপিআইৰ জৰিয়তে পিএফ উলিওৱাৰ সুবিধা আৰম্ভ কৰিব।সদস্যসকলে তেওঁলোকৰ বেংক একাউণ্টৰ সৈতে সংযুক্ত ইউপিআই আইডি ব্যৱহাৰ কৰিব পাৰিব। দৈনন্দিন ডিজিটেল পেমেণ্টৰ বাবে ব্যৱহাৰ কৰা একেটা ইউপিআই পিন লেনদেন সম্পূৰ্ণ কৰাৰ বাবে বৈধ হ’ব। যোগ্য পি এফৰ ধনৰাশি সদস্যজনক আগতীয়াকৈ প্ৰদৰ্শন কৰা হ’ব, আৰু সেই তথ্যৰ ভিত্তিত ধন পোনপটীয়াকৈ একাউণ্টলৈ স্থানান্তৰ কৰা হ’ব। তাৰ পিছত সদস্যসকলে এই ধনৰাশি ইউপিআই পেমেণ্ট, এটিএম নগদ ধন, বা আন যিকোনো প্ৰয়োজনীয়তাৰ বাবে ব্যৱহাৰ কৰিব পাৰিব।

এই নতুন ব্যৱস্থা ৰূপায়ণৰ বাবে শ্ৰম মন্ত্ৰালয় আৰু ইপিএফঅ’ই একেলগে কাম কৰি আছে। প্ৰতিবেদনসমূহে ইংগিত দিয়ে যে চফ্ট ৱেৰটোৰ সৈতে জড়িত কিছুমান কাৰিকৰী সমস্যা বৰ্তমান মসৃণভাৱে কাম কৰাটো নিশ্চিত কৰিবলৈ সমাধান কৰা হৈছে। পৰিকল্পনা হৈছে একাউণ্টত নিৰ্দিষ্ট পৰিমাণৰ পি এফ লক কৰা, আৰু বাকী ধন প্ৰয়োজন অনুসৰি ইউ পি আইৰ জৰিয়তে উলিয়াব পৰা যাব। ইয়াৰ দ্বাৰা সদস্যসকলক লিকুইডিটি প্ৰদান কৰা হ’ব আৰু তেওঁলোকৰ অৱসৰৰ সঞ্চয় সুৰক্ষিত কৰা হ’ব।

বৰ্তমান সদস্যসকলে পি এফ প্ৰত্যাহাৰ কৰিবলৈ দাবী দাখিল কৰিবলগীয়া হৈছে, যিটো সময়সাপেক্ষ। অৱশ্যে অটো-ছেটেলমেণ্ট মোডৰ অধীনত দাবীসমূহ এতিয়া তিনিদিনৰ ভিতৰত নিষ্পত্তি কৰা হয়। ইতিমধ্যে চৰকাৰে অটো ছেটেলমেণ্টৰ সীমা ১ লাখৰ পৰা ৫ লাখলৈ বৃদ্ধি কৰিছে। ২০২৫ চনৰ অক্টোবৰ মাহত আংশিক পি এফ উলিওৱাৰ নিয়মসমূহো সৰল কৰি ১৩টা জটিল নিয়মক তিনিটা ভাগত একত্ৰিত কৰা হয়। এই নিয়মৰ অধীনত অসুস্থতা, শিক্ষা, বিবাহ, বাসগৃহ, আৰু বিশেষ পৰিস্থিতিৰ বাবে যোগ্য পি এফৰ ধনৰ ১০০ শতাংশ পৰ্যন্ত উলিয়াব পাৰি।

নতুন নিয়ম অনুসৰি শিক্ষাৰ বাবে ১০ বাৰ আৰু বিবাহৰ বাবে ৫ বাৰ পি এফ উলিওৱাৰ অনুমতি দিয়া হৈছে। এই ধন উলিওৱাৰ বাবে নূন্যতম ১২ মাহৰ সেৱাৰ প্ৰয়োজন। ৮.২৫ শতাংশ বাৰ্ষিক সুত আৰু কম্পাউণ্ডিং বেনিফিট লাভ কৰি থাকিবলৈ সদস্যৰ একাউণ্টত নূন্যতম ২৫ শতাংশ পি এফ বেলেঞ্চ থাকিব লাগিব। অকালতে চূড়ান্ত পি এফ নিষ্পত্তিৰ বাবে অপেক্ষাৰ সময়সীমা ১২ মাহলৈ বৃদ্ধি কৰা হৈছে, আৰু পেঞ্চন উলিওৱাৰ সময়সীমা ৩৬ মাহলৈ বৃদ্ধি কৰা হৈছে। সামগ্ৰিকভাৱে ইপিএফঅ’ৰ এই পদক্ষেপক পিএফক অধিক নমনীয় আৰু সদস্য-বন্ধুত্বপূৰ্ণ কৰি তোলাৰ দিশত এক ডাঙৰ পদক্ষেপ বুলি গণ্য কৰা হৈছে।