পুনৰ ডাইনীৰ সন্দেহ ! অন্ধ বিশ্বাসৰ বলি হৈ দুই বৃদ্ধাক নিৰ্যাতন, খুৱালে মানুহৰ বিষ্ঠা, গ্ৰেপ্তাৰ মহিলাসহ ১৩ জনক

বিজ্ঞান আৰু প্ৰযুক্তি বিদ্যাই আমাৰ সমাজখনক বহু দূৰ আগুৱাই লৈ গৈছে । কিন্তু আমাৰ সমাজৰ একাংশ লোক প্ৰচলিত অন্ধ বিশ্বাস, কুসংস্কাৰৰ পৰা এতিয়াও মুক্ত হ’ব পৰা নাই । শেহতীয়াকৈ গোৱালপাৰা জিলাত সংঘটিত এক ঘটনাই তীব্ৰ প্ৰতিক্ৰিয়াৰ সৃষ্টি কৰিছে । সূত্ৰ খবৰ অনুসৰি, মিছন বিৰুবালাই পোহৰলৈ আনিলে দুগৰাকী বৃদ্ধাক ডাইনী সজাই চৰম নিৰ্যাতন চলোৱাৰ তথ্য ।

সূত্ৰৰ খবৰ অনুসৰি, গোৱালপাৰা জিলাৰ লক্ষীপুৰ থানাৰ অন্তৰ্গত কৃষ্ণাপুৰ গাঁৱত সভ্য সমাজক লজ্জানত কৰা এই জঘন্য ঘটনাটো সংঘটিত হৈছে । অভিযোগ অনুসৰি, গাঁওখনৰ একাংশ লোকে অন্ধ বিশ্বাসত ডুব গৈ দুগৰাকী বৃদ্ধাক ডাইনী সজাই চৰম নিৰ্যাতন চলায় । জানিব পৰা মতে, গাঁওখনৰ এগৰাকী কিশোৰ দীৰ্ঘদিনৰ পৰা অসুস্থ হৈ থকাত পৰিয়ালৰ লোকে কাষৰীয়া বামুনডাঙা গাঁৱৰ প্ৰশ্ন ৰাভা নামৰ এগৰাকী বেজালিৰ কাষ চাপে ।

সেই অনুসৰি বেজালি প্ৰশ্ন ৰাভাই কিশোৰটিক তন্ত্ৰমন্ত্ৰৰে চিকিৎসা কৰি ডাইনী লম্ভা বুলি কয় । ইয়াৰ পাছতে গাঁওখনৰে একাংশ লোকে কিশোৰটি অসুস্থ হোৱাৰ আঁৰত দুগৰাকী বৃদ্ধাৰ হাত থকা বুলি সন্দেহ কৰে । অৰ্থাৎ গাঁওখনৰে দুগৰাকী বৃদ্ধাক ডাইনী বুলি সন্দেহ কৰে একাংশ লোকে । অভিযোগ অনুসৰি, আনকি গাঁওখনৰ গাঁও প্ৰধান কমল ৰাভাৰ নেতৃত্বতে এই দুই বৃদ্ধাৰ বিৰুদ্ধে ব্যৱস্থা গ্ৰহণৰ সিদ্ধান্ত লোৱা হয় ।

সূত্ৰ খবৰ অনুসৰি, যোৱা ২০ আগষ্টৰ দিনা গাঁওখনৰ গাঁও প্ৰধানৰ নেতৃত্বত দুয়ো গৰাকী বৃদ্ধাক চৰম নিৰ্যাতন চলোৱাৰ অভিযোগ উত্থাপন হয় । নিৰ্যাতন এনে পৰ্যায় পায়গৈ যে বৃদ্ধা দুগৰাকীক মানুহৰ বিষ্ঠা খাবলৈয়ো বাধ্য কৰায় । ইফালে এই সমগ্ৰ ঘটনাৰ লগত জড়িত অভিযুক্তই এনে নিৰ্যাতন কথা যাতে কোনেও গম নাপায় তাৰ বাবে বৃদ্ধাক দুগৰাকী কঠোৰ সকিয়নি প্ৰদান কৰে ।

পিছত মিছন বিৰুবলাই এই ঘটনাৰ তথ্য লাভ কৰে । মিছম বিৰুবালাই এই ঘটনাৰ বিষয়ে জানিব পাৰি ৩০ আগষ্টৰ দিনা লক্ষীপুৰ আৰক্ষী থানাত এখন এজাহাৰ দাখিল কৰে । সেই এজাহৰ ভিত্তিত লক্ষীপুৰ থানাৰ আৰক্ষীয়ে তাৎক্ষণিক ব্যৱস্থা গ্ৰহণ কৰে । সেই অনুসৰি,আৰক্ষীয়ে শনিবাৰে এই ঘটনাৰ সৈতে জড়িত মহিলাসহ ১৩ জন লোকক গ্ৰেপ্তাৰ কৰি আদালতত হাজিৰ কৰে আৰু আদালতে তেওঁলোকক জেল হাজোতলৈ প্ৰেৰণ কৰে।