ম্যানমাৰ পৰা পৰিচালিত সংগঠনটোৰ আছে ২০০ৰো অধিক কেডাৰ ! পুনৰ ৫ বছৰৰ বাবে আলফাক বেআইনী ঘোষণা…

আলফা(স্বা)ৰ ওপৰত নিষেধাজ্ঞা আৰু পাঁচ বছৰৰ বাবে বৃদ্ধি কৰিছে চৰকাৰে । ৩৫ বছৰ ধৰি নিষিদ্ধ হৈ থকাৰ পিছতো বৰ্তমান ম্যানমাৰ শিবিৰৰ পৰা পৰিচালিত এই গোটটোৰ ২০০–২৫০ জন কেডাৰ আছে আৰু তেওঁলোকৰ হাতত প্ৰায় ২০০ অস্ত্ৰ-শস্ত্ৰ আছে বুলি ন্যায়াধিকৰণৰ সন্মুখত তথ্য দাখিল কৰিছে চৰকাৰে ।

আলফা(স্বা)ৰ কাৰ্যকলাপৰ বিষয়ে নথিপত্ৰ প্ৰমাণ দাখিল কৰাৰ পিছত গুৱাহাটী উচ্চ ন্যায়ালয়ৰ ন্যায়াধীশ মাইকেল জোথানখুমাৰ সভাপতিত্বত গঠিত ন্যায়াধীকৰণে ২১ মে’ত নিশ্চিত কৰে যে, ২০২৪ চনৰ ২৭ নৱেম্বৰৰ পৰা কাৰ্যকৰী হোৱাকৈ আলফা(স্বা)ৰ সকলো উপদল, শাখা আৰু ফ্ৰণ্টক “বেআইনী সংগঠন” হিচাপে ঘোষণা কৰা যথেষ্ট কাৰণ আছে । উল্লেখ্য যে, আলফাক “বেআইনী সংগঠন” হিচাপে ঘোষণা কৰাৰ পৰ্যাপ্ত কাৰণ আছে নে নাই সেইটো বিচাৰৰ বাবে এই ন্যায়াধিকৰণ গঠন কৰা হৈছিল।

শুনানিৰ সময়ত চৰকাৰী প্ৰতিনিধিয়ে ন্যায়াধিকৰণৰ সন্মুখত উল্লেখ কৰে যে, পৰেশ বৰুৱাৰ নেতৃত্বত আলফা(স্বাধীন)য়ে “সাৰ্বভৌম” অসমৰ দাবী কৰাৰ লগতে “সশস্ত্ৰ সংগ্ৰামৰ জৰিয়তে এই লক্ষ্যত উপনীত হোৱাৰ লক্ষ্য ৰাখিছে”।

গৃহ পৰিক্ৰমা মন্ত্ৰালয়ে জাৰি কৰা এক অধিসূচনা অনুসৰি, “ন্যায়াধিকৰণক কোৱা হৈছে যে, বৰ্তমান আলফাৰ বেছিভাগ কেডাৰ বা নেতাই ম্যানমাৰত নিয়োজিত হৈ আছে আৰু তাত চাৰিটা ডাঙৰ শিবিৰ চলাই আছে। আলফাই (স্বাধীন)য়ে আন ভাৰতীয় বিদ্ৰোহী গোটৰ সৈতেও কাৰ্যকৰী আৰু লজিষ্টিক উদ্দেশ্যৰ বাবে যোগাযোগ বজাই ৰাখে।”

ন্যায়াধিকৰণৰ সন্মুখত চৰকাৰৰ অধিবক্তাই কয় যে, “আলফা(স্বাধীন)ৰ ২০০-২৫০ কেডাৰ শক্তি আছে আৰু তেওঁলোকৰ হাতত বৰ্তমান প্ৰায় ২০০ অস্ত্ৰ-শস্ত্ৰ থকাৰ সম্ভাৱনা আছে। এই সংগঠনটোৱে নিৰাপত্তা বাহিনীক আক্ৰমণ, বিস্ফোৰণ আদিকে ধৰি হিংসাত্মক কাৰ্যত লিপ্ত হয়। ইয়াৰ উপৰিও অসমত স্বাধীনতা দিৱস উদযাপন বৰ্জন কৰি এই দিনকেইটাত বিস্ফোৰণৰ মাধ্যমৰে বিশৃংখলতা সৃষ্টিৰ কৰা চেষ্টা অব্যাহত ৰাখিছে।”

অসম চৰকাৰে এই কথা প্ৰকাশ কৰিছে যে, বিগত পাঁচ বছৰত আলফাৰ ৫৬ জন কেডাৰৰ লগতে ১৭৭ জন ফ্ৰন্টমেন, অভাৰ গ্ৰাউণ্ড ৱৰ্কাৰ (OGW),সমৰ্থকক গ্ৰেপ্তাৰ কৰা হৈছে । আনহাতে ৬৩ জন কেডাৰে কৰ্তৃপক্ষভাৱে আত্মসমৰ্পণ কৰিছে। এই সময়ছোৱাত ২৬টা (MQ 81-04, AK series-02, Pistol- 21) অস্ত্ৰ-শস্ত্ৰ, ৫১৫ ৰাউণ্ড গোলাবাৰুদ, ৯ টা গ্ৰেনেড আৰু দুটা আই ই ডি উদ্ধাৰ হোৱা বুলিও খবৰ পোৱা গৈছে।

কেন্দ্ৰৰ হৈ হাজিৰ হোৱা অধিবক্তাসকলে লগতে উল্লেখ কৰে যে, অসম চৰকাৰে কেন্দ্ৰীয় চৰকাৰৰ ওচৰত যুক্তি দাখিল কৰাৰ সময়ত আলফাক অবৈধ সংগঠন হিচাপে ঘোষণা কৰাৰ বাবে তেওঁলোকৰ কাৰ্যকলাপৰ সবিশেষ দিছিল, য’ত পঞ্জীয়নভুক্ত গোচৰ, অভিযোগনামা, আলফাৰ কেডাৰক গ্ৰেপ্তাৰ, আলফাৰ লিংকমেন বা ফ্ৰন্টমেনক গ্ৰেপ্তাৰ কৰা আদি অন্তৰ্ভুক্ত কৰা হৈছে।

কেন্দ্ৰীয় চৰকাৰে উল্লেখ কৰে যে আলফা(স্বাধীন)ৰ বিৰুদ্ধে পঞ্জীয়ন হোৱা ১৫টা গোচৰৰ বিৱৰণো ইয়াৰ বিবেচনাৰ বাবে অনা হৈছে, য’ত তিনিখন অভিযোগনামা দাখিল কৰা হৈছে। অভিযোগনামাসমূহ পঢ়াৰ পিছত দেখা গ’ল যে, আলফাই ধন দাবী, হত্যাৰ চেষ্টা, অকৰ্তৃত্বশীল অস্ত্ৰ ৰখা, ৰাষ্ট্ৰৰ বিৰুদ্ধে ষড়যন্ত্ৰ আৰু অন্যান্য অবৈধ কাম-কাজত লিপ্ত হৈ আহিছে বুলি অধিসূচনাখনত উল্লেখ কৰা হৈছে। উল্লেখ্য যে, ১৯৯০ চনত প্ৰথমবাৰৰ বাবে আলফাক নিষিদ্ধ সংগঠন হিচাপে ঘোষণা কৰা হৈছিল আৰু তেতিয়াৰ পৰাই সময়ে সময়ে এই নিষেধাজ্ঞা বৃদ্ধি কৰা হৈছে।