ৰেজাউলৰ বক্তব্যই বিপদত পেলাব পাৰে কংগ্ৰেছক! গৌৰৱ গগৈলৈ চিঠি দেৱব্ৰত শইকীয়াৰ

কংগ্ৰেছত ভৰি থৈয়েই ৰেজাউলে যি উদ্ভট মন্তব্য কৰিলে, তাৰ পৰা এতিয়াও উপশম পোৱা নাই দলটোৱে। ৰাজ্যৰ বিভিন্ন প্ৰান্তত ৰেজাউল কৰিম সৰকাৰৰ প্ৰতিকৃতি দাহ কৰিছে বিভিন্ন সংগঠনে। যোৱা দেওবাৰে কংগ্ৰেছত যোগদান কৰিছিল সদৌ অসম সংখ্যালঘু ছাত্ৰ সন্থাৰ প্ৰাক্তন সভাপতিগৰাকীয়ে। কংগ্ৰেছত যোগ দিয়েই ৰেজাউলে কৰা এক মন্তব্যক লৈ তীব্ৰ বিতৰ্কৰ সৃষ্টি হৈছে।

কংগ্ৰেছৰ যোগদান সভাত সভাপতি গৌৰৱ গগৈ আৰু আন জ্যেষ্ঠ নেতাৰ উপস্থিতিত ৰেজাউল কৰিম সৰকাৰে মন্তব্য কৰিছিল যে অসমৰ তিনিচুকীয়া, শিৱসাগৰক ধুবুৰীত পৰিণত কৰিব আৰু ধুবুৰীক শিৱসাগৰ, তিনিচুকীয়াত পৰিণত কৰিব। এই মন্তব্য ভাইৰেল হৈ পৰাৰ পাছতেই ন-কংগ্ৰেছী ৰেজাউলক সমালোচনাৰে থকা-সৰকা কৰে একাংশ বিজেপি নেতাৰ লগতে স্থানীয় দল-সংগঠনৰ সদস্য আৰু সাধাৰণ ব্যক্তিয়ে।

মুখ্যমন্ত্ৰী হিমন্ত বিশ্ব শৰ্মাই এই সন্দৰ্ভত প্ৰতিক্ৰিয়া ব্যক্ত কৰি কয় যে যাৰ পূৰ্বপুৰুষ বাংলাদেশৰ পৰা অনুপ্ৰৱেশ কৰি অহা, তেনে লোকৰ এনে মন্তব্য কৰাৰ অধিকাৰ নাই। কংগ্ৰেছৰ একাংশ নেতায়ো অৱশ্যে সমালোচনা কৰে ৰেজাউল কৰিমক। অসম বিধানসভাৰ বিৰোধী দলপতি দেৱব্ৰত শইকীয়াই আমছুৰ প্ৰাক্তন সভাপতি তথা নতুনকৈ সংসদীয় ৰাজনীতিত খোজ দিয়া কংগ্ৰেছ সদস্য ৰেজাউল কৰিম সৰকাৰৰ শেহতীয়া বক্তব্যক দলটোৰ বাবে “অনুপযুক্ত আৰু ক্ষতিকাৰক” বুলি অভিহিত কৰি আগন্তুক নিৰ্বাচনৰ পূৰ্বে উদ্বেগ প্ৰকাশ কৰিছে।

অসম প্ৰদেশ কংগ্ৰেছ কমিটীৰ সভাপতি গৌৰৱ গগৈলৈ লিখা এখন পত্ৰত শইকীয়াই প্ৰকাশ কৰিছে যে “শিৱসাগৰক ধুবুৰীলৈ, ধুবুৰীক শিৱসাগৰলৈ, বৰাকক শিৱসাগৰলৈ, তিনিচুকীয়াক ধুবুৰীলৈ পৰিণত কৰা” সন্দৰ্ভত সৰকাৰে কৰা মন্তব্যই সমগ্ৰ ৰাজ্যতে অপ্ৰয়োজনীয় বিতৰ্কৰ সৃষ্টি কৰিছে। সংবাদ মাধ্যম আৰু ছ’চিয়েল মিডিয়া প্লেটফৰ্মে এনে বক্তব্য ব্যৱহাৰ কৰি দলটোক নেতিবাচকভাৱে চিত্ৰিত কৰিব পাৰে বুলি তেওঁ সকীয়াই দিয়ে।

শইকীয়াই অসমৰ অঞ্চলসমূহৰ ঐতিহাসিক আৰু সাংস্কৃতিক তাৎপৰ্যৰ ওপৰত গুৰুত্ব আৰোপ কৰি শিৱসাগৰ, তিনিচুকীয়া, বৰাক, আৰু ধুবুৰীৰ প্ৰত্যেকৰে নিজস্ব স্বকীয় পৰিচয় আৰু ঐতিহ্য আছে বুলি আঙুলিয়াই দিয়ে। তেওঁ উল্লেখ কৰে যে এই ধৰণৰ বক্তব্যই দলৰ সম্ভাৱনাত বিৰূপ প্ৰভাৱ পেলাব পাৰে, বিশেষকৈ উজনি অসমৰ জটিল অঞ্চলত। কিয়নো নিৰ্বাচনলৈ মাজত মাত্ৰ দুমাহ বাকী আছে।

অসম আন্দোলনৰ সময়ত কংগ্ৰেছৰ সমৰ্থনত তেওঁৰ পৰিয়ালে কৰা ত্যাগৰ ওপৰতো আলোকপাত কৰি নেতাগৰাকীয়ে দলৰ মূল্যবোধ আৰু মতাদৰ্শ ৰক্ষাৰ গুৰুত্বৰ ওপৰত আলোকপাত কৰে। তেওঁ আহ্বান জনায় যে দলটোৱে বিতৰ্কিত পটভূমিৰ যিকোনো নতুন সদস্যক নিযুক্তি দিয়াৰ পূৰ্বে নেতৃত্বৰ পৰামৰ্শ লওক, যাতে দলৰ ভাবমূৰ্তি ক্ষতিগ্ৰস্ত কৰিব পৰা পৰিহাৰযোগ্য পৰিস্থিতি ৰোধ কৰিব পৰা যায়।