আই ই ডি বিস্ফোৰণৰ ষড়যন্ত্ৰৰ গোচৰত পৰেশ বৰুৱাসহ তিনিজনৰ বিৰুদ্ধে এন আই এৰ অভিযোগনামা

যোৱা বছৰ স্বাধীনতা দিৱসৰ দিনা অসমৰ একাধিক স্থানত আই ই ডি সংস্থাপন কৰিছিল নিষিদ্ধ ঘোষিত বিদ্ৰোহী সংগঠন আলফা স্বাধীনে। কিন্তু কাৰিকৰী কাৰণত এই আইইডি বিস্ফোৰণ নহ’ল আৰু ভয়ংকৰ বিপদৰ পৰা অসম ৰক্ষা পৰে। সেই দিনা স্বাধীনতা দিৱসৰ কাৰ্যসূচী চলি থকাৰ মাজতে আলফা স্বাধীনৰ তৰফৰ পৰা ই-মেইলযোগে জনোৱা হয় যে অসমৰ বিভিন্ন স্থানত বোমা সংস্থাপিত কৰা হৈছে, কিন্তু জনজীৱনৰ প্ৰতি লক্ষ্য ৰাখি এই বোমা বিস্ফোৰণ কৰা নহ’ল। আৰক্ষীক বোমাসমূহ নিস্ক্ৰিয় কৰাৰ বাবে স্থানসমূহ উল্লেখ কৰি দিছিল আলফা স্বাধীনে ।

এই বিস্ফোৰণৰ ষড়যন্ত্ৰৰ সৈতে জড়িত সংযুক্ত মুক্তি বাহিনী অসম (স্বাঃ) ৰ মুৰব্বী পৰেশ বৰুৱাকে ধৰি তিনিজন ব্যক্তিৰ বিৰুদ্ধে আনুষ্ঠানিকভাৱে অভিযোগনামা দাখিল কৰিছে ৰাষ্ট্ৰীয় অনুসন্ধান সংস্থাই। শনিবাৰে বিষয়াসকলে ঘোষণা কৰে যে পৰেশ অসম আৰু জামান ভাইকে ধৰি কেইবাটাও ছদ্মনামেৰেও পৰিচিত বৰুৱাই সহযোগীসকলৰ সৈতে মিলি স্বাধীনতা দিৱস উদযাপনত ব্যাঘাত জন্মাবলৈ এই আক্ৰমণ সংঘটিত কৰাৰ পৰিকল্পনা কৰিছিল।

নিষিদ্ধ ঘোষিত আলফা(স্বাঃ)ৰ মুখ্য সেনাধ্যক্ষ পদত অধিষ্ঠিত পৰেশ বৰুৱাক তেওঁৰ সহযোগী অভিজিৎ গগৈ আৰু জাহ্নু বৰুৱাৰ সমান্তৰালকৈ তদন্তৰ লক্ষ্য কৰি লৈছিল। ভাৰতীয় ন্যায় সংহিতা, অবৈধ কাৰ্যকলাপ (প্ৰতিৰোধ) আইন, বিস্ফোৰক পদাৰ্থ আইন আদিৰ বিভিন্ন ধাৰাত শুকুৰবাৰে গুৱাহাটীৰ আদালতত দাখিল কৰা অভিযোগনামাত এন আই এই অভিযুক্ত কৰিছে।

গুৱাহাটীৰ দিছপুৰ লাষ্ট গেটত স্থাপন কৰা ইম্প্ৰভাইজড এক্সপ্ল’ছিভ ডিভাইচ (আই ই ডি)ৰ সৈতে জড়িত ব্যক্তিকেইজনৰ সম্পৰ্ক থকা বুলি জানিব পৰা গৈছে। সংস্থাটোৱে প্ৰকাশ কৰা অনুসৰি ৰাষ্ট্ৰীয় উদযাপনৰ সময়ত বিশৃংখলতাৰ সৃষ্টি কৰিবলৈ সমগ্ৰ ৰাজ্যজুৰি একাধিক বিস্ফোৰণৰ পৰিকল্পনা কৰিছিল আলফা(স্বাঃ) ই।

২০২৪ চনৰ ছেপ্টেম্বৰ মাহত এন আই এয়ে তদন্তৰ দায়িত্ব গ্ৰহণ কৰি ধৰা পেলায় যে এই বোমা সংস্থাপনৰ উদ্দেশ্য আছিল মৃত্যু, আঘাত কৰা, সম্পত্তিৰ ক্ষতি কৰা, ভাৰতৰ ঐক্য আৰু অখণ্ডতাৰ প্ৰতি ভাবুকি কঢ়িয়াই অনা। সংস্থাটোৰ বিবৃতিত কোৱা হৈছে যে এই ষড়যন্ত্ৰৰ লক্ষ্য আছিল জনসাধাৰণৰ মাজত আতংকৰ সৃষ্টি কৰা।

এই অভিযোগনামাত উগ্ৰপন্থীৰ কাৰ্যকলাপৰ সৈতে জড়িতসকলক জবাবদিহি কৰি অঞ্চলটোক সুৰক্ষিত কৰি শান্তি বজাই ৰখাৰ বাবে অব্যাহত থকা প্ৰচেষ্টাৰ ওপৰত গুৰুত্ব আৰোপ কৰা হৈছে। ইয়াত এনে ভাবুকি প্ৰতিৰোধ আৰু নাগৰিকৰ সুৰক্ষা নিশ্চিত কৰাৰ বাবে সংস্থাটোৰ প্ৰতিশ্ৰুতিৰ ওপৰত আলোকপাত কৰা হৈছে, উগ্ৰবাদক ফলপ্ৰসূভাৱে প্ৰতিহত কৰাৰ সংকল্পক শক্তিশালী কৰা হৈছে।