নগাঁও কেন্দ্ৰীয় কাৰাগাৰত চলিছিল ড্ৰাগছৰ বেহা ! অৱশেষত নিলম্বিত অধীক্ষক মুকুল ভূঞাক আটক…

অৱশেষত নগাঁও কেন্দ্ৰীয় কাৰাগাৰৰ নিলম্বিত অধীক্ষক মুকুল ভূঞাক আটক। নিশা চৰকাৰী বাস ভৱনৰ পৰা নগাঁও সদৰ আৰক্ষীয়ে আটক কৰে কাৰাগাৰৰ অধীক্ষকগৰাকীক। উল্লেখ্য যে, এইগৰাকী অধীক্ষকৰ ছত্ৰচায়াতে কাৰাগাৰখনত চলিছিল ড্ৰাগছৰ বেহাৰ দৰে অবৈধ কৰ্মকাণ্ড। নগাঁও জিলা আয়ুক্তগৰাকীয়ে শুক্ৰবাৰে কাৰাগাৰখন পৰিদৰ্শন কৰাৰ পাছতে পোহৰলৈ আহিছিল এই চাঞ্চল্যকৰ তথ্য। একে সময়তে গোচৰ ৰুজু কৰি এই ঘটনাৰ সন্দৰ্ভত তদন্ত কৰাৰ কথা সদৰী কৰিছিল নগাঁও আৰক্ষী অধীক্ষকে।

দেওবাৰে আটক কৰা এইগৰাকী নগাঁও কেন্দ্ৰীয় কাৰাগাৰৰ অধীক্ষক মুকুল ভূঞাক শনিবাৰে নিলম্বন কৰা হৈছিল। তাৎক্ষণিকভাৱে কাৰ্যকৰী হোৱাকৈ নিলম্বিত কৰা হয় এইগৰাকী বিষয়াক। এইগৰাকী বিষয়াৰ ছত্ৰছায়াতেই জেলৰ ভিতৰত অবৈধ বেহা চলাৰ গুৰুত্বৰ অভিযোগ উত্থাপন হৈছিল।

২৯ আগষ্ট, শুকুৰবাৰে জিলা আয়ুক্ত দেৱাশীষ শৰ্মাই আকস্মিকভাৱে পৰিদৰ্শন কৰিছিল নগাঁও কেন্দ্ৰীয় কাৰাগাৰ। নগাঁও জিলাৰ আয়ুক্তৰ পৰিদৰ্শন কালত ফাদিল হৈছিল ভয়ংকৰ তথ্য। এই পৰিদৰ্শন কালতে স্পষ্ট হয় কাৰাগাৰখনত কিদৰে সৰবাহৰ হয় ড্ৰাগছৰ দৰে নিচাযুক্ত সামগ্ৰী। প্ৰথমে অসম সেৱা (Discipline & Appeal) Rules, 1964 ৰ Rule 6 (1)(a) অনুসৰি, আৰু জনসেৱাত অনুশাসন বজাই ৰখাৰ স্বাৰ্থত মুকুল ভূঞাক পৰৱৰ্তী নিৰ্দেশ নোহোৱালৈকে নিলম্বন কৰা হয়। ইয়াৰ পিছতে তেওঁ আজি আটক কৰা হৈছে।

উল্লেখ্য যে, পতংগীয়া আৰু হাজৰিকা উপাধিৰ দুই নিৰাপত্তাৰক্ষীয়ে কাৰাগাৰৰ ভিতৰত নিষিদ্ধ ড্ৰাগছ যোগান ধৰাৰ অভিযোগ উত্থাপন হৈছিল। কোৱা হৈছে যে, চেলিম নামৰ এজন কয়দীয়ে কাৰাগাৰৰ ভিতৰত চলাই আহিছে ড্ৰাগছৰ বেহা। একে সময়তে নগাঁও কেন্দ্ৰীয় কাৰাগাৰত কয়দীয়ে বিলাসী জীৱন উপভোগ কৰাৰো অভিযোগ উত্থাপন হৈছিল। ইয়াৰ লগতে কাৰাগাৰখনত ভাং, শীতল পানীয়ৰ পৰা আৰম্ভ কৰি সকলো সমগ্ৰী উপলব্ধ হোৱাৰো অভিযোগ উত্থাপন হৈছে।