Morning Headlines: পলকতে পঢ়ক পুৱাৰ বহুকেইটামান গুৰুত্বপূৰ্ণ খবৰ…

আজি ৩০ আগষ্ট, প্ৰিয় পাঠক আমাৰ সৈতে সংযুক্ত হোৱাৰ বাবে আপোনাৰ প্ৰতি কৃতজ্ঞতা জনালোঁ। ব্যস্তময় জীৱনত চৌপাশৰ সকলো ঘটনা প্ৰবাহৰ খবৰ ৰখাটো সম্ভৱ নহয়। সেই বুলি আপুনি জানো খবৰৰ পৃথিৱীত এভুমুকি নমৰাকৈ থাকিব পাৰিব। সেই বাবেই শনিবাৰৰ দিনটোৰ আৰম্ভণিতে আমি আপোনাৰ বাবে লৈ আহিছোঁ এই শিতানটো। ব্যস্ততাপূৰ্ণ জীৱনৰ পৰা মাত্ৰ দুই মিনিট সময় উলিয়াই জানি লওক আপোনাৰ বাবে প্ৰয়োজনীয় কেইটামান খবৰ।

1. মণিপুৰৰ সেনাপতি জিলাৰ পৰা flower festival ৰ বাতৰি কভাৰ কৰি ঘূৰি আহোতেই গুলীচালনা কৰে সাংবাদিকজনৰ ওপৰত। কোনো অচিনাক্ত দুৰ্বৃত্তই সংঘটিত কৰে এই ঘটনা। কিছুদিনৰ পূৰ্বে সাংবাদিক দ্বীপ শইকীয়াক নাগালেণ্ডৰ উপ মূখ্যমন্ত্ৰী Y PETONয়ে মুকলিকৈ ভাবুকি প্ৰদান কৰিছিল।
2. নগাঁও কেন্দ্ৰীয় কাৰাগাৰৰ অধীক্ষক মুকুল ভূঞাক নিলম্বন। ২৯ আগষ্ট, শুকুৰবাৰে জিলা আয়ুক্ত দেৱাশীষ শৰ্মাই আকস্মিকভাৱে পৰিদৰ্শন কৰিছিল নগাঁও কেন্দ্ৰীয় কাৰাগাৰ। নগাঁও জিলাৰ আয়ুক্তৰ পৰিদৰ্শন কালত ফাদিল হৈছিল ভয়ংকৰ তথ্য। এই পৰিদৰ্শন কালতে স্পষ্ট হয় কাৰাগাৰখনত কিদৰে সৰবাহৰ হয় ড্ৰাগছৰ দৰে নিচাযুক্ত সামগ্ৰী।
3. “বিজেপি দলটো এটা কথা পাহৰা দল। বিজেপি দলটো হৈছে ভুলকো শুদ্ধ বুলি দাবী কৰা এটা মিথ্যাচাৰী দল।” জ্যেষ্ঠ কংগ্ৰেছ নেতা ৰিপুন বৰাৰ কটাক্ষ এয়া। অসমলৈ আহি কেন্দ্ৰীয় গৃহমন্ত্ৰী অমিত শ্বাহে কৰা কেতবোৰ মন্তব্য সন্দৰ্ভত প্ৰতিক্ৰিয়া ব্যক্ত কৰি বিজেপি দলক এইদৰে ওভতি ধৰিছে প্ৰদেশ কংগ্ৰেছৰ জ্যেষ্ঠ নেতা তথা ৰাজ্যসভাৰ প্ৰাক্তন সাংসদ ৰিপুন বৰাই।
4. কেন্দ্ৰীয় গৃহমন্ত্ৰী অমিত শ্বাহৰ বিমানত মুম্বাইত কাৰিকৰী দোষৰ সৃষ্টি হয়। দুদিনীয়া মুম্বাই ভ্ৰমণৰ অন্তত গুজৰাটলৈ উভতি অহাৰ সময়ত এই ঘটনা সংঘটিত হয়। মহাৰাষ্ট্ৰৰ উপ-মুখ্যমন্ত্ৰী একনাথ শিণ্ডে ততাতৈয়াকৈ সহায় আগবঢ়াই নিজৰ বিমানখন যোগান ধৰে। শ্বাহ আৰু তেওঁৰ পৰিয়াল শিন্দেৰ বিমানত গুজৰাট অভিমুখে ৰাওনা হয়।
5. খানাপাৰাৰ পশুচিকিৎসা বিজ্ঞান মহাবিদ্যালয় খেলপথাৰত শনিবাৰে আয়োজিত এক বিশেষ অনুষ্ঠানত উপস্থিত থাকে মুখ্যমন্ত্রী ড° হিমন্ত বিশ্ব শৰ্মা। এই অনুষ্ঠানত ‘সখী এক্সপ্ৰেছ’ আঁচনিৰ অধীনত ৰাজ্যিক জীৱিকা অভিযানৰ ৯,৭০৪ গৰাকী ‘কমিউনিটি কেডাৰলৈ স্কুটাৰ প্ৰদান আৰু আজীৱিকা গ্রামীণ এক্সপ্ৰেছ যোজনাৰ অধীনত ‘ক্লাষ্টাৰ লেভেল ফেডাৰেশ্যন লৈ ৫১ খন ব্যৱসায়িক বাহন প্রদান কাৰ্যসূচীৰ আনুষ্ঠানিক শুভাৰম্ভ কৰে।
6. লাংছাংপি হান্সে গাঁৱৰ বাসিন্দাসকলে তেওঁলোকৰ ৰোগীসকলক কাপোৰ আৰু বাঁহৰ সহায়ত কান্ধত ভাৰ বান্ধি নিবলগীয়া হয় চিকিৎসালয়লৈ। তদুপৰি গাঁওখনৰ পৰা চিকিৎসালয়খন ১৫ কিলোমিটাৰতকৈও অধিক দূৰত অৱস্থিত।
7. অসম চৰকাৰৰ প্ৰচেষ্টাত মহাপুৰুষ শ্ৰীমন্ত শংকৰদেৱে প্ৰস্তুত কৰা বৃন্দাৱনী বস্ত্ৰ চাব পাৰিব অসমৰ ৰাইজে। ১৮ মাহৰ বাবে অসমত থাকিব মহাপুৰুষজনৰ অভিনৱ সৃষ্টি বৃন্দাৱনী বস্ত্ৰ । শনিবাৰে মুখ্যমন্ত্ৰীযে অসমবাসীক দিলে এই ভাল খবৰ।
8. বৈধ মাৰণাস্ত্ৰও লগত লৈ ফুৰিব নোৱাৰিব কোকৰাঝাৰত। ভাৰতীয় নাগৰিক সুৰক্ষা সংহিতা ১৯৭৩ ৰ ধাৰা ১৬৩ অনুসৰি আগষ্ট মাহৰ ২৮ তাৰিখে এই নিৰ্দেশনা জাৰী কৰা হৈছিল। ইয়াৰ দ্বাৰা কোকৰাঝাৰত অনুজ্ঞাপত্ৰ থকা মাৰণাস্ত্ৰও লগত কঢ়িয়াব নোৱাৰিব কোনো লোকে।
9. কেন্দ্ৰীয় গৃহমন্ত্ৰী অমিত শ্বাহৰ শেহতীয়া অসম ভ্ৰমণক ব্যৰ্থ, নিৰস আৰু হতাশাজনক আখ্যা দিছে অসম জাতীয় পৰিষদে। ডিব্ৰুগড়ত এক সংবাদমেল সম্বোধন কৰি অজাপৰ সভাপতি লুৰীণজ্যোতি গগৈয়ে কয় যে কেন্দ্ৰীয় গৃহমন্ত্ৰীগৰাকীয়ে সংগতিবিহীন, অবাস্তৱ আৰু মিথ্যাচাৰেৰে পৰিপূৰ্ণ, লগতে হাস্যকৰ কথা কৈ অসম এৰি গৈছে।