যমুনামুখত প্ৰশানৰ উচ্ছেদ অভিযানত বাধা প্ৰদান AIUDF নেতাৰ, ৬০০০ বিঘা ভূমি বেদখলমুক্ত কৰাৰ লক্ষ্য

নগাঁও জিলাৰ যমুনামুখ মৌদাংগা সংৰক্ষিত বনাঞ্চলত ২ জানুৱাৰীত ডবকা প্ৰশাসনে আৰম্ভ কৰা বৃহৎ উচ্ছেদ অভিযানে ৰাজনৈতিক প্ৰতিৰোধৰ সৃষ্টি কৰিছে। সৰ্বভাৰতীয় সংযুক্ত গণতান্ত্ৰিক মৰ্চা চমুকৈ AIUDF নেতা বিলাল উদ্দিনে এই অভিযানত বাধাৰ সৃষ্টি কৰাৰ চেষ্টা চলায়।

এই উচ্ছেদ অভিযানৰ দ্বাৰা বছৰ বছৰ ধৰি অবৈধভাৱে দখল কৰি অহা প্ৰায় ৬ হাজাৰ বিঘা সংৰক্ষিত বনাঞ্চলৰ ভূমি পুনৰ উদ্ধাৰৰ বাবে চেষ্টা কৰা হৈছে। প্ৰশাসনৰ মতে, বনভূমি সুৰক্ষা আৰু চৰকাৰী নিয়ম বলবৎ কৰাৰ বহল প্ৰচেষ্টাৰ অংশ হিচাপে চলোৱা এই অভিযানৰ ফলত প্ৰায় ১২৫০ পৰিয়াল ক্ষতিগ্ৰস্ত হৈছে।

বেদখলকৃত অঞ্চলসমূহ মুক্ত কৰিবলৈ আৰক্ষী আৰু জিলা বিষয়াসকলে অনুমতি লাভ কৰাৰ লগে লগে সেই স্থানত উত্তেজনা বৃদ্ধি পায়। AIUDF ৰ নেতা আৰু স্থানীয় বাসিন্দাসকলে প্ৰতিবাদ আৰু আপত্তি উত্থাপন কৰে। অভিযানৰ সময়ত আইন-শৃংখলা অটুট ৰখাৰ বাবে অঞ্চলটোত ব্যাপকভাৱে আৰক্ষী মোতায়েন কৰা হৈছে।

প্ৰশাসনিক বিষয়াসকলে কয় যে পৰিস্থিতিৰ ওপৰত তীক্ষ্ণ দৃষ্টি ৰখা হৈছে, আৰু কোনো ধৰণৰ অভাৱনীয় কাণ্ড ৰোধ কৰাৰ বাবে প্ৰয়োজনীয় ব্যৱস্থা গ্ৰহণ কৰা হৈছে। তেওঁলোকে পুনৰ কয় যে সংৰক্ষিত বনাঞ্চলৰ ভূমি সুৰক্ষিত কৰাৰ লক্ষ্যৰে উচ্ছেদ অভিযান চলোৱা হৈছে আৰু আইনী বিধান অনুসৰি চলি আছে।

উল্লেখ্য যে ৰাজ্য়ৰ ভিন্ন স্থানত চৰকাৰী ভূমি, বনাঞ্চল, সত্ৰভূমি বেদখলমুক্ত কৰাৰ বাবে অভিযান চলাই আহিছে অসম চৰকাৰে। বিৰোধী দলসমূহে এই উচ্ছেদক অমানৱীয় আখ্যা দিয়াৰ লগতে বিভিন্ন পক্ষই ন্য়ায়ালয়ৰো দ্বাৰস্থ হৈছে। কিন্তু তাৰ পাছতো চৰকাৰে বেদখলৰ বিৰুদ্ধে অভিযান অব্যাহত ৰাখিছে। অসমৰ বিভিন্ন স্থানত বনাঞ্চল আৰু ৰাজহুৱা ভূমিৰ পৰা আঁতৰাই পঠিওৱা হৈছে অবৈধভাৱে বসবাস কৰি অহা পৰিয়ালসমূহক। ইফালে বেদখলৰ বিৰুদ্ধে অভিযান অব্যাহত থাকিব বুলি এক প্ৰকাৰ নিশ্চিত কৰি দিছে মুখ্যমন্ত্ৰীয়েও।