স্তব্ধ হৈ পৰিছে যোৰহাট-মাজুলী সংযোগী দলঙৰ নিৰ্মাণকাৰ্য! কেন্দ্ৰীয় পৰিবহণ মন্ত্ৰীলৈ পত্ৰ মুখ্যমন্ত্ৰীৰ

সাময়িকভাৱে স্থগিত হৈ আছে যোৰহাট-মাজুলী সংযোগী দলঙৰ নিৰ্মাণকাৰ্য। এই ক্ষেত্ৰত কেন্দ্ৰীয় পৰিবহণ মন্ত্ৰীৰ হস্তক্ষেপ বিচাৰিছে মুখ্যমন্ত্ৰী ড০ হিমন্ত বিশ্ব শৰ্মাই৷ সামাজিক মাধ্যমত অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ পোষ্ট৷ ৫ ছেপ্টেম্বৰৰ পৰা বন্ধ হৈ আছে দলংখনৰ নিৰ্মাণকাৰ্য৷ নীতিন গাডকাৰীলৈ পত্ৰ প্ৰেৰণ কৰি তাৎক্ষণিকভাৱে হস্তক্ষেপৰ অনুৰোধ মুখ্যমন্ত্ৰী৷ দুবাৰকৈ এই দলংখনৰ কাম শুভাৰম্ভ কৰাৰ পাছতো যেন ইয়াক লৈ সৃষ্টি হোৱা অনিশ্চয়তা বা জটিলতা দূৰ হোৱা নাই। মাজুলীবাসীৰ  দীৰ্ঘদিনীয়া সপোন আছিল যোৰহাট-মাজুলী সংযোগী দলং।

২০২৫ৰ ডিচেম্বৰৰ পূৰ্বে দলংখন সম্পূৰ্ণ কৰাৰ লক্ষ্য নিৰ্ধাৰণ কৰিছিল ৰাজ্য চৰকাৰে৷ দলংখন নিৰ্মাণৰ বাবে ধাৰ্য কৰা হৈছিল ৬৫০ কোটি টকা৷ ইউ পি ষ্টেট ব্ৰীজ কৰ্প’ৰেশ্যন লিমিটেডে লাভ কৰিছিল দলং নিৰ্মাণৰ ঠিকা৷ কিন্তু এই সংস্থাৰ পৰা উপ-ঠিকা লৈ দলংখনৰ নিৰ্মাণৰ কাম কৰি আছিল বি আৰ চি কোম্পানীয়ে। কিন্তু হঠাৎ নিৰ্মাণকাৰী প্ৰতিষ্ঠানটোৱে নিৰ্মাণস্থলী পৰিত্যাগ কৰাত সাময়িকভাৱে বন্ধ হৈ পৰিছে কাম৷

এই সন্দৰ্ভত সামাজিক মাধ্যমত শ্বেয়াৰ কৰা পোষ্টত মুখ্যমন্ত্ৰীয়ে লিখিছে,”আমি জানিব পাৰিছোঁ যে লুইতৰ ওপৰত যোৰহাট-মাজুলী দলঙৰ কাম ৫ ছেপ্টেম্বৰৰ পৰা স্থবিৰ হৈ আছে। বিষয়ৰ গুৰুত্বক অনুভৱ কৰি তথা ইতিমধ্যে নির্ধাৰণ কৰা সম্পূর্ণকৰণৰ সময়সীমা অর্থাৎ ডিচেম্বৰ ২০২৫ৰ লক্ষ্যৰ পৰা যাতে আমি বিচলিত হ’ব লগা নহয়, তাৰ বাবে আজি মাননীয় কেন্দ্ৰীয় মন্ত্ৰী শ্ৰীনীতিন গাডকাৰী ডাঙৰীয়ালৈ এখন পত্ৰ প্রেৰণ কৰিছোঁ। এইক্ষেত্রত তাৎক্ষণিক হস্তক্ষেপৰ বাবে অনুৰোধ জনাইছোঁ।”

We have noticed that work on the Jorhat-Majuli bridge over the Brahmaputra has come to a standstill since September 5. I have written to Hon’ble Union Minister Shri @nitin_gadkari Ji requesting his immediate intervention to ensure that we don’t miss the Dec 2025 completion date. pic.twitter.com/jka5UBLtxk

— Himanta Biswa Sarma (@himantabiswa) September 27, 2024

২০২৫ ডিচেম্বৰ মাহত নিৰ্মাণ সম্পূৰ্ণ কৰাৰ লক্ষ্য লোৱা এই দলংখন কাম ২০২১ ৰ পৰা এতিয়ালৈকে মাত্ৰ ৩০ শতাংশহে সম্পূৰ্ণ হৈছে। দলংখনৰ নিৰ্মাণৰ এনে লেহেমীয়া গতি আৰু বাৰে বাৰে কাম বন্ধ হৈ পৰাৰ আঁৰত দুয়োটা নিৰ্মাণ প্ৰতিষ্ঠানৰ মাজৰ আভ্যন্তৰীণ সংঘাত বুলি জানিব পৰা গৈছে। এই দুয়োটা প্ৰতিষ্ঠানৰ আভ্যন্তৰীণ সংঘাতৰ পৰিণাম হয়তো ভূগিবলগীয়া হ’ব মাজুলীবাসীয়ে। ইতিমধ্যে এই দলংখনৰ নিৰ্মাণস্থলীৰ পৰা নিৰ্মাণকাৰী বি আৰ চি কোম্পানীয়ে যন্ত্ৰাংশ লৈ গৈছে। এনে পৰিস্থিত মাজুলীবাসীৰ লগতে বিভিন্ন দল,সংগঠনো চিন্তিত হৈ পৰিছে।