Morning News: জনজাতিকৰণ প্ৰসঙ্গৰ পৰা ভাৰত-দক্ষিণ আফ্ৰিকা এদিনীয়ালৈ, পলকতে পঢ়ক পুৱাৰ মুখ্য খবৰসমূহ

প্ৰিয় পাঠক আমাৰ সৈতে সংযুক্ত হোৱাৰ বাবে আপোনাৰ প্ৰতি কৃতজ্ঞতা জনালোঁ। ব্যস্তময় জীৱনত চৌপাশৰ সকলো ঘটনা প্ৰবাহৰ খবৰ ৰখাটো সম্ভৱ নহয়। সেই বুলি আপুনি জানো খবৰৰ পৃথিৱীত এভুমুকি নমৰাকৈ থাকিব পাৰিব। সেই বাবেই দিনটোৰ আৰম্ভণিতে আমি আপোনাৰ বাবে লৈ আহিছোঁ এই শিতানটো। ব্যস্ততাপূৰ্ণ জীৱনৰ পৰা মাত্ৰ দুই মিনিট সময় উলিয়াই জানি লওক আপোনাৰ বাবে প্ৰয়োজনীয় কেইটামান খবৰ।

1. শনিবাৰে অন্ত পৰে অসম বিধানসভাৰ শীতকালীন অধিৱেশন। অন্তিম দিনা কালি ছয় জনগোষ্ঠীৰ জনজাতিকৰণ সন্দৰ্ভত মন্ত্ৰীগোটৰ প্ৰতিবেদন সদনৰ মজিয়াত দাখিল কৰা হয়। মন্ত্ৰীগোটৰ অধ্যক্ষ ৰণোজ পেগুৱে এই প্ৰতিবেদন দাখিল কৰে। এতিয়া কেন্দ্ৰীয় চৰকাৰলৈ এই প্ৰতিবেদন প্ৰেৰণ কৰা হ’ব।
2. বিধানভাৰ মজিয়াত ছয় জনগোষ্ঠীৰ জনজাতিকৰণ সন্দৰ্ভত মন্ত্ৰীগোটৰ প্ৰতিবেদন দাখিলৰ সময়তে জ্বলি উঠে বিটিচি। জনজাতিকৰণৰ বিৰোধিতাৰে বড়োলেণ্ড বিশ্ববিদ্যালয়ৰ ছাত্ৰ-ছাত্ৰীয়ে উলিওৱা প্ৰতিবাদী কাৰ্যসূচী হৈ পৰে হিংসাত্মক। একাংশ প্ৰতিবাদকাৰীয়ে বিটিচি সচিবালয়ত প্ৰৱেশ কৰি সচিবালয়ৰ সা-সম্পত্তি ভাঙি লণ্ডভণ্ড কৰে।
3. কালি গুৱাহাটী মহানগৰীৰ হেঙেৰাবাৰী অঞ্চলত সংঘটিত হয় এক ভয়ংকৰ অগ্নিকাণ্ড। এটা ভাড়াঘৰৰ পৰা সূত্ৰপাত হোৱা এই অগ্নিকাণ্ডত এগৰাকী ব্যক্তিয়ে শোকাৱহভাৱে প্ৰাণ হেৰুৱাইছে। লগতে ক্ষতিগ্ৰস্ত হৈছে লক্ষাধিক টকাৰ সা-সম্পত্তি।
4. কাছাৰৰ কাটিগড়ত বৃহৎ পৰিমাণৰ বিদেশী চিগাৰেট আৰু অবৈধ বাৰ্মিজ বেটেল বাদাম জব্দ কৰিছে আৰক্ষীয়ে। ত্ৰিপুৰাৰ পৰা মেঘালয় অভিমুখী এখন ট্ৰাকৰ পৰা এই সামগ্ৰীখিনি জব্দ কৰা হৈছে। এই অভিযানৰ সময়ত আৰক্ষীয়ে ট্ৰাকখনৰ চালকজনকো গ্ৰেপ্তাৰ কৰে।
5. শনিবাৰে সন্ধিয়া দিল্লীৰ তিগ্ৰী এক্সটেন্সন এলেকাত এক ভয়ংকৰ অগ্নিকাণ্ড সংঘটিত হয়। এটা চাৰি মহলীয়া অট্টালিকাত সংঘটিত এই অগ্নিকাণ্ডত তিনিজন লোকে থিতাতে প্ৰাণ হেৰুওৱাৰ বিপৰীতে দুগৰাকী আহত হৈছে।
6. ছত্তীশগড়ৰ ৰায়পুৰত শনিবাৰে সমগ্ৰ দেশৰ ৰাজ্যসমূহৰ আৰক্ষী সঞ্চালক প্ৰধান আৰু আৰক্ষী মহাপৰিদৰ্শকৰ বাৰ্ষিক সন্মিলনত অংশ লয় প্ৰধানমন্ত্ৰী নৰেন্দ্ৰ মোদীয়ে। আৰক্ষী বিষয়াসকলৰ সৈতে দেশৰ নিৰাপত্তা ব্যৱস্থাৰ বিভিন্ন দিশৰ ওপৰত আলোচনাত মিলিত হয় প্ৰধানমন্ত্ৰীগৰাকী।
7. আজি অনুষ্ঠিত হ’ব ভাৰত আৰু দক্ষিণ আফ্ৰিকাৰ মাজৰ এদিনীয়া শৃংখলাৰ প্ৰথমখন মেচ। দুপৰীয়া ১.৩০ বজাৰ পৰা ৰাঁচীৰ JSCA আন্তঃৰাষ্ট্ৰীয় ষ্টেডিয়ামত এই মেচখন আৰম্ভ হ’ব। টেষ্ট শৃংখলাত পৰাজয়ৰ পিছত এতিয়া এদিনীয়া শৃংখলাত ভাৰতৰ প্ৰদৰ্শন হ’ব লক্ষণীয়।
8. ভাৰতৰ ঘৰুৱা টি-২০ প্ৰতিযোগিতা ছৈয়দ মুস্তাক আলী ট্ৰফীত আজি নিজৰ তৃতীয়খন মেচত নামিব অসম। লক্ষ্ণৌৰ একানা ষ্টেডিয়ামত ৰে’লৱেৰ বিপক্ষে অসমে এই মেচখন খেলিব। ইতিপূৰ্বে প্ৰতিযোগিতাৰ দুখন মেচৰ এখনত জয়ী হোৱাৰ বিপৰীতে এখনত পৰাস্ত হৈছে অসম দল।