Morning News: বিধানসভা অধিৱেশনৰ পৰা পুটিনৰ ভাৰত ভ্ৰমণলৈ, পলকতে পঢ়ক পুৱাৰ কিছু গুৰুত্বপূৰ্ণ খবৰ
অসম বিধানসভাৰ চলিত শীতকালীন অধিৱেশনৰ সময়ত শুকুৰবাৰে সদনত গৃহীত হয় 'দ্য আছাম ফিক্সেশ্যন অৱ চিলিং অন লেণ্ড হ'ল্ডিংছ (এমেণ্ডমেন্ট) বিল, ২০২৫'। এই বিধেয়কৰ জৰিয়তে চাহ শ্ৰমিকৰ মাজত ভূমি পট্টা প্ৰদানৰ ব্যৱস্থা কৰা হৈছে।
পুৱাৰ মুখ্য খবৰ
প্ৰিয় পাঠক আমাৰ সৈতে সংযুক্ত হোৱাৰ বাবে আপোনাৰ প্ৰতি কৃতজ্ঞতা জনালোঁ। ব্যস্তময় জীৱনত চৌপাশৰ সকলো ঘটনা প্ৰবাহৰ খবৰ ৰখাটো সম্ভৱ নহয়। সেই বুলি আপুনি জানো খবৰৰ পৃথিৱীত এভুমুকি নমৰাকৈ থাকিব পাৰিব। সেই বাবেই দিনটোৰ আৰম্ভণিতে আমি আপোনাৰ বাবে লৈ আহিছোঁ এই শিতানটো। ব্যস্ততাপূৰ্ণ জীৱনৰ পৰা মাত্ৰ দুই মিনিট সময় উলিয়াই জানি লওক আপোনাৰ বাবে প্ৰয়োজনীয় কেইটামান খবৰ।
- অসম বিধানসভাৰ চলিত শীতকালীন অধিৱেশনৰ সময়ত শুকুৰবাৰে সদনত গৃহীত হয় ‘দ্য আছাম ফিক্সেশ্যন অৱ চিলিং অন লেণ্ড হ’ল্ডিংছ (এমেণ্ডমেন্ট) বিল, ২০২৫’। এই বিধেয়কৰ জৰিয়তে চাহ শ্ৰমিকৰ মাজত ভূমি পট্টা প্ৰদানৰ ব্যৱস্থা কৰা হৈছে।
- আজি বিধানসভাৰ শীতকালীন অধিৱেশনৰ অন্তিম দিন। অধিৱেশনৰ অন্তিম দিনা আজি সদনৰ মজিয়াত ৬ জনগোষ্ঠীৰ জনজাতিকৰণৰ প্ৰসঙ্গ উত্থাপন কৰা হ’ব। তদুপৰি শিক্ষক-কৰ্মচাৰীৰ পদ প্ৰাদেশিকীকৰণ সংশোধনী বিধেয়কো বিধানসভাত উত্থাপন কৰা হ’ব।
- ৬ জনগোষ্ঠীৰ জনজাতিকৰণৰ বিৰোধিতাৰে গুৱাহাটী বিশ্ববিদ্যালয়ত যোৱা নিশা উত্তাল প্ৰতিবাদ সাব্যস্ত কৰে কেইবাটাও জনজাতীয় ছাত্ৰ সংগঠনে। এবছু, টি এম পি কে, ৰাভা ছাত্র সন্থাৰ উদ্যোগত হোৱা এই প্ৰতিবাদৰ সময়ত প্ৰতিবাদকাৰী ছাত্ৰসকলে কোনো কাৰণতে ৬জনগোষ্ঠীৰ জনজাতিকৰণ মানি নোলোৱাৰ হুংকাৰ দিয়ে।
- শুকুৰবাৰৰ পৰা সলনি হৈছে ৰাজ ভৱনৰ নাম। ৰাজ্যপাল সন্মিলনৰ পৰামৰ্শৰ আধাৰত গৃহ পৰিক্ৰমা মন্ত্ৰালয়ৰ অনুৰোধ অনুসৰি কালিৰ পৰা ৰাজ ভৱন, অসমৰ নাম সলনি কৰা হৈছে। সেই অনুসৰি এতিয়াৰ পৰা লোক ভৱন, অসম নামেৰে পৰিচিত হ’ব।
- শুকুৰবাৰে ৰাজ্য চৰকাৰে আৰম্ভ কৰে প্ৰেৰণা আঁচনি। এই আঁচনিৰ অধীনত চলিত মাহৰ পৰা হাইস্কুল শিক্ষান্ত পৰীক্ষাত অৱতীৰ্ণ হ’বলগীয়া পৰীক্ষাৰ্থীসকলে চাৰি মাহৰ বাবে প্ৰতিমাহে ৩০০ টকাকৈ জলপানি লাভ কৰিব। মুখ্যমন্ত্ৰী হিমন্ত বিশ্ব শৰ্মাই এই আঁচনিৰ শুভাৰম্ভ কৰি আঁচনিখনৰ জৰিয়তে ৰাজ্যৰ প্ৰায় ৪.৪০ লাখ পৰীক্ষাৰ্থী উপকৃত হ’ব বুলি আশা প্ৰকাশ কৰে।
- দুদিনীয়া ভ্ৰমণসূচীৰে অহা ৪ ডিচেম্বৰত ভাৰত ভ্ৰমণলৈ ৰাছিয়াৰ ৰাষ্ট্ৰপতি ভ্লাদিমিৰ পুটিন। চাৰি বছৰৰ পিছত ভাৰত ভ্ৰমণ কৰিবলগা ৰুছ ৰাষ্ট্ৰপতিগৰাকীয়ে এই ভ্ৰমণৰ সময়ত ভাৰত-ৰাছিয়া বাৰ্ষিক সন্মিলনত অংশগ্ৰহণ কৰিব।
- পহলগামৰ সন্ত্ৰাসবাদী আক্ৰমণ সন্দৰ্ভত আপত্তিজনক মন্তব্যৰ অভিযোগত গ্ৰেপ্তাৰ হোৱা ধিঙৰ বিধায়ক আমিনুল ইছলাম শুকুৰবাৰে মুকলি আকাশৰ তললৈ আহে। NSA গোচৰত বিগত প্ৰায় ৭ মাহ কাৰাবন্দী হৈ আছিল এ আই ইউ ডি এফৰ বিধায়কগৰাকী।
- চলিত ছৈয়দ মুস্তাক আলী ট্ৰফীৰ এক মেচত কালি ছত্তীশগড়ক ৪৮ ৰানত পৰাস্ত কৰে অসমে। মেচখনত অসমে প্ৰথমে বেটিং কৰি সুমিত গাডিগাওকাৰৰ ৭৯ ৰানৰ সহায়ত ১৬৭ ৰানৰ সহায়ত ১৬৭ ৰান সংগ্ৰহ কৰাৰ পিছত ছত্তীশগড়ক ১১৯ ৰানতে অলআউট কৰে। বিধ্বংসী বলিঙেৰে মুখতাৰ হুছেইনে ৬টা উইকেট দখল কৰে।
