গোলকগঞ্জত আৰক্ষীৰ জালত পিতা-পুত্ৰ, হস্তনিৰ্মিত পিষ্টল উদ্ধাৰ

ধুবুৰীৰ গোলকগঞ্জত সংঘটিত হৈছে এক চাঞ্চল্যকৰ ঘটনা। আৰক্ষীৰ অভিযানত পিষ্টলসহ আটক কৰা হৈছে পিতা-পুত্ৰক। হালাকুৰাৰ সোণাখুলি প্ৰথম খণ্ড গাঁৱত চলিছিল অভিযান। পুৱতিনিশা হামিদ আলী ওৰফে ধুল্লাৰ ঘৰত অভিযান চলাইছিল গোলকগঞ্জ আৰক্ষীয়ে। অভিযানত হামিদ আলীৰ বাসগৃহৰ পৰা উদ্ধাৰ কৰা হৈছে হস্তনিৰ্মিত পিষ্টল।

আৰক্ষীয়ে ২ ছেপ্টেম্বৰৰ নিশা হালাকুৰা অঞ্চলত অভিযান চলাই ব্যক্তিজনৰ লগতে তেওঁৰ পুত্ৰক আটক কৰি তেওঁলোকৰ বাসগৃহৰ পৰা হাতেৰে নিৰ্মিত পিষ্টল উদ্ধাৰ কৰে। জানিব পৰা মতে এক গোপন সূত্ৰৰ ভিত্তিত কাম কৰি গোলকগঞ্জ থানাৰ ভাৰপ্ৰাপ্ত বিষয়া দেৱজিৎ কলিতাৰ নেতৃত্বত এটা আৰক্ষী দলে সোণাখুলি প্ৰথম খণ্ডত থকা হামিদ আলী (৬৪) ওৰফে ধূল্লাৰ ঘৰত অভিযান চলায়।

অভিযানৰ সময়ত আৰক্ষীয়ে হাতেৰে নিৰ্মিত পিষ্টল উদ্ধাৰ কৰে। তাৰ পিছতে হামিদ আলীক তাৎক্ষণিকভাৱে আটক কৰা হয়।তেওঁৰ পুত্ৰ মজনু আলী (৩০) ওৰফে চাঞ্চেকো জিম্মাত লৈ সোধা-পোছাৰ বাবে থানালৈ নিয়া হয় । বৰ্তমান পিতৃ-পুত্ৰৰ উভয়কে গোলকগঞ্জ আৰক্ষীয়ে জেৰা অব্যাহত ৰাখিছে। লগতে এই অস্ত্ৰ সন্দৰ্ভত অধিক তথ্যৰ বাবে তদন্ত অব্যাহত ৰাখিছে আৰক্ষীয়ে।

সূত্ৰৰ পৰা লাভ কৰা তথ্য অনুসৰি দুয়োজন লোকৰ অবৈধ ড্ৰাগছ ব্যৱসায়ৰ সৈতেও জড়িত থকাৰ সন্দেহ কৰা হৈছে। যিয়ে গোচৰটোত আন এক মাত্ৰা যোগ কৰিছে। তেওঁলোকৰ সৈতে জড়িত পৰৱৰ্তী কোনো অপৰাধমূলক কাৰ্যকলাপ পোহৰলৈ অনাৰ সন্দৰ্ভত প্ৰচেষ্টা অব্যাহত ৰাখিছে আৰক্ষীয়ে । ইফালে অঞ্চলটোত অপৰাধ ৰোধৰ বাবে চলি থকা প্ৰচেষ্টাৰ সময়তে এই সফল অভিযানক এক ডাঙৰ কৃতিত্ব হিচাপে প্ৰশংসা কৰা হৈছে।

উল্লেখ্য যে, কিছুদিনপূৰ্বে বাংলাদেশৰ কুখ্যাত জামাত-ই-ইছলামীৰ সৈতে সম্পৰ্ক থকাৰ অভিযোগত শ্বাহ আলম সৰকাৰ নামৰ এজন শিক্ষকক গ্ৰেপ্তাৰ কৰিছিল গোলকগঞ্জ আৰক্ষীয়ে ।  ধৃত শ্বাহ আলম সৰকাৰ গোলকগঞ্জৰ ভাৰত-বাংলাদেশ সীমান্তৰ লক্ষীমাৰী মধ্য ইংৰাজী বিদ্যালয়ৰ শিক্ষক। তাৰ পিছতে উক্ত সংগঠনটোৰ সৈতে জড়িত থকাৰ অভিযোগত গ্ৰেপ্তাৰ কৰা হৈছিল আন এগৰাকী শিক্ষক হজৰত আলী ওৰফে হজৰত মাষ্টাৰক। বৰ্তমান দুয়োজনকে জেৰা কৰি থকা হৈছে।